ক্ষমতাত মত্ত হৈ গণতন্ত্ৰক পদাঘাত কৰিছে ভাৰতীয় জনতা পাৰ্টিয়ে। উচ্চ সদন আৰু নিম্ন সদনৰ পৰা হোৰাহোৰে বিৰোধী সাংসদক নিলম্বন কৰিছে বিজেপিয়ে।
সোমবাৰলৈকে দুই সদনত মুঠতে ৯২ জন বিৰোধী সাংসদক নিলম্বন কৰাৰ পিছত লোকসভাই আজি পুনৰ ৪৯ জন বিৰোধী সদস্যক নিলম্বন কৰে। ইয়াৰ পিছত আজি শাসকীয় বিজেপিয়ে সংসদৰ কোনো এখন সদনত প্ৰায় কোনো বিৰোধিতাৰ সন্মুখীন নহয়।
বিৰোধীশূন্যভাবেই লোকসভাত ভাৰতীয় ন্যায় সংহিতা, ভাৰতীয় নাগৰিক সুৰক্ষা সংহিতা আৰু ভাৰতীয় সাখ্যা আইন বিধেয়ক উত্থাপন কৰিছে বিজেপিয়ে। বৰ্তমানৰ ফৌজদাৰী বিধি আইন, ১৮৯৮, ভাৰতীয় দণ্ডবিধি, ১৮৬০ আৰু ভাৰতীয় প্ৰমাণ আইন, ১৮৭২ৰ ঠাইত এই তিনিখন নতুন আইন প্ৰস্তাৱ কৰা হৈছে। উল্লেখযোগ্য যে বৰ্তমান ৯৫ জন সাংসদক চলিত অধিৱেশনৰ বাকী সময়ছোৱাৰ বাবে লোকসভাৰ পৰা নিলম্বিত কৰা হৈছে।
দুই সদনত মুঠ ১৪১ গৰাকী বিৰোধী সাংসদক নিলম্বন কৰাৰ পাছত এই তিনিখন বিধেয়ক দাখিল কৰাৰ তীব্ৰ প্ৰতিবাদ কৰিছে বিৰোধীয়ে। বিৰোধীৰ সকলো কণ্ঠ দমন কৰি সকলো গুৰুত্বপূৰ্ণ বিধেয়ক সংসদত কোনো বিতৰ্ক নোহোৱাকৈ গৃহীত কৰাৰ চেষ্টা চলাইছে বিজেপি চৰকাৰে।
মঙলবাৰে সংসদৰ পৰা নিলম্বিত হোৱা কংগ্ৰেছ সাংসদ মনীষ তিৱাৰীয়ে নতুন ফৌজদাৰী আইন বিধেয়ক সন্দৰ্ভত কয় যে “এইদৰেই বিজেপয়ে এই দেশখনক আৰক্ষী ৰাষ্ট্ৰলৈ ৰূপান্তৰিত কৰিব পৰা আটাইতকৈ কঠোৰ আইন প্ৰণয়নৰ কাঠামো সৃষ্টি কৰিছে।”
কংগ্ৰেছ নেতা ৰনদীপ সিং সুৰজেৱালাই কয়, ‘বিজেপিয়ে এই তিনিখন বিধেয়ক সম্পৰ্কে আলোচনা কৰিব নিবিচাৰে। এই কেইখন বিধেয়ক গৃহীত কৰি নিজৰ ক্ষমতা বৃদ্ধিৰে সকলো বাধা দূৰ কৰাৰ চেষ্টা চলোৱা হৈছে।
ইয়াৰ পূৰ্বে আগষ্ট মাহত লোকসভাত উত্থাপন কৰা হৈছিল এই তিনিখন বিধেয়ক। পিছত এই তিনিখন বিধেয়ক কিছু সংশোধনীৰ অন্তত মঙলবাৰে বিয়লি পুনৰ দাখিল কৰা হয়। নতুন বিধেয়ক তিনিখনৰ নাম হৈছে ভাৰতীয় ন্যায় (দ্বিতীয়) সংহিতা, ২০২৩, ভাৰতীয় নাগৰিক সুৰক্ষা (দ্বিতীয়) সংহিতা, ২০২৩ আৰু ভাৰতীয় সাখ্যা (দ্বিতীয়) বিধেয়ক, ২০২৩।
