বিশ্বজুৰি কাৰ্যকৰী, পুনৰ্নবীকৰণযোগ্য আৰু পৰিৱেশ অনুকূল শক্তিৰ সন্ধান চলিছে। মানুহে ক্ৰমান্বয়ে পৰম্পৰাগত শক্তিৰ উৎসৰ ব্যৱহাৰৰ পৰা আঁতৰি আহিছে। তেনে এক পৰিষ্কাৰ ইন্ধনৰ উৎস হ’ল বায়’ডিজেল। বায়’ডিজেল জৈৱিক সামগ্ৰী যেনে খাব পৰা আৰু অখাদ্য তেল, পশুৰ চৰ্বি আৰু ৰেষ্টুৰেণ্টৰ পেলনীয়া গ্রীজৰ পৰা তৈয়াৰ কৰা হয়। ই পুনৰ্নবীকৰণযোগ্য আৰু পৰিৱেশ অনুকূল।
অৱশ্যে বায়’ডিজেলৰ মূল্য অতি বেছি। সেয়েহে ইয়াৰ গ্ৰহণযোগ্যতাক লৈ প্ৰশ্ন উত্থাপন হৈছে। বিজ্ঞানীসকলে কৈছে যে এই সমস্যাৰ সমাধান হ’ল চিগাৰেট বা অধিক নিৰ্দিষ্টভাৱে ক’বলৈ গ’লে চিগাৰেটৰ বাট, অৰ্থাৎ ধূমপায়ীসকলে ধূমপান কৰাৰ পিছত পেলোৱা অংশটো।
এতিয়ালৈকে চিগাৰেটৰ বাটক পৰিৱেশ প্ৰদূষক হিচাপে গণ্য কৰা হৈছিল। কিন্তু, বিজ্ঞানীসকলৰ মতে, চিগাৰেটৰ পেলনীয়া টুকুৰাই বায়’ডিজেলৰ খৰচ কমোৱাত সহায় কৰিব পাৰে।
লগতে পঢ়কঃ নতুন মাইলৰ খুঁটি গঢ়াৰ পথত ইছৰো! কৃষ্ণগহ্বৰ আৰু নিউট্ৰন ষ্টাৰৰ সন্ধানত উৎক্ষেপণ হ’ব XPoSAT
পূৰ্বৰ গৱেষণাৰ পৰা দেখা গৈছে যে ট্ৰাইগ্লিচাৰাইড ট্ৰাইএচিটিনৰ দৰে ৰাসায়নিক পদাৰ্থ যোগ কৰিলে বায়’ডিজেলৰ কাৰ্যক্ষমতা বৃদ্ধি পায়। কিন্তু ট্ৰাইএচিটিন উৎপাদন পৰিৱেশৰ বাবে অত্যন্ত বিপদজনক। ইয়াত প্ৰচুৰ পৰিমাণে ৰাসায়নিক পদাৰ্থ ব্যৱহাৰ কৰা হয় আৰু বহু বিষাক্ত আৱৰ্জনা উৎপন্ন হয়।
কিন্তু লিথুৱেনিয়াৰ কাউনছ ইউনিভাৰ্চিটি অৱ টেকন’লজিৰ বিজ্ঞানীসকলে লিথুৱেনিয়ান এনাৰ্জি ইনষ্টিটিউটৰ সহযোগত চিগাৰেটৰ বাট ব্যৱহাৰ কৰি ট্ৰাইএচিটিন উৎপাদনৰ নতুন উপায় বিচাৰি উলিয়াইছে।
তেওঁলোকৰ গৱেষণাৰ বিষয়ে এটা প্ৰবন্ধ জাৰ্নেল অৱ এনালাইটিকেল এণ্ড এপ্লাইড পাইৰ’লাইছিছত প্ৰকাশ পাইছে। গৱেষণা পত্ৰখনৰ মুখ্য লেখক ছেমি ইউছেফে কয় যে, “আমাৰ গৱেষণাত আমি পুনঃব্যৱহাৰ আৰু আৱৰ্জনা ব্যৱস্থাপনাৰ সৈতে জড়িত। গতিকে আমি সদায় পেলনীয়া সামগ্ৰী বিচাৰো। চিগাৰেট তিনিটা উপাদানৰে তৈয়াৰ কৰা হয় – ধঁপাত, কাগজ আৰু চেলুল’জ এচিটেট আঁহেৰে নিৰ্মিত এটা ফিল্টাৰ। বহু সংস্থাই চিগাৰেটৰ বাট সংগ্ৰহ কৰে। গতিকে তেওঁলোকৰ পৰা এই পেলনীয়া সামগ্ৰী সংগ্ৰহ কৰাটো সহজ আছিল।”
লগতে পঢ়কঃ ভাৰতীয় আৰক্ষী সেৱাৰ পৰা পদত্যাগ লখিমপুৰৰ আৰক্ষী অধীক্ষক আনন্দ মিশ্ৰৰ
তেওঁ কয় যে পাইৰ’লাইছিছ প্ৰক্ৰিয়াত তেওঁলোকে ৬৫০, ৭০০ আৰু ৭৫০ ডিগ্ৰী চেলছিয়াছত চিগাৰেটৰ বাট তাপ দি পচাইছিল। কেইবাটাও পৰীক্ষা-নিৰীক্ষাৰ অন্তত তেওঁলোকে জানিব পাৰিলে যে ৭৫০ ডিগ্ৰী চেলছিয়াছত ৪৩% ট্ৰাইএচিটিনযুক্ত যৌগ গঠন হয়। এই যৌগটোৱেই খৰচ কমাবলৈ বায়’ডিজেলত সংযোজন হিচাপে ব্যৱহাৰ কৰিব পাৰি।
