দক্ষিণ আফ্ৰিকা ভ্ৰমণৰত ভাৰতীয় দলে কাইলৈৰ পৰা ঘৰুৱা দলটোৰ বিপক্ষে এদিনীয়া শৃংখলাত অৱতীৰ্ণ হ’ব। এই শৃংখলাৰ পিছতে দুয়োটা দলৰ মাজত ২৬ ডিচেম্বৰৰ পৰা আৰম্ভ হ’ব দুখন টেষ্টৰ শৃংখলা।
পিছে ইয়াৰ পূৰ্বে অথন্তৰৰ সন্মুখীন হৈছে ভাৰতীয় শিবিৰ। আঘাতৰ সমস্যাই চিন্তাত পেলাইছে ভাৰতীয় দলক। দলৰ তাৰকা পেচাৰ মহম্মদ ছামি আগন্তুক টেষ্ট শৃংখলাত নাথাকিব দলত।
আঘাতৰ বাবে অভিজ্ঞ তাৰকাগৰাকী টেষ্ট শৃংখলাৰ পৰা বাহিৰ হৈছে। শেহতীয়াকৈ ভাৰতত অনুষ্ঠিত বিশ্বকাপত দুৰন্ত প্ৰদৰ্শন দাঙি ধৰা ছামি দক্ষিণ আফ্ৰিকাৰ বাউঞ্চী উইকেটত ভাৰতৰ প্ৰধান অস্ত্ৰ হ’ব বুলি আশা কৰা হৈছিল।
কিন্তু ভাৰতীয় ক্ৰিকেটৰ সৰ্বোচ্চ সংস্থা বিচিচিআয়ে এক প্ৰেছ বিজ্ঞপ্তি যোগে সদৰী কৰা মতে, বিচিচিআইৰ মেডিকেল টিমে ছামিক ফিট হিচাপে ঘোষণা কৰা নাই। তেনেস্থলত দুখন মেচৰ দ্বিপাক্ষিক টেষ্ট শৃংখলাটোত অংশ ল’ব নোৱাৰিব ছামিয়ে।
ইফালে কাইলৈৰ পৰা আৰম্ভ হ’বলগীয়া এদিনীয়া শৃংখলাৰ পৰা নাম প্ৰত্যাহাৰ কৰিছে পেচাৰ দীপক চাহাৰে। পাৰিবাৰিক চিকিৎসাজনিত জৰুৰীকালীন অৱস্থাৰ বাবে তিনিখনীয়া মেচৰ শৃংখলাটোত উপলব্ধ নহ’ব চাহাৰ।
চাহাৰৰ স্থানত দললৈ আমন্ত্ৰিত হৈছে এখন নতুন মুখ। ভাৰতীয় দল নিৰ্বাচকে প্ৰথমবাৰৰ বাবে ভাৰতীয় দলত অন্তৰ্ভুক্ত কৰিছে যুৱ পেচাৰ আকাশ দীপক। লক্ষণীয় ভাৱে এদিনীয়া শৃংখলাত প্ৰথমখন মেচৰ পিছত দলত নাথাকিব শ্ৰেয়স আয়াৰ।
প্ৰথমখন এদিনীয়াৰ পিছতে আয়াৰে টেষ্ট শৃংখলাৰ বাবে প্ৰস্তুতি চলোৱাৰ উদ্দেশ্যে টেষ্ট দলত যোগদান কৰিব। তদুপৰি এই শৃংখলাটোত দলৰ মুখ্য প্ৰশিক্ষক ৰাহুল দ্ৰাবিড়ৰ লগতে আনকেইগৰাকী প্ৰশিক্ষকো দলত নাথাকিব।
টেষ্টৰ প্ৰস্তুতিৰ উদ্দেশ্যে মুখ্য প্ৰশিক্ষক ৰাহুল দ্ৰাবিড়, বেটিং প্ৰশিক্ষক এম বিক্ৰম ৰাথৌড়, বলিং প্ৰশিক্ষক পৰস মহামব্ৰেই আৰু ফিল্ডিং প্ৰশিক্ষক টি দিলিপে টেষ্ট দলৰ সৈতে যোগদান কৰিব।
এনে পৰিস্থিতিত এদিনীয়া দলটোৰ লগত থাকিব ইণ্ডিয়া এ- ৰ প্ৰশিক্ষক ক্ৰমে বেটিং প্ৰশিক্ষক সীতাংশু কোটক, বলিং প্ৰশিক্ষক ৰাজীৱ দত্ত আৰু ফিল্ডিং প্ৰশিক্ষক অজয় ৰাত্ৰা।
