যোৱা জুন মাহত কানাডাত খালিস্তানী উগ্ৰপন্থী হৰদীপ সিং নিজ্জাৰৰ মৃত্যু হৈছিল। কানাডাৰ প্ৰধানমন্ত্ৰী জাষ্টিন ট্ৰুডোৱে এই ঘটনাত এজন ভাৰতীয় কূটনীতিবিদ জড়িত বুলি দাবী কৰে। আৰু তাৰ পিছতেই কানাডা চৰকাৰে এজন ভাৰতীয় কূটনীতিবিদক বহিষ্কাৰ কৰিলে। আশংকা কৰা হৈছে যে দুয়োখন দেশৰ মাজৰ সম্পৰ্ক আৰু অধিক অৱনতি ঘটিব পাৰে।
কানাডাৰ প্ৰধানমন্ত্ৰী জাষ্টিন ট্ৰুডোৱে শেহতীয়াকৈ জি-২০ সন্মিলনত অংশগ্ৰহণ কৰিবলৈ ভাৰত ভ্ৰমণ কৰাৰ সময়ত খালিস্তান বিষয়ত মোডীৰ কথা শুনিবলগীয়া হৈছিল। ইফালে ঘৰুৱা ৰাজনৈতিক সমীকৰণৰ কথা মনত ৰাখি জাষ্টিন ট্ৰুডোৱে পূৰ্বৰ স্থিতিত অটল হৈ আছিল।
ইয়াৰ মাজতে জাষ্টিন ট্ৰুডোৱে দাবী কৰিছিল যে খালিস্তানী উগ্ৰপন্থী হৰদীপ সিং নিজ্জাৰৰ হত্যাকাণ্ডৰ সৈতে ভাৰত চৰকাৰৰ এজেণ্টৰ সম্পৰ্ক আছে। তাক লৈ ভাৰত চৰকাৰৰ আগত উদ্বেগ প্ৰকাশ কৰে কানাডা চৰকাৰে।
কানাডাৰ বৈদেশিক মন্ত্ৰী মেলানি জলীয়ে ঘোষণা কৰিছে যে কানাডা চৰকাৰে হৰদীপ সিং নিজ্জাৰ হত্যাকাণ্ডৰ লগত জড়িত এজন ভাৰতীয় কূটনীতিবিদক বহিষ্কাৰ কৰিছে। অৱশ্যে তেওঁ কূটনীতিবিদজনৰ নাম প্ৰকাশ কৰা নাই। তেওঁ কয়, ‘কানাডাৰ এজন নাগৰিকৰ হত্যাকাণ্ডৰ লগত বিদেশী চৰকাৰ জড়িত বুলি উত্থাপন কৰা অভিযোগ অতি গুৰুতৰ। আৰু সেয়া কোনো কাৰণতে গ্ৰহণযোগ্য নহয়। গতিকে আজি আমি এজন জ্যেষ্ঠ ভাৰতীয় কূটনীতিবিদক বহিষ্কাৰ কৰিছো।’
উল্লেখ্য যে জুন মাহত গুৰদ্বাৰাৰ ভিতৰতে খালিস্তান সমৰ্থক উগ্ৰপন্থী হৰদীপ সিং নিজ্জাৰক গুলীয়াই হত্যা কৰা হৈছিল। হৰদীপক ২০ বাৰতকৈও অধিক গুলীচালনা কৰা হৈছিল। খবৰ অনুসৰি হৰদীপে কানাডাৰ ব্ৰিটিছ কলম্বিয়া প্ৰদেশৰ পাঞ্জাবী প্ৰধান ছাৰে অঞ্চলত বাস কৰিছিল। বিগত কেইবছৰমানৰ পৰা কানাডাৰ ভেংকুৱাৰত ভাৰতীয় উচ্চায়ুক্তৰ সন্মুখত খালিস্তানী প্ৰতিবাদৰ আঁৰত আছিল এই হৰদীপ।
কানাডাত মৃত হৰদীপৰ বিৰুদ্ধে এনআইএৰ চাৰিটা গোচৰ আছিল। খালিস্তানী যোগৰ লগতে হিন্দু পুৰোহিতক হত্যাৰ ষড়যন্ত্ৰৰ অভিযোগ। বিগত বৰ্ষৰ জুলাই মাহত এন আই এয়ে হৰদীপৰ মূৰৰ বাবে ১০ লাখ টকা মূল্য নিৰ্ধাৰণ কৰিছিল। জনা যায় যে হৰদীপ খালিস্তান টাইগাৰ ফৰ্চৰ মুৰব্বী আছিল। গুৰপতৱন্ত সিং পান্নুনৰ ‘শিখছ ফৰ জাষ্টিচ’ সংগঠনৰ মত প্ৰচাৰৰ দায়িত্ব আছিল হৰদীপৰ টাইগাৰ ফৰ্চৰ ওপৰত।
মন কৰিব যে ভাৰতত ইতিমধ্যে ‘শিখছ ফৰ জাষ্টিছ’ নিষিদ্ধ। কানাডাত সেই সংগঠনৰ প্ৰতিনিধি হিচাপে হৰদীপক নিযুক্তি দিয়া হৈছিল। কানাডাৰ শিখসকলৰ মাজত খালিস্তান বিভাজনৰ প্ৰস্তাৱ গৃহীত কৰাৰ দায়িত্ব আছিল হৰদীপৰ। ইফালে, যিটো গুৰদ্বাৰাত হৰদীপক হত্যা কৰা হৈছিল, সেইটোৱেই শেহতীয়াকৈ খালিস্তানপন্থী প্ৰস্তাৱ গৃহীত কৰিছে। এই প্ৰস্তাৱ গৃহীত হোৱাৰ সময়ত কানাডাৰ প্ৰধানমন্ত্ৰী জাষ্টিন ট্ৰুডো ভাৰতত আছিল।
বাতৰি অনুসৰি, ছাৰেৰ গুগু নানক শিখ মন্দিৰটো হৰদীপে এক প্ৰকাৰ দখল কৰিছিল। তেওঁ গুৰদ্বাৰাৰ সভাপতি আছিল। যোৱা দুবছৰ ধৰি তেওঁ এই কৰ্তব্য পালন কৰি আহিছে। এই হৰদীপে কানাডাৰ ভেংকুৱাৰত ভাৰতীয় উচ্চায়ুক্তৰ সন্মুখত খালিস্তানী প্ৰতিবাদৰ আয়োজন কৰিছিল।
ইপিনে, কানাডাস্থিত খালিস্তানী নেতা মনিন্দৰ বয়েলৰ সৈতেও হৰদীপৰ ঘনিষ্ঠতা আছিল। এই মনিন্দৰ পুনৰ শ্ৰী দমশমেশ দৰবাৰৰ সভাপতি আছিল। মনিন্দৰ আৰু হৰদীপৰ গুৰদ্বাৰাৰ বিৰুদ্ধে বিচ্ছিন্নতাবাদী খালিস্তানী আৱেগ প্ৰচাৰ কৰাৰ অভিযোগ উত্থাপন হৈছে। কিন্তু কানাডা চৰকাৰে ইয়াৰ ওপৰত কোনো ব্যৱস্থা গ্ৰহণ কৰা নাছিল।
