অসমত বিজেপি চৰকাৰে সামাজিক অনুষ্ঠানসমূহ, যেনে- বিহু, খেল-ধেমালি, সাংস্কৃতিক শোভাযাত্ৰা, থিয়েটাৰ, বাটৰ নাট, ৰাজনৈতিক সভা-সমিতি আদি অনুষ্ঠিত কৰাৰ বাবে অনুমতি আবেদন মাচুল ধাৰ্য কৰি ৰাইজক মাধমাৰ সোধাইছে।
এই অভিযোগ কৰিছে অসম তৃণমূল কংগ্ৰেছৰ সভাপতি ৰিপুণ বৰাই। এক সংবাদ মেলযোগে আজি নিজৰ প্ৰতিক্ৰিয়া প্ৰকাশ কৰি ৰিপুণ বৰাই অসম চৰকাৰক ধিক্কাৰ জনায়। ৰাজ্যৰ শাসকীয় বিজেপি চৰকাৰক এখন মিছলীয়াৰ চৰকাৰ আখ্যা দিয়ে বৰাই৷
ৰিপুণ বৰাই কয়, “কেন্দ্ৰত বিজেপিয়ে ইডি আৰু চিবিআইক কিদৰে অপব্যৱহাৰ কৰিছে সেয়া সকলোৰে জ্ঞাত৷ এইবাৰ অসমত আইন শৃংখলা, শান্তি ৰক্ষা কৰা পুলিচক হিমন্ত বিশ্ব শৰ্মাৰ চৰকাৰে ব্যৱহাৰ কৰিব কৰ সংগ্ৰহ কৰিবলৈ।”
“এইবাৰ অসমত পুলিচে লাঠি ঘূৰাই ঘূৰাই, ভয় ভাবুকিৰে বিহু কমিটি, ৰাজনৈতিক দলৰ পৰা সংগ্ৰহ কৰিব মাচুল। চৰকাৰ আজি দেউলীয়া, ধাৰত পোত খাই আছে বিজেপি চৰকাৰ৷ আজি চৰকাৰৰ ৰাজকোষ উদং।”— বৰাই লগতে কয়।
ৰাজকোষ টনকিয়াল কৰিবলৈ অসমত বিজেপি চৰকাৰে সামাজিক অনুষ্ঠানসমূহৰ নামত কৰৰ বোজাৰে ৰাইজক টেটুচেপা দি গণতান্ত্ৰিক অধিকাৰ খৰ্ব কৰিব বিচাৰিছে বুলি অভিযোগ কৰে ৰিপুণ বৰাই।
ইফালে অমৃত কলহ যাত্ৰাৰ প্ৰসঙ্গ উত্থাপন কৰি বৰাই কয় যে ধাৰত পোত খাই থকা বিজেপি চৰকাৰে আজি অমৃত কলহ যাত্ৰা কৰিছে। এই প্ৰসঙ্গৰে বৰাই মুখ্যমন্ত্ৰী হিমন্ত বিশ্ব শৰ্মাক কটাক্ষ কৰি এই সকলো কৰৰ নাম “অমৃত কৰ” কৰি দিবলৈ অনুৰোধ জনায়।
মেলে-মিটিঙে মৃখ্যমন্ত্ৰী হিমন্ত বিশ্ব শৰ্মা চৰকাৰে কোৱা জাতি, মাটি আৰু ভেটি গুচি আজি মামা, মামীৰ মাটি হ’ল বুলি কটাক্ষ কৰে অসম তৃণমূল কংগ্ৰেছৰ সভাপতি বৰাই। এইখন চৰকাৰৰ “ঘৰত ঢকুৱাৰ বেৰ আৰু বাহিৰত বৰ চুৰিয়াৰ ফেৰ” সদৃশ অৱস্থা বুলিও বৰাই তীৰ্যক বাক্যবাণ নিক্ষেপ কৰে।
“হিমন্ত বিশ্ব শৰ্মাই ছত্তীশগড়ত নিৰ্বাচনী প্ৰচাৰত ৰন্ধন গেছৰ মূল্য ৫০০ কৰিব বুলি প্ৰতিশ্ৰুতি দিছে কিন্তু অসমত ৰন্ধন গেছৰ মূল্য ৯৫০ টকা, ইয়াতকৈ ডাঙৰ মিথ্যাচাৰ আৰু কিবা আছেনে?”— মুখ্যমন্ত্ৰী হিমন্ত বিশ্ব শৰ্মাক আক্ৰমণ কৰি এই প্ৰশ্ন ৰিপুণ বৰাৰ।
তেওঁ লগতে ৰাজ্যবাসীক দল, জাতি, ধৰ্ম বৰ্ণ নিৰ্বিশেষে একেলগে চৰকাৰৰ বিৰুদ্ধে প্ৰতিবাদত থিয় দিবলৈ আহ্বান জনায়। ইফালে ইণ্ডিয়া এলায়েঞ্চ গঠন হোৱাৰ পাছত অসমৰ ৰাইজৰ সাহস বাঢ়িছে আৰু ২০২৪ ত এই মিথ্যাচাৰ আৰু অগণতান্ত্ৰিক চৰকাৰক জনতাই উচিত প্ৰত্যুত্তৰ দিব বুলিও আশা প্ৰকাশ কৰে বৰাই।
