মহানগৰীত এইবাৰ ফাদিল হৈছে ভুৱা চিকিৎসকৰ কীৰ্তি। যোগ্যতা নথকাকৈয়ে ৪০ বছৰতকৈও অধিক সময় ধৰি চিকিৎসকৰ বেশ লৈ অৱশেষত আৰক্ষীৰ জালত পৰিছে এজন লোক।
চাৰি দশকৰো অধিক সময় চিকিৎসা চৰ্চা কৰা কথিত ভুৱা চিকিৎসকজনৰ নাম প্ৰেমানন্দ ৰায়। মঙলবাৰে নিশা ৰায়ক গ্ৰেপ্তাৰ কৰে মহানগৰ আৰক্ষীয়ে।
অভিযোগ অনুসৰি বিগত ৪০ বছৰ ধৰি তেওঁ গুৱাহাটীৰ লাল গণেশ এলেকাৰ নিউ মহামায়া মেডিক’ছ ফাৰ্মাচীত ৰোগীৰ চিকিৎসা কৰিছিল।
জানিব পৰা মতে, ৰায়ে পশ্চিম বংগৰ সুৰেন্দ্ৰ নাৰায়ণ নামৰ এজন বৈধ চিকিৎসকৰ পঞ্জীয়ন নম্বৰ ব্যৱহাৰ কৰি নিজকে এজন যোগ্য চিকিৎসক হিচাপে পৰিচয় দি আহিছিল।
প্ৰকাশিত খবৰ অনুসৰি তেওঁ ১৯৮৩ চনত চিকিৎসা সেৱা আৰম্ভ কৰিছিল আৰু তাৰ পিছৰ পৰাই দশক দশক ধৰি চলাই আহিছে এই কাৰ্য।
প্ৰেমানন্দ ৰায়ৰ বিৰুদ্ধে ভুৱা মৃত্যুৰ প্ৰমাণ পত্ৰ প্ৰদান কৰাৰ অভিযোগো উত্থাপন হৈছে। ডাঃ অভিজিৎ নেওগ নামৰ এজন ব্যক্তিয়ে দাখিল কৰা এজাহাৰৰ ভিত্তিত মঙলবাৰে নিশা ৰায়ক গ্ৰেপ্তাৰ কৰে আৰক্ষীয়ে।
গ্ৰেপ্তাৰৰ পিছতে আৰক্ষীয়ে ৰায়ৰ দ্বাৰা পৰিচালিত ফাৰ্মাচীখন ছীল কৰি দিয়ে। ৰায়ৰ দ্বাৰা চিকিৎসা লাভ কৰা ব্যক্তিসকলৰ ওপৰত পৰা সম্ভাৱ্য প্ৰভাৱ সন্দৰ্ভত তদন্ত চলাই থকা হৈছে বুলি জানিব পৰা গৈছে।
