সোমবাৰে পুৱা প্ৰায় ১০.৩০ বজাত জিৰিবাম পথৰ ৩৭ নং ৰাষ্ট্ৰীয় ঘাইপথৰ কোটলেনৰ সমীপৰ টি লাইজাঙত জিৰিবামলৈ গৈ থকা মণিপুৰৰ মুখ্যমন্ত্ৰী এন বীৰেণ সিঙৰ অগ্ৰিম নিৰাপত্তাৰক্ষীৰ দলটোৰ ওপৰত সন্দেহযুক্ত কুকি উগ্ৰপন্থীয়ে এম্বুছ কৰাৰ খবৰ পোৱা গৈছে। এম্বুছত এজন নিৰাপত্তাৰক্ষী আহত হোৱা বুলি জানিব পৰা গৈছে।
মঙলবাৰে অশান্তিগ্ৰস্ত জিৰিবাম জিলাত উপস্থিত হৈ সাম্প্ৰতিক পৰিস্থিতিৰ বুজ লোৱাৰ কথা আছিল মুখ্যমন্ত্ৰীগৰাকীয়ে।
মণিপুৰ আৰক্ষীৰ কমাণ্ডো আৰু আছাম ৰাইফলছৰ যুটীয়া দল গঠন কৰি দোষীক বিচাৰি উলিয়াবলৈ তালাচী অভিযান অব্যাহত আছে।
বৃহস্পতিবাৰে (০৬ জুন) সন্ধিয়া এটা সম্প্ৰদায়ৰ ছয়বাম সাৰতকুমাৰ সিং নামৰ এজন ৫৯ বছৰীয়া ব্যক্তিক আন এটা সম্প্ৰদায়ৰ উগ্ৰপন্থীয়ে হত্যা কৰাৰ অভিযোগ উত্থাপন হয়।
লগতে পঢ়কঃ মণিপুৰত সাধাৰণ নাগৰিকক হত্যা কৰাৰ অপৰাধত অসমৰ জেলৰ পৰা এজনক গ্ৰেপ্তাৰ NIAৰ
পুৱা নিজৰ ফাৰ্মলৈ যোৱাৰ পিছত সিং নিৰুদ্দেশ হৈছিল আৰু পিছত তেওঁৰ মৃতদেহটো চোকা অস্ত্ৰৰ আঘাতৰ চিহ্নৰ সৈতে আৱিষ্কাৰ হয় বুলি আৰক্ষী সূত্ৰই প্ৰকাশ কৰিছে।
হত্যাকাণ্ডৰ পিছতে ক্ষুব্ধ স্থানীয় লোকে প্ৰতিশোধৰ বাবে এটা পৰিত্যক্ত নিৰ্মাণত জুই লগাই দিয়ে।
জিৰিবাম থানাৰ সন্মুখতো প্ৰতিবাদ সাব্যস্ত কৰা হয়, য’ত বাসিন্দাসকলে নিৰ্বাচনৰ সময়ত জব্দ কৰা অনুজ্ঞাপত্ৰপ্ৰাপ্ত আগ্নেয়াস্ত্ৰ ঘূৰাই দিবলৈ দাবী জনায়।
মেইটেই, মুছলমান, নগা, কুকি, অমণিপুৰীকে ধৰি বৈচিত্ৰময় জনগোষ্ঠীগত সমাজৰ বাবে পৰিচিত জিৰিবামত যোৱা বছৰৰ মে’ মাহৰ পৰা মণিপুৰক জুৰুলা কৰি অহা গোষ্ঠীগত বিবাদে ইয়াৰ পূৰ্বে স্পৰ্শ কৰা নাছিল।
লগতে পঢ়কঃ ৰাজীৱ গান্ধীৰ প্ৰতিমূৰ্তি ভাঙি লণ্ডভণ্ড; বিজেপি কৰ্মীক তীব্ৰ সমালোচনা ত্ৰিপুৰাৰ কংগ্ৰেছ বিধায়কৰ
ইতিমধ্যে ইম্ফল উপত্যকাৰ মেইটেই আৰু মণিপুৰৰ পাহাৰীয়া কুকিসকলৰ মাজত চলি থকা সংঘাতৰ ফলত ২০০ৰো অধিক লোকৰ মৃত্যু হৈছে আৰু হাজাৰ হাজাৰ লোক গৃহহীন হৈছে।
