পুৱা শুই উঠি একাপ গৰম চাহত দিয়া চুমুকে আমাৰ শৰীৰলৈ আনে যথেষ্ট উদ্যম। একেদৰে দিনটোৰ কামৰ হেঁচাই আনি দিয়া অৱসাদ দূৰীকৰণৰ প্ৰধান উপায় হ’ব পাৰে একাপ চাহ।
পিছে এই চাহকাপত যদি সামান্য পৰিমাণৰ আদা মিহলাই লোৱা হয়, তেতিয়া চাহকাপৰ সোৱাদ হৈ পৰে অনন্য। লগতে এই আদা দিয়া চাহকাপে শাৰীৰিক-মানসিক অৱসাদ আঁতৰাই দেহত নতুনকৈ প্ৰাণসঞ্চাৰ কৰে।
সমান্তৰালভাৱে আদা দিয়া চাহকাপ ব্যক্তিৰ স্বাস্থ্যৰ বাবেও যথেষ্ট উপকাৰী। এই আদা দিয়া চাহকাপে শীতকালীন ৰোগ যেনে চৰ্দি, কাহ বা ডিঙিৰ বিষ প্ৰতিৰোধ কৰাত সহায় কৰিব পাৰে।
আদা দিয়া চাহৰ এনে স্বাস্থ্য উপকাৰিতাৰ বিষয়ে জানো আহকঃ
১/ শৰীৰত প্ৰদাহ কমায়
বহু লোকে শীতকালত শৰীৰত প্ৰদাহ অৰ্থাৎ বিষ বা জ্বলা-পোৰা অনুভৱ কৰে। প্ৰদাহৰ প্ৰতিকাৰ হিচাপে পূৰ্বৰে পৰা আদা ব্যৱহাৰ কৰি অহা হৈছে। আদা দিয়া চাহকাপে প্ৰদাহজনিত সমস্যা তথা পেশী আৰু গাঁঠিৰ বিষ নিয়ন্ত্ৰণ কৰাত সহায় কৰে।
২/ ৰোগ প্ৰতিৰোধ ক্ষমতা বৃদ্ধি কৰে
ব্যক্তিৰ দেহ নিৰোগী কৰি ৰখাত দেহৰ শক্তিশালী ৰোগ প্ৰতিৰোধ ক্ষমতাৰ ভূমিকা অধিক। ডিঙিৰ বিষ, কাহ, চৰ্দি আৰু অন্যান্য সংক্ৰমণ শীতকালত যথেষ্ট সাধাৰণ। আদাত ৰোগ প্ৰতিৰোধ ক্ষমতা বৃদ্ধি কৰা গুণ থাকে যি এনে ৰোগসমূহক নিয়ন্ত্ৰণত ৰখাত সহায় কৰে।
৩/ মানসিক চাপ কমায়
আদা দিয়া চাহ কাপে শাৰীৰিক-মানসিক অৱসাদ আঁতৰাই দেহত নতুনকৈ প্ৰাণসঞ্চাৰ কৰে। আদাৰ সুগন্ধি আৰু ঔষধি গুণে মানসিক চাপ নিয়ন্ত্ৰণত সহায় কৰিব পাৰে।
৪/ হজম শক্তি উন্নত কৰে
সম্প্ৰতি মানুহৰ মাজত পূৰ্বৰ তুলনাত শাৰীৰিক কাৰ্যকলাপৰ মাত্ৰা যথেষ্ট হ্ৰাস পাইছে। সেয়ে বহু লোক সন্মুখীন হৈছে বদহজম সমস্যাৰ। আদাই বদহজম আৰু আনুষংগিক পেটৰ সমস্যা দূৰ কৰাত সহায় কৰে। ইয়াৰ উপৰিও বমিৰ সমস্যাৰ পৰা মুক্ত কৰিব পাৰে।
৫/ ওজন নিয়ন্ত্ৰণত সহায় কৰে
গৱেষণাৰ মতে, আদাই ওজন নিয়ন্ত্ৰণত গুৰুত্বপূৰ্ণ ভূমিকা পালন কৰে। গতিকে চাহত আদাৰ ব্যৱহাৰে ওজন নিয়ন্ত্ৰণত সহায় কৰিব পাৰে।
