ইজৰাইলত হাজাৰ হাজাৰ ভাৰতীয় বাস কৰি আছে। এই পৰিস্থিতিত হামাছৰ আক্ৰমণৰ পিছৰে পৰা তেওঁলোকৰ মাজত আতংক বিয়পি পৰিছে। আক্ৰমণৰ দিনৰে পৰা এয়াৰ ইণ্ডিয়াই তেল আভিভৰ পৰা বিমান সেৱা বন্ধ কৰি দিছে। এই পৰিস্থিতিত বহু ভাৰতীয় লোক বিপদত পৰিছে।
ইজৰাইলত আবদ্ধ হৈ আছে বহু ভাৰতীয় পৰ্যটক, ব্যৱসায়ী। তেওঁলোকৰ প্ৰত্যাৱৰ্তনৰ ব্যৱস্থা কৰিবলৈ তেওঁলোকে দূতাবাসক আহ্বান জনাইছে।
ইপিনে, হাজাৰ হাজাৰ ভাৰতীয় ছাত্ৰ-ছাত্ৰীয়ে ইজৰাইলৰ বিভিন্ন বিশ্ববিদ্যালয়ত অধ্যয়ন কৰে। তাৰোপৰি তাত ব্যৱসায়িক সূত্ৰেও বহু ভাৰতীয় লোকে বাস কৰে। হীৰাৰ কাম কৰা শিল্পীৰ পৰা আই টি কৰ্মীলৈকে ভাৰতৰ পৰা ইজৰাইললৈ যায়।
লগতে পঢ়কঃ দিল্লীত ইজৰাইলৰ দূতাবাসত বৃদ্ধি কৰা হ’ল নিৰাপত্তা; পৰিস্থিতিক লৈ সতৰ্ক ভাৰত
আনহাতে, কেইবাহাজাৰো ভাৰতীয় মহিলাই ইজৰাইলত ধাই হিচাপে কাম কৰে। ভাৰতীয় দূতাবাসে দেশখনত বসবাস কৰা ভাৰতীয়সকলৰ সুৰক্ষাৰ বাবে নিৰ্দেশনা জাৰি কৰিছে। তাত থকা থকা ভাৰতীয়সকলৰ সৈতে দূতাবাসে যোগাযোগ অব্যাহত ৰাখিছে বুলি জানিব পৰা গৈছে।
উল্লেখ্য যে দক্ষিণ ইজৰাইলত ৭ অক্টোবৰৰ পৰা হামাছৰ আক্ৰমণ আৰম্ভ হৈছিল। হাজাৰ হাজাৰ ৰকেট উৰি আহি পৰে ইজৰাইলত। তাৰ পিছৰে পৰা বিগত তিনিদিন ধৰি সংঘাত অব্যাহত আছে।
এনে পৰিস্থিতিত ইজৰাইলত ৰকেট আক্ৰমণত আহত হয় কেৰালাৰ এজন বাসিন্দা। জানিব পৰা মতে আহত মহিলাগৰাকীৰ নাম শ্বীজা আনন্দ। তেওঁৰ সৈতে ভাৰতীয় দূতাবাসে যোগাযোগ ৰাখিছে।
লগতে পঢ়কঃ ডেংগুৰ বাবে কমি গৈছে প্লেটলেট; চেন্নাইৰ হাস্পাতালত ভৰ্তি তাৰকা অ’পেনাৰ শুভমন গীল!
চৰকাৰী হিচাপ অনুসৰি বৰ্তমান ইজৰাইলত প্ৰায় ১৮ হাজাৰ ভাৰতীয় নাগৰিক বাস কৰে। হামাছৰ আক্ৰমণৰ পিছত শংকিত হৈ পৰা ভাৰতীয়সকলে ঘৰলৈ উভতি আহিবলৈ চেষ্টা বিচাৰিছে।
