বিহাৰত নৰ্থ-ইষ্ট এক্সপ্ৰেছ ৰে’ল দুৰ্ঘটনাত নিহত কমেও ৪জন; আহত শতাধিক, মুকলি হেল্পলাইন নম্বৰ

কেইমাহমানৰ আগতে ওড়িশাত সংঘটিত হোৱা এক ভয়ংকৰ ৰে’ল দুৰ্ঘটনাই দেশ কঁপাই তুলিছিল। কৰমণ্ডল এক্সপ্ৰেছৰ শোকাৱহ ঘটনাৰ পিছতে আন এক বৃহৎ দুৰ্ঘটনা সংঘটিত হৈছে। এইবাৰ দুৰ্ঘটনাস্থলী বিহাৰৰ ৰঘুনাথপুৰ। যোৱা নিশা নৰ্থ-ইষ্ট এক্সপ্ৰেছ ৰে’লপথৰ পৰা লাইনচ্যুত হৈ দুৰ্ঘটনাত পতিত হয়। দুৰ্ঘটনাত কেইবাজনো যাত্ৰীৰ মৃত্যু ঘটিছে। আনন্দ বিহাৰ টাৰ্মিনেল-কামাখ্যা জংচনৰ মাজত ১২৫০৬ নৰ্থ-ইষ্ট ছুপাৰফাষ্ট এক্সপ্ৰেছ চলি আছিল।

যোৱা নিশা ৯:৩০ বজাৰ খন্তেক পিছতে বিহাৰৰ ৰঘুনাথপুৰ ৰে’ল ষ্টেচনৰ সমীপত নৰ্থ-ইষ্ট ছুপাৰফাষ্ট এক্সপ্ৰেছ ৰে’লপথৰ পৰা লাইনচ্যুত হয়। এই দুৰ্ঘটনাত কমেও ১০০ যাত্ৰী আহত হয়। ইফালে মৃত্যুৰ সংখ্যা ৪ জনলৈ বৃদ্ধি পাইছে। ইয়াৰ পূৰ্বে বক্সাৰ আৰক্ষী অধীক্ষকে যোৱা নিশা সংঘটিত দুৰ্ঘটনাৰ পিছত ১ জন লোকৰ মৃত্যুৰ খবৰ দিছিল।

ইফালে ৰে’লখনৰ ২১টা দবা লাইনচ্যুত হোৱা বুলি জানিব পৰা গৈছে। ৰে’লখনৰ তিনিটা এচি কম্পাৰ্টমেণ্টৰ ভিতৰত দুটা লাইনত ছিটিকি পৰি গৈছে। জানিব পৰা মতে, নিৰ্ধাৰিত সময়তকৈ ১ ঘণ্টা ৪০ মিনিট পলমকৈ চলি আছিল ৰে’লখন। বিহাৰৰ বাক্সাৰ জিলাৰ ৰঘুনাথপুৰ ষ্টেচনৰ সমীপত যোৱা নিশা প্ৰায় ৯:৩৫ বজাত ৰে’লখন ৰেলপথৰ পৰা ওলাই যায়। ইফালে দুৰ্ঘটনাৰ বাবে সেই লাইনত ৰে’লৰ চলাচল বন্ধ হৈ পৰিছে।

দুৰ্ঘটনাৰ ফলত বিদ্যুতৰ খুঁটা, চিগনেল পোষ্ট আৰু আপ-ডাউন লাইনৰ ক্ষতিসাধন হয়। সেই পৰিস্থিতিত নতুন দিল্লী-হাওৰা মেইন লাইনত ৰে’লৰ চলাচল ব্যাহত হৈ পৰে। বহু ৰে’লৰ পথ সলনি কৰা হৈছে। কিছু ৰে’ল বাতিল কৰা হৈছে। ৰে’ল পৰিসেৱা স্বাভাৱিক কৰাৰ কৰাৰ বাবে ক্ষিপ্ৰ প্ৰচেষ্টা অব্যাহত আছে। নিশা ৰে’লৱেৰ শীৰ্ষ বিষয়াসকলে সেই স্থানত উপস্থিত হয়।

ইপিনে, কিহৰ কাৰণে এই দুৰ্ঘটনা সংঘটিত হ’ল আৰু ৰে’লৰ দবাবোৰ ৰে’লপথৰ পৰা লাইনচ্যুত হৈ পৰিল সেয়া এতিয়াও স্পষ্ট হোৱা নাই। দুৰ্ঘটনাৰ প্ৰকৃত কাৰণ জানিবলৈ এখন কমিটী গঠন কৰা হৈছে। কিন্তু ৰে’লৱেই মূলতঃ উদ্ধাৰ অভিযান আৰু সেৱাসমূহ স্বাভাৱিক কৰাৰ ওপৰত গুৰুত্ব আৰোপ কৰিছে। অৱশ্যে উদ্ধাৰ অভিযানৰ সময়তে দুৰ্ঘটনাৰ কাৰণ জানিবলৈ তদন্ত আৰম্ভ হ’ব।

আনহাতে, দুৰ্ঘটনা সংঘটিত হোৱাৰ পিছৰে পৰা বিভিন্ন ষ্টেচনৰ বাবে হেল্পলাইন নম্বৰ মুকলি কৰা হৈছে। সেইবোৰ হ’ল-

পাটনা :-৯৭৭১৪৪৯৯৭১

দানাপুৰ :-৮৯০৫৬৯৭৪৯৩

COMM নিয়ন্ত্ৰণ:-৭৭৫৯০৭০০০৪

দীন দয়াল উপাধ্যায় ষ্টেচন:- ৯৭৯৪৮৪৯৪৬১

তিনিচুকীয়া:- ৯৯৫৭৫৫৫৯৮৪

লামডিং:- ৯৯৫৭৫৫৩৯১৫

আলিপুৰদুৱাৰ:- ৯০০২০৫২৯৫৭

ৰঙিয়া:- ৯২৮৭৯৯৮১৬৬

বৰপেটা ৰোড:- ৯২৮৭৯৯৮১৭৩

নতুন বঙাইগাঁও:- ৮০১১১৬৭০৭৮

বাণিজ্যিক নিয়ন্ত্ৰণ, ৰঙিয়া:- ৯৯৫৭৫৫৪৯৬৮

কাটিহাৰ:- ৯৬০৮৮১৫৮৮০

বৰছই:- ৭৫৪১৮০৬৩৫৮

কিষানগঞ্জ:- ৭৫৪২০২৮০২০

দুৰ্ঘটনা সংঘটিত হোৱাৰ পিছত চিকিৎসা দলৰ সৈতে এখন বিশেষ ৰে’ল ৰঘুনাথপুৰৰ দুৰ্ঘটনাস্থলীলৈ ৰাওনা হয়। ইফালে এখন বিশেষ ৰে’লেও গভীৰ নিশা ৰঘুনাথপুৰ ষ্টেচনত উপস্থিত হৈ ৰে’লৰ বাকী থকা যাত্ৰীসকলক নিৰাপদে গন্তব্যস্থানলৈ লৈ যায়।