বিশিষ্ট অংক’লজিষ্ট তথা শিলচৰৰ কাছাৰ কেন্সাৰ হাস্পতাল ছ’চাইটিৰ সঞ্চালক পদ্মশ্ৰী ডাঃ আৰ ৰবি কান্নানক সামগ্ৰিক স্বাস্থ্যসেৱাৰ ক্ষেত্ৰত আগবঢ়োৱা অসাধাৰণ অৱদানৰ বাবে ২০২৩ চনৰ সন্মানীয় ৰমন মেগছেছে বঁটাৰে সন্মানিত কৰা হৈছে।
এইবাৰৰ ভাৰতৰ একমাত্ৰ ৰমন মেগছেছে বঁটাবিজয়ী ডাঃ কান্ননে বিনম্ৰভাৱে কয় যে এয়া তেওঁৰ চিকিৎসালয়ৰ বাবে এক স্বীকৃতি আৰু তেওঁ ইয়াক কেৱল প্ৰতিষ্ঠানটোৰ মুৰব্বী হিচাপেহে গ্ৰহণ কৰিব। তেওঁৰ প্ৰকল্পটোক সফলতাৰে আগুৱাই নিয়াৰ প্ৰতিষ্ঠানটোৰ চিকিৎসাকৰ্মী সকলৰ শলাগ লয়।
চেন্নাইৰ চিকিৎসক ডাঃ কান্ননে ২০০৭ চনত পত্নী সীতাৰ সৈতে কাছাৰ কেন্সাৰ হস্পিতাল ছ’চাইটিৰ দায়িত্ব গ্ৰহণ কৰে। ইয়াৰ পূৰ্বে তেওঁ চেন্নাইৰ আদয়াৰ কেন্সাৰ ইনষ্টিটিউটত চাৰ্জন হিচাপে নিজৰ কেৰিয়াৰ গঢ়ি তুলিছিল। যাৰ বাবে স্বাস্থ্যসেৱা খণ্ডলৈ আগবঢ়োৱা উল্লেখযোগ্য অৱদানৰ বাবে তেওঁ পদ্মশ্ৰী বঁটাও লাভ কৰিছিল।
তৃণমূল পৰ্যায়ত স্বাস্থ্যসেৱা সেৱাৰ সুলভতাৰ ওপৰত গুৰুত্ব আৰোপ কৰি ডাঃ কান্নানে কৰিমগঞ্জ, হাইলাকান্দি, ডিমা হাছাও আদি বিভিন্ন স্থানত নিজৰ ক্লিনিক আৰম্ভ কৰিছিল। তেওঁৰ নেতৃত্বত কাছাৰ কেন্সাৰ হাস্পতাল ছ’চাইটিয়ে ৯০%তকৈ অধিক আকৰ্ষণীয় ফ’ল’-আপ ৰেচিঅ’ লাভ কৰিছে।
উল্লেখযোগ্য যে ডাঃ কান্নানে ২০১২ চনত এজন কেন্সাৰ ৰোগীৰ বাবে প্ৰথমটো মাইক্ৰ’ভেছকুলাৰ অস্ত্ৰোপচাৰৰ তত্বাৱধান কৰিছিল, যিটো কেৱল চিকিৎসালয়খনৰ বাবেই নহয়, সমগ্ৰ উত্তৰ-পূব অঞ্চলৰ বাবেও এক অগ্ৰণী কৃতিত্বৰ চিন ।
চলিত বৰ্ষৰ শেষৰ ফালে অনুষ্ঠিত হ’ব এই বঁটা প্ৰদান অনুষ্ঠান। ১৯৫৭ চনত চনৰ পৰা প্ৰদান কৰি অহা ৰমন মেগছেছে বঁটা হৈছে ফিলিপাইনছৰ প্ৰাক্তন ৰাষ্ট্ৰপতি ৰমন মেগছেছেৰ নৈতিক শাসন, জনসাধাৰণৰ প্ৰতি নিষ্ঠাবান সেৱা আৰু গণতান্ত্ৰিক ব্যৱস্থাৰ প্ৰতি সন্মান জনাই প্ৰদান কৰা এক গুৰুত্বপূৰ্ণ বঁটা।“এছিয়াৰ নোবেল বঁটা” খ্যাত এই বঁটাটো ফিলিপাইন চৰকাৰৰ সহযোগত ৰকফেলাৰ ব্রাদাৰ্ছ ফাণ্ডৰ ট্ৰাষ্টীসকলে প্ৰদান কৰে।
