২০১৯ চন। বিশ্বৰ আটাইতকৈ দামী ঘড়ীৰ খিতাপটো লাভ কৰিছিল চুইজাৰলেণ্ডৰ কোম্পানী পেটেক ফিলিপৰ এটা ঘড়ীয়ে। এই ঘড়ীটোৰ মূল্য আছিল ভাৰতীয় মুদ্ৰাত প্ৰায় ২২৩ কোটি। বিলাসী ঘড়ীৰ কথা আহিলে প্ৰথমে মনলৈ অহা দেশখনে হ’ল ছুইজাৰলেণ্ড। চুইজাৰলেণ্ডৰ ঘড়ী নিৰ্মাতাসকলৰ ভিতৰত অন্যতম পেটেক ফিলিপ। ‘পেটেক ফিলিপ গ্ৰেণ্ডমাষ্টাৰ চাইম ৰেফাৰেন্স ৬৩০০এ-০১০’ ঘড়ীটোৱে নিলামত বিপুল মূল্য লাভ কৰে।
কিন্তু ফিলিপৰ বহুমূলীয়া ঘড়ীটোকো পৰাভূত কৰিছে গ্ৰাফ ডাইমণ্ডছ হেলুচিনেচনে। হীৰা সজ্জিত ৰয়েল ঘড়ীটোৰ দাম ৫৫ মিলিয়ন ডলাৰ, যিটো ভাৰতীয় মুদ্ৰাত ৪৫৬ কোটি টকা।
২০১৪ চনত লণ্ডনৰ বিখ্যাত গ্ৰাফ ডাইমণ্ডছ জুৱেলাৰীয়ে হীৰা আৰু বহুমূলীয়া ৰত্ন খচিত এই ঘড়ীটো নিৰ্মাণ কৰিছিল। নাম দিয়া হৈছে গ্ৰাফ ডাইমণ্ডছ হেলুচিনেচন। ঘড়ীটোত ১১০ কেৰেট বহুৰঙী হীৰা খোদিত কৰা হৈছে। ইয়াৰ ডায়েলত অসাধাৰণ হীৰা ছেট কৰা হৈছে। বিভিন্ন ৰঙৰ হীৰা আৰু ইয়াৰ বিভিন্ন নিখুঁত ডিজাইনে ঘড়ীটোক অধিক আকৰ্ষণীয় কৰি তোলে।
লগতে পঢ়কঃ বৰ জংক-পংক! বিশ্বৰ বৃহত্তম ইংৰাজী শব্দটোত আছে ২ লাখ আখৰ! কওকচোন কি?
২০১৫ চনত গ্ৰাফ ডাইমণ্ডছে এনে এটা ঘড়ী মুকলি কৰিছিল যাৰ মূল্য আছিল ৩৩১ কোটি টকা। ঘড়ীটোত ১৫২ কেৰেটৰ বিভিন্ন আকাৰৰ নিখুঁতভাৱে কাটি উলিওৱা হীৰা আছিল। ঘড়ীটোৰ ডায়েলত ৩৮ কেৰেটৰ অভাল হীৰা স্থাপন কৰা হৈছিল। অৱশ্যে গ্ৰাফ হ্যালুচিনেচনৰ ডিজাইন আৰু হীৰা ডিজাইন অধিক সুন্দৰ বুলি গ্ৰাফ ডাইমণ্ডছে কয়। হেলুচিনেচন এতিয়া পৃথিৱীৰ আটাইতকৈ দামী ঘড়ী। মুঠ ৩০ গৰাকী অভিজ্ঞ ডিজাইনাৰ, ৰত্নবিদ, জুৱেলাৰীয়ে এই ঘড়ীটো নিৰ্মাণ কৰিছে।
বহুতে ঘড়ীৰ প্ৰতি অতি আকৰ্ষিত। বহুতে ঘড়ীটো কাপোৰৰ ৰঙৰ লগত মিলাই ভাল পায়। বহুতে ঘৰতে বিভিন্ন ধৰণৰ ঘড়ী সংগ্ৰহ কৰি ভাল পায়। আমাৰ দেশত দামী ঘড়ীৰ অভাৱ নাই। শ্বাহৰুখ খানৰ পৰা অনন্ত আম্বানীলৈকে দামী আৰু আড়ম্বৰপূৰ্ণ ঘড়ীৰ সংগ্ৰহত কোনেও পিছ পৰি থকা নাই।
অনন্ত আম্বানী আৰু ৰাধিকা মাৰ্চেণ্টৰ এংগেজমেণ্ট অনুষ্ঠানত অনন্ত আম্বানীৰ গ্ৰেণ্ডমাষ্টাৰ চাইমে দৃষ্টি আকৰ্ষণ কৰে। ইয়াৰ দাম ১৮ কোটি টকা। এই পেটেক ফিলিপ কোম্পানীৰ ঘড়ী বিশ্বৰ অন্যতম দামী ঘড়ী।
লগতে পঢ়কঃ টিকট কালেক্টৰ হিচাপে ধোনীৰ প্ৰথম চাকৰিৰ নিয়োগপত্ৰ ভাইৰেল; মুগ্ধ হৈ পৰিল অনুৰাগীসকল
বিলাসী আৰু জনপ্ৰিয় ব্ৰেণ্ডৰ ঘড়ী সংগ্ৰহৰ প্ৰতি আকৰ্ষণ আছে শ্বাহৰুখ খানৰ। পাঠান চিনেমাৰ প্ৰচাৰৰ দিনা শ্বাহৰুখে যিটো ঘড়ী পিন্ধিছিল সেয়া হৈছে অডিমাৰ্ছ পিগুৱেট ব্ৰেণ্ডৰ ঘড়ী, যাৰ দাম প্ৰায় ৫ কোটি টকা।
শচীন টেণ্ডুলকাৰেও সদায় ব্ৰেণ্ডেড ঘড়ী ভাল পাই আহিছে। তেওঁৰ সংগ্ৰহত বহুতো বিখ্যাত ব্ৰেণ্ডৰ ঘড়ী সন্নিবিষ্ট কৰা হৈছে। কিন্তু শচীনৰ প্ৰিয় হৈছে অডিমাৰ্ছ পিগুৱেট কনচেপ্ট ট্যুৰ বিলিয়ন। ইয়াৰ দাম প্ৰায় ডেৰ কোটি টকা।
