তেলেংগানাৰ নলগণ্ডা জিলাত দেওবাৰে নিশা সংঘটত হয় এক মৰ্মান্তিক ঘটনা। দুটাকৈ পৃথক দুৰ্ঘটনাত জিলাখনত একেটা পৰিয়ালৰ চাৰিজনকে ধৰি ৫জন লোকৰ মৃত্যু হয়।
ঘন কুঁৱলীৰ ফলতেই জিলাখনৰ মাজেৰে যোৱা ১৮৬ নং ৰাষ্ট্ৰীয় ঘাইপথত সংঘটিত হয় পথ দুৰ্ঘটনা দুটা।
আৰক্ষীৰ তথ্য অনুসৰি দেওবাৰে নিশা ভেম্পাহাডত হোৱা প্ৰথমটো দুৰ্ঘটনাত এজন পথচাৰীকে ধৰি দুজন লোক নিহত হয়।
নাগাৰাজু (২৮) নামৰ এজন যুৱকে বাইকেৰে গৈ থকা অৱস্থাত কুঁৱলীৰ বাবে একো মনিব নোৱাৰি খোজকাঢ়ি গৈ থকা কেশৱ ৰামাৱত(১৯)ক খুন্দা মাৰে।
এই দুৰ্ঘটনাত দুয়োৰে থিতাতে মৃত্যু হয়। ইফালে দুৰ্ঘটনাৰ বিষয়ে জানিব পাৰি কেশৱৰ পৰিয়ালে এখন বাহনত ঘটনাস্থলী অভিমুখে যাত্ৰা কৰে।
কিন্তু মৰ্মান্তিকভাৱে পাৰ্বতীপুৰমৰ সমীপত কুঁৱলীৰ ফলত তেওঁলোকৰ বাহনখনে এখন তেল টেংকাৰৰ সৈতে খুন্দা মাৰে।
এই দুৰ্ঘটনাত বাহনখনত যাত্ৰা কৰা ৭ জন লোকৰ ভিতৰত তিনিজনৰ থিতাতে মৃত্যু হোৱাৰ বিপৰীতে আন চাৰিজনৰ অৱস্থা সংকটজনক।
আৰক্ষীয়ে জানিবলৈ দিয়া মতে, মৃত্যু হোৱা তিনিজনক ক্ৰমে পাণ্ডু ৰামাৱত (৪০), গণ্যা ৰামাৱত (৪০) আৰু বুজ্জী ৰামাৱত(৩৮) বুলি চিনাক্ত কৰা হৈছে।
মৃত্যু হোৱা আটাইকেইজন লোক মল্লেৱনী কুন্তা থাণ্ডা নামৰ এখন গাঁৱৰ গাঁৱৰ। তেওঁলোকৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰা বুলি আৰক্ষীয়ে জানিবলৈ দিয়ে।
