কিছুদিন পূৰ্বে চৰ্চালৈ আহিছিল এখন ৰেষ্টুৰেন্ট। ৰেষ্টুৰেন্টখনত কুকুৰাৰ মাংসৰ লগত ওলাইছিল এটা এন্দুৰ। মুম্বাইৰ এখন দামী ৰেষ্টুৰেন্টত সংঘটিত হৈছিল এই ঘটনা। সামাজিক মাধ্যমত ভাইৰেল হৈ পৰিছিল এই খবৰ।
এইবাৰ পোহৰলৈ আহিছে চিঙৰাৰ মাজত জেঠী ওলোৱাৰ খবৰ। এখন বিখ্যাত মিঠাইৰ দোকানৰ চিঙৰাত উলাইছে জেঠী।
উত্তৰ প্ৰদেশৰ হাপুৰ জিলাৰ পিলখুৱা অঞ্চল হস্ততাঁত সামগ্ৰীৰ বাবে বিখ্যাত। তাৰেই স্থানীয় বাসিন্দা অজয় কুমাৰে চণ্ডী ৰোডৰ এখন বিখ্যাত মিঠাইৰ দোকানৰ পৰা কিনিছিল চিঙৰা।
অজয়বাবুৱে কয় যে পূজাৰ উপলক্ষে ঘৰলৈ আত্মীয়-স্বজন আহিছিল। তেওঁলোকৰ বাবে অজয় বাবুৱে চণ্ডী ৰোডৰ বিখ্যাত মিঠাইৰ দোকানৰ পৰা চিঙৰা কিনি ঘৰলৈ লৈ আহিছিল। তাৰ পিছত আত্মীয়ৰ লগত বহি এমুকোৰা মুখত ভৰাওতেও ওলাল বিখ্যাত মিঠাই দোকানৰ চিঙৰাৰ আচল স্বৰূপ।
অভিযোগ অনুসৰি অজয় বাবুৱে কামোৰা চিঙৰাটোৰ ভিতৰত এটা মৃত জেঠী উদ্ধাৰ হয়।
চিঙৰাৰ ভিতৰত মৃত জেঠী ওলোৱা খবৰটো ভাইৰেল হ’বলৈ বেছি সময় নালাগিল। ইয়াৰ লগতে আৰক্ষীকো খবৰ দিয়ে অজয় বাবুৱে। ইতিমধ্যে আৰক্ষীয়ে খাদ্য সুৰক্ষাৰ নিয়মৰ অধীনত তদন্ত আৰম্ভ কৰিছে।
অৱশ্যে মিঠাইৰ দোকানখনৰ স্বত্বাধিকাৰী পাকেশ টোমাৰে চিঙৰাৰ ভিতৰত জেঠী ওলোৱাৰ অভিযোগ অস্বীকাৰ কৰে। অভিযোগবোৰ ভিত্তিহীন বুলি দাবী কৰি তেওঁ এই ঘটনাৰ তদন্তৰ বাবে সাজু বুলিও কয়।
ইফালে আৰক্ষীৰ লগতে উত্তৰ প্ৰদেশৰ খাদ্য সুৰক্ষা বিভাগেও এই ঘটনাৰ তদন্ত অব্যাহত ৰাখিছে। খাদ্য সুৰক্ষা বিভাগে জনাইছে যে চিঙৰাৰ ভিতৰত জেঠী থকাৰ অভিযোগ প্ৰমাণিত হ’লে কঠোৰ ব্যৱস্থা গ্ৰহণ কৰা হ’ব।
বিভাগটোৰ বিষয়াসকলেও দোকানখন পৰিদৰ্শন কৰি আৰু মিঠা আৰু নিমখীয়া খাদ্যৰ নমুনা পৰীক্ষাগাৰলৈ প্ৰেৰণ কৰিব বুলি জানিবলৈ দিয়ে।
