তিনিচুকীয়া জিলাৰ ডুমডুমা আৰক্ষী থানাৰ অন্তৰ্গত বিছাকুপি চাহ বাগিচাত সোমবাৰে ৰাতি উদ্ধাৰ হোৱা চাহ জনজাতীয় মহিলাৰ হত্যাকাণ্ডৰ সৈতে জড়িত অপৰাধীক আজি পৰ্যন্ত কৰায়ত্ত কৰিবলৈ সক্ষম হোৱা নাই আৰক্ষী।
উল্লেখযোগ্য যে যোৱা সোমবাৰে ৰায়দাং চাহ বাগিচাৰ মালিনি ছোৱাৰ (৪৩) নামৰ এগৰাকী চাহ জনজাতীয় মহিলাক কোনো দুৰ্বৃত্তই দলবদ্ধ ধৰ্ষণ কৰি হত্যা কৰিছিল।
আৰক্ষীৰ মতে, ‘৪ সন্তানৰ মাতৃ বিধৱা মালিনি ছোৱাৰে সোমবাৰে নিশা ডুমডুমা কেন্দ্ৰীয় হস্পিতালত ভৰ্তি হৈ থকা পুতেকক লগ ধৰিবলৈ গৈছিল। সেই সময়তে এন্ধাৰৰ সুযোগ লৈ কোনো দুৰ্বৃত্তই মহিলা গৰাকীক ধৰ্ষণ তথা হত্যা কৰি বাগিচাখনত পুতি থয়।’
মহিলাগৰাকীৰ মৃতদেহ উদ্ধাৰ হোৱাৰ পিছতে চাহ জনজাতি ছাত্ৰ সন্থাই সাধাৰণ লোকক নিৰাপত্তা দিয়াত ব্যৰ্থ আৰক্ষীক কঠোৰ গৰিহণা দিয়াৰ লগতে দোষীক ধৰি চৰম শাস্তি দিবলৈ দাবী জনায়।
ঘটনা সন্দৰ্ভত ডুমডুমা আৰক্ষীয়ে কয়, ‘আমি ঘটনাৰ অনুসন্ধান কৰি আছো, অৱশ্যে কোনো লোককে এতিয়ালৈকে আটক কৰা হোৱা নাই। আমি অপৰাধীক ধৰিবলৈ অভিযান আৰম্ভ কৰিছো।’
