আমেৰিকা যুক্তৰাষ্ট্ৰৰ ৰাষ্ট্ৰপতি ড’নাল্ড ট্ৰাম্পৰ বিৰুদ্ধে ডেম’ক্ৰেট আৰু ৰিপাব্লিকান উভয় দলকে একত্ৰিত হ’বলৈ আহ্বান জনাইছে বাৰ্নি ছেণ্ডাৰ্ছে। ডেভিদ জে হেৰিছ জুনিয়ৰৰ এক ছ’চিয়েল মিডিয়া প’ষ্টত উল্লেখ কৰা অনুসৰি, দেশখনৰ জনসাধাৰণ ‘ট্ৰাম্পবাদ’ আৰু স্বাস্থ্যসেৱা ব্যৱস্থা ধ্বংস কৰিব বিচৰা প্ৰশাসনক লৈ অতিষ্ঠ হৈ পৰিছে বুলি ছেণ্ডাৰ্ছে মন্তব্য কৰিছে। নিজৰ বাৰ্তাত বাৰ্ণী ছেণ্ডাৰ্ছে কয়, “সমগ্ৰ দেশৰ মানুহ এতিয়া ট্ৰাম্পবাদক লৈ অতিষ্ঠ আৰু ক্লান্ত হৈ পৰিছে। নিজৰ স্বাস্থ্যসেৱা ধ্বংস কৰিব বিচৰা এখন প্ৰশাসনক লৈ তেওঁলোক অতিষ্ঠ। ডেম’ক্ৰেট আৰু ৰিপাব্লিকানসকললৈ মোৰ বাৰ্তা এয়াই যে আহক আমি সকলোৱে একেলগে থিয় দিওঁ আৰু ট্ৰাম্পক স্পষ্টকৈ কওঁ যে আমি তেওঁৰ এই ধ্বংসলীলা মানি নলওঁ।”
ইয়াৰ পূৰ্বে যোৱা ২৭ ছেপ্টেম্বৰত নিজৰ এক ছ’চিয়েল মিডিয়া প’ষ্টযোগে বাৰ্নি ছেণ্ডাৰ্ছে ড’নাল্ড ট্ৰাম্পক আমেৰিকাৰ ইতিহাসৰ ‘আটাইতকৈ বিপজ্জনক ৰাষ্ট্ৰপতি’ বুলি অভিহিত কৰিছিল আৰু তেওঁৰ ভয়াৱহ নীতিসমূহ ওফৰাই পেলাবলৈ ডেম’ক্ৰেটসকলক যথাসম্ভৱ সকলো পদক্ষেপ গ্ৰহণ কৰিবলৈ আহ্বান জনাইছিল। অৱশ্যে কেৱল ট্ৰাম্পক পৰাস্ত কৰাটোৱেই যথেষ্ট নহয় বুলি উল্লেখ কৰি তেওঁ কয় যে দুৰ্দশাগ্ৰস্ত আমেৰিকান জনসাধাৰণে নিজৰ জীৱনত এক অৰ্থপূৰ্ণ পৰিৱৰ্তন আনিব পৰা শ্ৰমিক-বান্ধৱ কাৰ্যসূচী বিচাৰে। চহকী শ্ৰেণীক অধিক চহকী কৰা পুৰণি ব্যৱস্থাটোৰ বিৰুদ্ধে গৈ ডেম’ক্ৰেটসকলে অভিজাততন্ত্র, কৰ্প’ৰেট লোভ আৰু দুৰ্নীতিগ্ৰস্ত নিৰ্বাচনী পুঁজি ব্যৱস্থাৰ বিৰুদ্ধে যুঁজ দিয়াৰ সাহস গোটাব লাগিব বুলি তেওঁ মন্তব্য কৰে।
গণতন্ত্ৰৰ ওপৰত জনসাধাৰণৰ আস্থা পুনৰ ঘূৰাই আনিবলৈ আৰু চৰকাৰে কেৱল ধনকুবেৰ শ্ৰেণীৰ বাবেই নহয়, সাধাৰণ শ্ৰমিক পৰিয়ালৰ বাবেও কাম কৰিব পাৰে বুলি বিশ্বাস জন্মাবলৈ ডেম’ক্ৰেটসকলে ক্ষমতা ঘূৰাই পালে কেইটামান মূল কাম কৰিবই লাগিব বুলি ছেণ্ডাৰ্ছে উল্লেখ কৰে। ইয়াৰ অধীনত দেশৰ প্ৰতিজন ব্যক্তিৰ বাবে স্বাস্থ্যসেৱাক এক মানৱ অধিকাৰ হিচাপে সুনিশ্চিত কৰি সকলোৰে বাবে ‘মেডিকেয়াৰ’ গৃহীত কৰা, শ্ৰমিকৰ নূন্যতম মজুৰি প্ৰতি ঘণ্টাত ২০ ডলাৰলৈ বৃদ্ধি কৰা আৰু শ্ৰমিকসকলে যাতে সহজেই ইউনিয়নত যোগদান কৰিব পাৰে তাৰ বাবে আইন প্ৰণয়ন কৰাৰ ওপৰত তেওঁ গুৰুত্ব আৰোপ কৰে। লগতে ধনকুবেৰ শ্ৰেণী আৰু বৃহৎ লাভজনক কৰ্প’ৰেট প্ৰতিষ্ঠানসমূহৰ ওপৰত কৰ বৃদ্ধি কৰা, নিম্ন আয়ৰ আৰু সুলভ মূল্যৰ ৭০ লাখ বাসগৃহ নিৰ্মাণ কৰি গৃহ নিৰ্মাণৰ ব্যয় হ্ৰাস কৰা আৰু চৰকাৰী মহাবিদ্যালয় তথা বিশ্ববিদ্যালয়সমূহত বিনামূলীয়া শিক্ষাদানৰ ব্যৱস্থা কৰাৰ বাবেও তেওঁ আহ্বান জনায়।
ইয়াৰ উপৰি নিৰ্বাচনৰ পৰা ধনকুবেৰৰ দ্বাৰা পুঁজিপ্ৰাপ্ত ‘ছুপাৰ পি এ চি’সমূহক আঁতৰোৱা আৰু জীৱাশ্ম ইন্ধনৰ পৰিৱৰ্তে শক্তি দক্ষতা তথা বহনক্ষম শক্তিৰ ব্যৱহাৰৰ জৰিয়তে লাখ লাখ নতুন সংস্থাপন সৃষ্টি কৰাৰ সপক্ষে ছেণ্ডাৰ্ছে মত পোষণ কৰে। সমান্তৰালভাৱে কৃত্ৰিম বুদ্ধিমত্তা অৰ্থাৎ এ আইৰ অস্তিত্বগত আৰু অৰ্থনৈতিক ভাবুকিৰ পৰা আমেৰিকান জনসাধাৰণক সুৰক্ষা প্ৰদান কৰা, সামৰিক ব্যয় হ্ৰাস কৰা, ‘অন্তহীন যুদ্ধ’সমূহৰ অৱসান ঘটোৱা আৰু ইজৰাইললৈ সকলো ধৰণৰ মাৰ্কিন সামৰিক সাহায্য বন্ধ কৰাৰ দৰে বলিষ্ঠ পদক্ষেপ গ্ৰহণ কৰি তৃণমূল পৰ্যায়ৰ প্ৰগতিশীল আন্দোলনক অধিক সম্প্ৰসাৰিত কৰিবলৈ বাৰ্নি ছেণ্ডাৰ্ছে আহ্বান জনাইছে।
