ছিংগাপুৰৰ ৰাষ্ট্ৰপতি হিচাপে নিৰ্বাচিত হৈছে দেশখনৰ প্ৰাক্তন উপ-প্ৰধানমন্ত্ৰী তথা ভাৰতীয় বংশোদ্ভুত অৰ্থনীতিবিদ থাৰমান শানমুগাৰত্নম। তেওঁ ছিংগাপুৰৰ ৰাজনৈতিক দল পিপলছ একচন পাৰ্টি (পিএপি)ৰ প্ৰাক্তন নেতা। শুকুৰবাৰে নিশা ছিংগাপুৰৰ নিৰ্বাচন আয়োগে কয় যে ৬৬ বছৰীয়া থাৰমানে গণনা কৰা ভোটৰ ৭০.৪ শতাংশ ভোট লাভ কৰি জয়লাভ কৰিছে। থাৰমানে ছিংগাপুৰৰ নৱম ৰাষ্ট্ৰপতিৰ দায়িত্ব গ্ৰহণ কৰিব।
ৰিটাৰ্নিং অফিচাৰ টান মেং ডুইয়ে কয়, ‘মই থাৰমান শানমুগাৰত্নমক ছিংগাপুৰৰ ৰাষ্ট্ৰপতি পদৰ বিজয়ী ঘোষণা কৰিছো। ২০১৭ চনৰ ছেপ্টেম্বৰ মাহত হালিমা ইয়াকুব ক্ষমতালৈ আহিছিল। তেওঁ আছিল ছিংগাপুৰৰ অষ্টম আৰু প্ৰথম মহিলা ৰাষ্ট্ৰপতি।
১৯৫৭ চনৰ ২৫ ফেব্ৰুৱাৰীত ছিংগাপুৰত জন্মগ্ৰহণ কৰা থাৰমান ১৯ শতিকাত দেশখনলৈ অহা তামিল বংশৰ বহু প্ৰজন্মৰ ছিংগাপুৰবাসী। তিনিটা সন্তানৰ ভিতৰত অন্যতম থাৰমান হৈছে “চিংগাপুৰৰ পেথ’লজীৰ পিতৃ” নামেৰে পৰিচিত চিকিৎসা বিজ্ঞানী এমেৰিটাছ অধ্যাপক কে শানমুগাৰত্নমৰ পুত্ৰ, যিয়ে ছিংগাপুৰ কেন্সাৰ ৰেজিষ্ট্ৰী প্ৰতিষ্ঠা কৰিছিল আৰু কেন্সাৰ গৱেষণা আৰু পেথ’লজীৰ সৈতে জড়িত কেইবাটাও আন্তঃৰাষ্ট্ৰীয় সংস্থাৰ নেতৃত্ব দিছিল।
ছিংগাপুৰৰ সামাজিক উদ্যোগ আৰু অলাভজনক কলা খণ্ডত সক্ৰিয়ভাৱে জড়িত চীন-জাপানী বংশৰ মিশ্ৰিত বংশৰ ছিংগাপুৰৰ অধিবক্তা জেন ইউমিকো ইট’গিৰ সৈতে বিবাহপাশত আৱদ্ধ হৈছে থাৰমান। দম্পতীহালৰ এগৰাকী কন্যা আৰু তিনিজন পুত্ৰ সন্তান আছে।
লণ্ডন স্কুল অৱ ইকনমিক্সৰ পৰা অৰ্থনীতি বিজ্ঞান শাখাত স্নাতক ডিগ্ৰী লাভ কৰাৰ পূৰ্বে থাৰমানে এংলো-চাইনিজ স্কুলত পঢ়িছিল। ইয়াৰ পিছত তেওঁ কেম্ব্ৰিজ বিশ্ববিদ্যালয়ৰ উলফছন কলেজলৈ যায় আৰু তাৰ পৰাই অৰ্থনীতিত স্নাতকোত্তৰ ডিগ্ৰী লাভ কৰে।
তাৰ পিছত তেওঁ হাৰ্ভাৰ্ড বিশ্ববিদ্যালয়ৰ হাৰ্ভাৰ্ড কেনেডি স্কুলৰ ছাত্ৰ হয়, য’ত তেওঁ পাব্লিক এডমিনিষ্ট্ৰেচনত স্নাতকোত্তৰ ডিগ্ৰী সম্পূৰ্ণ কৰে আৰু লুচিয়াছ এন লিটাউয়াৰ ফেল’ছ বঁটা (শৈক্ষিক উৎকৰ্ষতা আৰু নেতৃত্ব প্ৰদৰ্শন কৰা এমপিএ ছাত্ৰ-ছাত্ৰীক দিয়া) লাভ কৰে। .
পেছাত এজন অৰ্থনীতিবিদ থাৰমানে নিজৰ কৰ্মজীৱন মূলতঃ অৰ্থনৈতিক আৰু সামাজিক নীতিৰ সৈতে জড়িত জনসেৱাৰ ভূমিকাত কটায়। তেওঁ বিভিন্ন উচ্চ পৰ্যায়ৰ আন্তঃৰাষ্ট্ৰীয় পৰিষদ আৰু পেনেলৰো নেতৃত্ব দিছে।
