পাকিস্তানত সংঘটিত হৈছে এক পৈশাচিক কাণ্ড। অপহৰণকাৰীয়ে তিনি ভাতৃ-ভগ্নীক অপহৰণ কৰি ৭ বছৰীয়া এটি শিশুৰ সমুখত শিশুটিৰ ভাতৃ আৰু ভগ্নীক হত্যা কৰি তেওঁলোকৰ মাংস দৰগাহত বিতৰণ কৰে।
ইটোৰ পিছত সিটোকৈ শিশুক অপহৰণ কৰি হত্যা কৰি মাংস খাইছিল অপহৰণকাৰীয়ে। শিশুৰ মৃতদেহৰ মাংস ৰান্ধি স্থানীয় দৰগাহত বিতৰণ কৰিলে পৈশাচিক ব্যক্তিয়ে।
বৃহস্পতিবাৰে পাকিস্তান আৰক্ষীয়ে এই ভয়ংকৰ অভিযোগত পঞ্জাৱৰ মুজাফৰগড়ত এজন ব্যক্তিক গ্ৰেপ্তাৰ কৰিছে।
পাকিস্তানী সংবাদ মাধ্যমৰ বাতৰি অনুসৰি, পাঁচ দিন পূৰ্বে মুজাফফৰগড়ৰ খান গড় অঞ্চলৰ পৰা তিনিটা শিশু নিৰুদ্দেশ হৈছিল। তেওঁলোকক বিচাৰি ফুৰাৰ সময়তে আৰক্ষীয়ে এই বিকাৰগ্ৰস্ত ব্যক্তিজনক উদ্ধাৰ কৰে।
স্থানীয় আৰক্ষীয়ে দাবী কৰিছে যে অভিযুক্তই নিৰুদ্দেশ হোৱা তিনিটা শিশুক অপহৰণ কৰিছিল। তেওঁ তিনিটা শিশুৰ ভিতৰত দুটাক নিৰ্মমভাৱে হত্যা কৰি তেওঁলোকৰ মাংস ভক্ষণ কৰে।
অৱশ্যে আলী হাছান নামৰ এটি সাত বছৰীয়া শিশুক আৰক্ষীয়ে জীৱিত অৱস্থাত উদ্ধাৰ কৰে। আৰক্ষীয়ে জনোৱা মতে, আলী হাছান জীয়াই আছে যদিও মানসিক সমস্যাত ভুগিছে। তেওঁৰ ভাতৃ আব্দুল্লা আৰু তেওঁৰ ভগ্নী হাফছাক আলী হাছানৰ সন্মুখত হত্যা কৰি তেওঁলোকৰ মৃতদেহ কাটি ৰান্ধিছিল। আব্দুল্লাৰ বয়স আছিল তিনি বছৰ, আৰু হাফছাৰ বয়স আছিল ডেৰ বছৰ।
পাকিস্তানী সংবাদ মাধ্যমৰ বাতৰি অনুসৰি লোকজনে কেৱল শিশুকেইটাক হত্যা কৰি নিজে মাংস খোৱাই নহয়, মুজাফ্ফৰগড়ৰ স্থানীয় দৰগাহতো মাংস বিতৰণ কৰে।
লোকজনক গ্ৰেপ্তাৰ কৰাৰ পিছত মুজাফ্ফৰগড় আৰক্ষীয়ে কাষৰীয়া পথাৰ এখনৰ পৰা আব্দুল্লাৰ মৃতদেহ আৰু অংগচ্ছেদ কৰিবলৈ ব্যৱহাৰ কৰা দাখন উদ্ধাৰ কৰে। অৱশ্যে এই পৰ্যন্ত হাফছাৰ মৃতদেহ বিচাৰি পোৱা নাই। এতিয়াও তেওঁৰ সন্ধান চলি আছে।
ইফালে পাকিস্তানী আৰক্ষীৰ এগৰাকী মুখপাত্ৰই জনোৱা মতে, লোকজনক গ্ৰেপ্তাৰ কৰাৰ সময়ত স্থানীয় বাসিন্দাসকলে তেওঁক তীব্ৰ প্ৰহাৰ কৰে। সম্প্ৰতি সংকটজনক আৰু অচেতন অৱস্থাত চিকিৎসালয়ত ভৰ্তি হৈ আছে। চেতনা ঘূৰাই পালে তেওঁক জেৰা কৰা হ’ব। এই নৃশংস হত্যাকাণ্ডৰ বিষয়ে তেওঁৰ পৰা অধিক তথ্য লাভ কৰাৰ আশা কৰিছে আৰক্ষীয়ে।
ইয়াৰ পূৰ্বেও তেওঁ এনে ঘটনা সংঘটিত কৰিব পাৰে বুলি সন্দেহ কৰিছে আৰক্ষীয়ে। আব্দুল্লাহ-হাফছাদৰ পিতৃ ফায়াজৰ অভিযোগৰ ভিত্তিত আৰক্ষীয়ে অভিযুক্তৰ বিৰুদ্ধে হত্যা আৰু সন্ত্ৰাসবাদৰ গোচৰ ৰুজু কৰে। মৃত শিশুকেইটাৰ পৰিয়ালে অভিযুক্তৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে।
