এক চাঞ্চল্যকৰ হত্যাকাণ্ডই জোকাৰিছে উত্তৰ প্ৰদেশ। ৰাজ্যখনৰ কানপুৰত এগৰাকী ১৭ বৰ্ষীয় কিশোৰক হত্যা কৰাৰ অভিযোগত গ্ৰেপ্তাৰ হৈছে কিশোৰটিৰ টিউচন শিক্ষয়িত্ৰী আৰু তেওঁৰ প্ৰেমিক।
আনহাতে কিশোৰটিৰ হত্যাৰ পিছতো অপহৰণৰ ৰূপ দি অভিযুক্তই মুক্তিপণ নোট পৰিয়াললৈ প্ৰেৰণ কৰে। কেৱল সিমানেই নহয়, এই সমগ্ৰ ঘটনাক সাম্প্ৰদায়িক ৰূপ দিয়াৰ লক্ষ্যৰে মুক্তিপণত লিখি দিয়ে আল্লাহু আকবৰ ধ্বনি।
প্ৰকাশিত খবৰ অনুসৰি, টিউচন শিক্ষয়িত্ৰীগৰাকীৰ সৈতে কিশোৰটিৰ অবৈধ সম্পৰ্ক থকাৰ সন্দেহত তেওঁৰ প্ৰেমিকে কিশোৰটিক হত্যা কৰে। দশম শ্ৰেণীৰ ছাত্ৰজনৰ মৃতদেহ আৰক্ষীয়ে উদ্ধাৰ কৰাৰ পিছতে অভিযুক্ত প্ৰভাত শুক্লাক গ্ৰেপ্তাৰ কৰে।
হত্যাকাণ্ডত জড়িত থকাৰ অভিযোগত ৰচিতা নামৰ শিক্ষয়িত্ৰীগৰাকীকো গ্ৰেপ্তাৰ কৰা হৈছে। লগতে আৰিয়ান নামৰ আন এজন লোককো গ্ৰেপ্তাৰ কৰা হৈছে বুলি আৰক্ষীয়ে জানিবলৈ দিছে।
নিহত কিশোৰটি কানপুৰৰ এগৰাকী আগশাৰীৰ কাপোৰ ব্যৱসায়ীৰ পুত্ৰ বুলি জানিব পৰা গৈছে। পৰিয়ালৰ ভাষ্য মতে, সন্ধিয়া তেওঁ স্কুটীৰে কোচিং ক্লাছৰ বাবে ঘৰৰ পৰা ওলাই যোৱাৰ পিছত পুনৰ ঘূৰি নাহে ঘৰলৈ।
পিছত তেওঁলোকৰ ঘৰত কাপোৰেৰে মুখ ঢাকি থকা এজন ব্যক্তিয়ে স্কুটিৰে আহি পুত্ৰক নিৰাপদে ঘূৰাই অনাৰ স্বাৰ্থত ৩০ লাখ টকা মুক্তিপণৰ দাবীত এখন চিঠি পেলাই থৈ যায়।
চিঠিখনত ‘আল্লাহ হু আকবৰ’ ধ্বনিৰ লগতে আল্লাহৰ ওপৰত বিশ্বাস ৰাখক বুলিও লিখা হৈছিল। তদন্তক অন্য দিশলৈ লৈ যোৱাৰ মানসেৰে কৌশলীভাৱে এই মুক্তিপণ পত্ৰখন দিয়া বুলি আৰক্ষীয়ে প্ৰকাশ কৰে।
ইফালে আৰক্ষীয়ে উদ্ধাৰ কৰিছে ঘটনাস্থলীৰ চিচিটিভিৰ ফুটেজ। এই ফুটেজৰ তদন্তৰ অন্তত কিশোৰজনে স্বেচ্ছাই শুক্লাৰ লগত এটা ষ্ট’ৰ ৰুমলৈ গৈছিল বুলি জানিব পাৰে আৰক্ষীয়ে।
ঘটনা সন্দৰ্ভত আৰক্ষীয়ে সদৰী কৰা মতে, কিশোৰটিক শিক্ষয়িত্ৰীয়ে তালৈ মতাৰ অজুহাত দেখুৱাইছিল শুক্লাই। ষ্ট’ৰৰুমৰ ভিতৰতে শুক্লাই কিশোৰটিক হত্যা কৰে আৰু ইয়াৰ পিছতে কাপোৰ সলনি কৰি স্কুটীত উঠি ঘটনাস্থলীৰ পৰা আঁতৰি যায়।
ইফালে, শিক্ষয়িত্ৰী ৰচিতাই এই অপৰাধত জড়িত থকাৰ কথা স্বীকাৰ কৰি মুক্তিপণ পত্ৰত থকা হাতৰ আখৰ তেওঁৰ প্ৰেমিক প্ৰভাত শুক্লাৰ বুলি প্ৰকাশ কৰা বুলি জানিব পৰা গৈছে।
এই ঘটনা পোহৰলৈ অহাৰ পিছতে সমাজবাদী পাৰ্টিৰ মুৰব্বী তথা ৰাজ্যখনৰ প্ৰাক্তন মুখ্যমন্ত্ৰী অখিলেশ যাদৱে এই সমগ্ৰ ঘটনাক অতি গুৰুতৰ বিষয় বুলি উল্লেখ কৰি ইয়াৰ বিৰুদ্ধে কঠোৰ ব্যৱস্থা গ্ৰহণ কৰিবলৈ আহ্বান জনায়।
এই অপৰাধক এটা বিশেষ সম্প্ৰদায়ৰ সৈতে সংযোগ কৰি মুক্তিপণ দাবী কৰাৰ ষড়যন্ত্ৰ অতি গুৰুতৰ বিষয় আখ্যা দিয়ে অখিলেশ যাদৱে আৰু এনে কাৰ্য দেশ আৰু সমাজৰ বাবে অত্যন্ত বিপজ্জনক বুলি দোহাৰে।
