প্ৰাক্তন প্ৰধানমন্ত্ৰী এইচ ডি দেৱগৌড়াৰ নাতি তথা জেডিএছৰ নিলম্বিত সাংসদ প্ৰজ্বল ৰেভান্নাই যৌন কেলেংকাৰী ঘটনা পোহৰলৈ অহাৰ লগে লগে কূটনৈতিক পাছপ’ৰ্টৰ সহায়ত দেশ এৰি যায়। প্ৰায় এমাহৰ পিছত অৱশেষত জাৰ্মানীৰ বাৰ্লিনৰ পৰা ঘৰলৈ উভতি আহিল। বৃহস্পতিবাৰে মাজ নিশা ভাৰতৰ মাটিত ভৰি দিয়াৰ লগে লগে ৰেভান্নাক গ্ৰেপ্তাৰ কৰা হয়।
বাতৰি অনুসৰি, যোৱা নিশা প্ৰায় ১:৩০ বজাত ৰেভান্নাৰ বিমানখনে বাংগালুৰু বিমানবন্দৰত অৱতৰণ কৰে। বিমানখনৰ পৰা নামি অহাৰ লগে লগে বিমানবন্দৰত তেওঁক গ্ৰেপ্তাৰ কৰা হয়। তাৰ পৰাই প্ৰজ্বল ৰেভান্নাক বাংগালুৰুৰ চি আই ডিৰ কাৰ্যালয়লৈ লৈ যোৱা হয়।
উল্লেখ্য যে দ্বিতীয় পৰ্যায়ৰ লোকসভা নিৰ্বাচন শেষ হোৱাৰ পিছতে হাছানৰ সাংসদগৰাকীয়ে দেশ এৰি পলায়ন কৰে। ইয়াৰ পিছত তেওঁক লৈ বহু বিতৰ্কৰ সৃষ্টি হয়। বৈদেশিক পৰিক্ৰমা মন্ত্ৰালয়ে জনোৱা মতে, ৰেভান্নাৰ কূটনৈতিক পাছপ’ৰ্ট বাতিলৰ প্ৰক্ৰিয়াও আৰম্ভ হৈছে।
যোৱা নিশা বাংগালুৰুৰ কেম্পেগৌড়া আন্তঃৰাষ্ট্ৰীয় বিমানবন্দৰত প্ৰজ্বলক মাস্ক পিন্ধা দেখা গৈছিল। ইফালে, আৰক্ষীয়ে তেওঁক জিম্মাত লোৱাৰ পিছতে বাংগালুৰুৰ চি আই ডিৰ কাৰ্যালয়ত নিৰাপত্তা অধিক শক্তিশালী কৰা হৈছে।
ইপিনে, বিমানবন্দৰত আন এটা পথেৰে ৰেভান্নাক উলিয়াই নিয়া বুলি কোৱা হৈছে। আৰক্ষীৰ মতে, ৰেভান্নাৰ সুৰক্ষাৰ বাবে সেয়া কৰা হৈছিল। আনহাতে, বাংগালুৰু বিমানবন্দৰৰ পৰা বিশেষ তদন্তকাৰী দলে তেওঁৰ দুটা ছুটকেছ জব্দ কৰিছে।
ইয়াৰ পূৰ্বে জেডিএছে যৌন কেলেংকাৰীৰ গোচৰত প্ৰজ্বল ৰেভান্নাক কাৰণ দৰ্শোৱাৰ জাননী জাৰি কৰিছিল। লগতে তেওঁক দলৰ পৰা নিলম্বিত কৰা হয়। মন কৰিবলগীয়া যে এইবাৰো জেডিএছে হাছানৰ পৰা প্ৰজ্বলক প্ৰাৰ্থী মনোনীত কৰিছিল। নৰেন্দ্ৰ মোদীয়ে নিজেই ৰেভান্নাৰ হৈ প্ৰচাৰ চলাইছিল। তাৰ মাজতে জেডিএছৰ প্ৰাৰ্থীগৰাকীৰ যৌন কেলেংকাৰীৰ ভিডিঅ’ ফাদিল হয়। তেওঁৰ বিৰুদ্ধে কেইবাগৰাকীও মহিলাক যৌন নিৰ্যাতন চলোৱাৰ অভিযোগ উঠিছে। কৰ্ণাটকৰ কংগ্ৰেছ চৰকাৰে প্ৰজ্বলৰ বিৰুদ্ধে এখন তদন্ত সমিতি গঠন কৰে। এই সকলোবোৰৰ মাজতে প্ৰজ্বলে দেশ এৰি জাৰ্মানীলৈ গুচি গৈছিল।
বাতৰি অনুসৰি, ২০১৯ চনৰ পৰা ২০২২ চনৰ ভিতৰত বহুবাৰ যৌন নিৰ্যাতন চলোৱা বুলি দাবী কৰিছে এগৰাকী মহিলা ভুক্তভোগীয়ে। কামত যোগদান কৰাৰ তিনিমাহৰ পাছত প্ৰজ্বল ৰেভান্নাই তেওঁক নিজৰ কোৱাৰ্টাৰলৈ মাতিছিল বুলি অভিযোগ কৰে ভুক্তভোগী মহিলাগৰাকীয়ে। ৰেভান্নাৰ ঘৰত মুঠ ৬ গৰাকী মহিলা কৰ্মচাৰী আছিল।
অভিযোগকাৰী ভুক্তভোগীৰ ভাষাত, ‘প্ৰজ্বল ৰেভান্নাই যেতিয়াই ঘৰলৈ উভতি আহিছিল, আমাক ৬ গৰাকী মহিলা কৰ্মচাৰী সন্ত্ৰস্ত হৈ পৰিছিলো। আনকি ঘৰৰ পুৰুষ কৰ্মচাৰীসকলেও আমাক সাৱধান হ’বলৈ পৰামৰ্শ দিছিল।’ লগতে ভুক্তভোগীয়ে অভিযোগ কৰে যে যেতিয়াই এইচ ডি ৰেভান্নাৰ পত্নী ঘৰত নাথাকে তেতিয়াই তেওঁ মহিলাক ষ্ট’ৰ ৰুমলৈ মাতি আনি দেহৰ যতে ততে স্পৰ্শ কৰে। তাৰ বিনিময়ত তেওঁ ভুক্তভোগীক ফল তুলি দিছিল। তাৰ পিছত তেওঁ মহিলা কৰ্মচাৰীৰ শাৰী খুলি বিভিন্ন ধৰণে যৌন নিৰ্যাতন চলাইছিল।
ইপিনে, অভিযোগকাৰীয়ে ভিডিঅ’ কলত প্ৰজ্বল ৰেভান্নাই তেওঁৰ কন্যাৰ লগত অসৎ আচৰণ কৰা বুলি দাবী কৰে। এনে অৱস্থাত তেওঁৰ কন্যাই প্ৰজ্জ্বলৰ ফোন নম্বৰটো ব্লক কৰি দিয়ে।
