ৰাজ্যত অব্যাহত আছে ড্ৰাগছ বিৰোধী অভিযান। এনে এক সফল অভিযানত আজি কাছাৰ জিলাত জব্দ হৈছে বৃ্হৎ পৰিমাণৰ ড্ৰাগছ।
অসম আৰক্ষী আৰু সীমান্ত সুৰক্ষা বাহিনী (BSF)ৰ এটা যুটীয়া দলে নিৰ্দিষ্ট সূত্ৰৰ ভিত্তিত কাছাৰ জিলাত জব্দ কৰে ড্ৰাগছখিনি।
আন্তঃৰাষ্ট্ৰীয় ক’লা বজাৰত জব্দকৃত ড্ৰাগছখিনিৰ মূল্য আনুমানিক ১০ কোটি টকা হ’ব বুলি আৰক্ষীয়ে জানিবলৈ দিয়ে।
জব্দকৃত ড্ৰাগছখিনিক য়াবা টেবলেট বুলি চিনাক্ত কৰা হৈছে। চুবুৰীয়া ৰাজ্যৰ পৰা অসমত প্ৰৱেশ কৰা এখন বাহন তালাচী চলাই জব্দ কৰা হয় নিচাজাতীয় সামগ্ৰীখিনি।
অভিযানকাৰী অসম আৰক্ষী আৰু সীমান্ত সুৰক্ষা বাহিনী (BSF)ৰ যুটীয়া দলটোৱে কাছাৰ জিলাৰ শিলচৰৰ চলচাপৰা অঞ্চলৰ পৰা জব্দ কৰে ড্ৰাগছখিনি।
এই ড্ৰাগছ সৰবৰাহত জড়িত ৫ জন লোকক অভিযানকাৰী দলটোৱে গ্ৰেপ্তাৰ কৰিছে। এই সন্দৰ্ভত অধিক তদন্ত অব্যাহত আছে বুলি জানিবলৈ দিছে আৰক্ষীয়ে।
ৰাজ্যৰ মুখ্যমন্ত্ৰী হিমন্ত বিশ্ব শৰ্মাই সামাজিক মাধ্যমত এই বিষয়ে সদৰী কৰি এই অভিযানৰ বাবে অসম আৰক্ষীক অভিনন্দন জনায়।
