হামাছ বাহিনীৰ সৈতে যুদ্ধত লিপ্ত হৈছে ইজৰাইল। এতিয়া ভাৰতত পৰিছে তাৰ ছাঁ! নতুন দিল্লীত থকা ইজৰাইলৰ দূতাবাসৰ নিৰাপত্তা বৃদ্ধি কৰা হৈছে। ইহুদী ধৰ্মীয় কেন্দ্ৰ চাবাদ হাউচতো নিৰাপত্তা অধিক শক্তিশালী কৰা হৈছে। মঙলবাৰে দিল্লী আৰক্ষীৰ এজন বিষয়াই এই বৰ্ধিত নিৰাপত্তাৰ বিষয়ে অৱগত কৰে।
নতুন দিল্লীত ইজৰাইলৰ দূতাবাসৰ সমীপত অৱস্থিত স্থানীয় আৰক্ষী থানা। থানাখন মধ্য দিল্লীৰ চান্দনী চকত অৱস্থিত চাবাদ হাউচৰ পৰাও বেছি দূৰত নহয়। দিল্লী আৰক্ষীৰ এগৰাকী বিষয়াই জনোৱা মতে, এই দুটা স্থানত সতৰ্কতা বৃদ্ধি আৰু অতিৰিক্ত আৰক্ষী জোৱান নিয়োগ কৰাৰ নিৰ্দেশ লাভ কৰা হৈছে।
লগতে পঢ়কঃ ডেংগুৰ বাবে কমি গৈছে প্লেটলেট; চেন্নাইৰ হাস্পাতালত ভৰ্তি তাৰকা অ’পেনাৰ শুভমন গীল!
তাৰ পৰিপ্ৰেক্ষিততে মঙলবাৰে পুৱাৰে পৰা এই দুই স্থানত নিৰাপত্তা শক্তিশালী কৰা হৈছে। মূলতঃ ইজৰাইল আৰু হামাছ বাহিনীৰ মাজত চলি থকা যুদ্ধৰ বাবে প্ৰশাসনে এই দেশত থকা ইজৰাইলৰ দূতাবাসত কোনো ধৰণৰ অপ্ৰীতিকৰ ঘটনা ৰোধ কৰিবলৈ অতিৰিক্ত নিৰাপত্তাৰক্ষী নিয়োগ কৰাৰ নিৰ্দেশ দিছে।
উল্লেখ্য যে যোৱা শনিবাৰে পুৱা হামাছ বাহিনীয়ে ইজৰাইলৰ ওপৰত প্ৰথম আক্ৰমণ চলাইছিল। তাৰ পিছত ইজৰাইলে ওলোটাই আক্ৰমণ কৰাত দুয়োপক্ষৰ মাজত তীব্ৰ যুদ্ধ আৰম্ভ হয়। ৰকেট বৰ্ষণ এতিয়াও অব্যাহত আছে।
এই যুদ্ধত ইতিমধ্যে প্ৰায় ডেৰ হাজাৰ লোকৰ মৃত্যু হৈছে। ২ হাজাৰৰো অধিক লোক আহত হৈছে। পৰিস্থিতি মোকাবিলা কৰিবলৈ ইজৰাইল চৰকাৰে গাজা সীমান্ত অৱৰোধ কৰাৰ কথা সকীয়াই দিছে। তাৰ পাছতে হামাছ বাহিনী আৰু অধিক আক্ৰমণাত্মক স্থিতি গ্ৰহণ কৰিছে।
লগতে পঢ়কঃ কাশ্মীৰত পুনৰ গুলীৰ যুদ্ধ; সেনাৰ হাতত নিহত ২ লস্কৰ-ই-তৈবা সন্ত্ৰাসবাদী
ইপিনে, ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে সকীয়াই দিছে যে ইয়াৰ বিনিময়ত বৃহৎ মূল্য ভৰিব লাগিব। তেওঁ হামাছ বাহিনীক আই এছ সন্ত্ৰাসবাদী সংগঠনৰ সৈতে তুলনা কৰি আন দেশৰ সমৰ্থনৰ বাবে আবেদন জনাইছে। ইতিমধ্যে আমেৰিকা, ব্ৰিটেইনকে ধৰি বহু দেশে ইজৰাইলক সমৰ্থন কৰিছে। ভাৰতেও ইজৰাইলৰ কাষত থিয় দিছে।
