এক ভয়াৱহ অগ্নিকাণ্ডই জোকাৰি তুলিছে হায়দৰাবাদ। হায়দৰাবাদৰ নামপল্লীৰ ৰসায়নিক দ্ৰব্য মজুত ৰখা এটা গুডামত সংঘটিত হোৱা ভয়ংকৰ অগ্নিকাণ্ডত ৯ জন লোকৰ মৃত্যু হৈছে।
অগ্নিকাণ্ডস্থলীৰ পৰা এই পৰ্যন্ত ২১ জন লোকক উদ্ধাৰ কৰা হৈছে। ইয়াৰে ১০ জনক অচেতন অৱস্থাত অট্টালিকাৰ পৰা উলিয়াই অনা হৈছে বুলি আৰক্ষীয়ে সদৰী কৰিছে।
এই ঘটনাত আহত তিনিজন লোকক চিকিৎসালয়লৈ প্ৰেৰণ কৰা হয়। সম্প্ৰতি অৱশ্যে জুই নিয়ন্ত্ৰণলৈ অনা হৈছে আৰু উদ্ধাৰ অভিযান অব্যাহত আছে বুলিও জানিবলৈ দিয়ে আৰক্ষীয়ে।
প্ৰকাশিত খবৰ অনুসৰি, অগ্নিকাণ্ড সংঘটিত হোৱা ৰসায়নিক দ্ৰব্যৰ গুদামটো এটা অট্টালিকাৰ তলৰ মহলাত আছিল। গুদামটোত জুইৰ সূত্ৰপাত হোৱাৰ পিছতে এই জুই আন মহলা সমূহলৈ বিয়পি পৰে।
প্ৰত্যক্ষদৰ্শীৰ মতে, ৰাসায়নিক পদাৰ্থসমূহত জুই লগাৰ ফলতে এই অগ্নিকাণ্ডৰ সূত্ৰপাত হৈছিল। এই জুই পানীৰে নুমুৱাৰ চেষ্টা চলোৱা হৈছিল যদিও এই চেষ্টা বিফল হয়।
ইয়াৰ পিছতে অগ্নিনিৰ্বাপক বাহিনীক ঘটনা সম্পৰ্কে খবৰ দিয়া হয় আৰু কেইবাখনো অগ্নিনিৰ্বাপক বাহিনীৰ বাহন ঘটনাস্থলীত উপস্থিত হৈ জুই নিৰ্বাপণ কৰে।
অগ্নিকাণ্ডৰ কাৰণ আৰু ক্ষতিৰ পৰিসৰ এতিয়াও আনুষ্ঠানিকভাৱে জানিব পৰা হোৱা নাই। অৱশ্যে, প্ৰাথমিক তদন্তত, গাড়ী মেৰামতিৰ সময়ত সৃষ্টি হোৱা স্ফুলিংগৰ ফলত এই অগ্নিকাণ্ড সংঘটিত হয় বুলি সন্দেহ কৰা হৈছে।
