ভাৰতীয় দণ্ডবিধিৰ ১২৪ এ ধাৰা অৰ্থাৎ দেশদ্ৰোহ আইনক প্ৰত্যাহ্বান জনোৱা গোচৰটো উচ্চতম ন্যায়ালয়ে বৃহত্তৰ বিচাৰপীঠলৈ প্ৰেৰণ কৰিছে। মঙলবাৰে (১২ ছেপ্টেম্বৰ) যেতিয়া ভাৰতৰ মুখ্য ন্যায়াধীশ ডি ৱাই চন্দ্ৰচুড়, ন্যায়াধীশ জে বি পাৰ্দিৱালা আৰু ন্যায়াধীশ মনোজ মিশ্ৰৰ বিচাৰপীঠলৈ গোচৰটো আহিছিল, তেতিয়া তেওঁলোকে কয় যে এই গোচৰটোৰ কমেও পাঁচজনীয়া ন্যায়াধীশৰ বিচাৰপীঠে শুনানি লোৱা উচিত।
তিনিজনীয়া বিচাৰপীঠে আজি কয় যে ১৯৬২ চনত এই সন্দৰ্ভত আন এটা গোচৰ আছিল। সেই গোচৰত ৫ জনীয়া বিচাৰপীঠে এই ব্যৱস্থা মানি লৈছিল। সেয়েহে এই গোচৰৰ শুনানি গ্ৰহণ কৰিবলৈ বৃহত্তৰ বিচাৰপীঠৰ প্ৰয়োজন।
লগতে পঢ়ক: বিৰল, বিস্ময়! ৪৩৭ বছৰৰ পাছত আজি পৃথিৱীৰ নিচেই কাষলৈ ‘নিশিমুৰা’; খালী চকুৰে দেখা যাব সেউজীয়া ধুমকেতু
উচ্চতম ন্যায়ালয়ৰ বিচাৰপীঠে আজি কয় যে ১৯৬২ চনত আইনখনক প্ৰত্যাহ্বান জনোৱা গোচৰটো সংবিধানত সন্নিৱিষ্ট মৌলিক অধিকাৰৰ ভিত্তিত ঘোষণা কৰা হৈছিল। কিন্তু সেই সময়ত এই মৌলিক অধিকাৰৰ পৰিসৰ অতি সংকীৰ্ণ আছিল। আবেদনকাৰীয়েও কেবল সংবিধানৰ ১৯ নং অনুচ্ছেদৰ ভিত্তিতহে এই আইনখনক প্ৰত্যাহ্বান জনাইছিল। কিন্তু পৰৱৰ্তী ক্ষেত্ৰত মৌলিক অধিকাৰৰ পৰিসৰ বৃদ্ধি পাইছে। পৰৱৰ্তীকালৰ বিভিন্ন ৰায়দানত সংবিধানৰ ১৪, ১৯ আৰু ২১ নং অনুচ্ছেদক সামঞ্জস্যপূৰ্ণ বুলি স্বীকৃতি দিয়া হৈছে।
আজিৰ দিনটোতে উচ্চতম ন্যায়ালয়ে এই গোচৰ সন্দৰ্ভত আন এক গুৰুত্বপূৰ্ণ সিদ্ধান্ত গ্ৰহণ কৰে। সংসদৰ নতুন অধিৱেশনৰ অন্তিম দিনটোত ভাৰতীয় দণ্ডবিধিৰ ঠাইত ‘ভাৰতীয় ন্যায় সংহিতা’ নামৰ নতুন বিধেয়কখন সংসদত উত্থাপন কৰা হব। যেতিয়ালৈকে সংসদে বিধেয়কখনৰ সন্দৰ্ভত সিদ্ধান্ত গ্ৰহণ নকৰে, কেন্দ্ৰীয় চৰকাৰে দেশদ্ৰোহ আইনক প্ৰত্যাহ্বান জনোৱা গোচৰৰ শুনানি স্থগিত ৰখাৰ বাবে অনুৰোধ জনাইছিল।
অৱশ্যে উচ্চতম ন্যায়ালয়ে সেই আবেদন নাকচ কৰে। তিনিজনীয়া ন্যায়াধীশৰ বিচাৰপীঠে কয় যে নতুন বিধেয়কখন আইনত পৰিণত হ’লেও ভাৰতীয় দণ্ডবিধিৰ ১২৪ এ ধাৰাত পূর্বতে সংঘটিত হোৱা গোচৰসমূহত ইয়াৰ কোনো প্রভাৱ নপৰে৷ নতুন দণ্ডবিধিৰ প্ৰৱৰ্তন হ’লেও এই বিধানৰ বৈধতাৰ বাবে সাংবিধানিক বিচাৰৰ প্ৰয়োজন থাকিব।
লগতে পঢ়ক: ‘সুখী’ কৰিবলৈ ৰাজি নাছিল শিল্পা! কেনেকৈ প্ৰস্তুত হ’ল মোহময়ী অভিনেত্ৰীগৰাকী?
এনে পৰিস্থিতিত বিচাৰপীঠে পঞ্জীয়ন বিভাগক এই গোচৰৰ সকলো নথি-পত্ৰ মুখ্য ন্যায়াধীশৰ সন্মুখত ৰাখিবলৈ নিৰ্দেশ দিয়ে। তেওঁৱেই নতুন ৫ জনীয়া বিচাৰপীঠখন গঠন কৰিব।
