দেওবাৰে তৃতীয়বাৰৰ বাবে প্ৰধানমন্ত্ৰী হিচাপে শপত গ্ৰহণ কৰে নৰেন্দ্ৰ মোদীয়ে। এন ডি এৰ সকলো অংশীদাৰক তৃতীয় মোডী মন্ত্ৰীসভাত অন্তৰ্ভুক্ত কৰা হৈছে। কেৱল অজিত পাৱাৰ গোটক কোনো মন্ত্ৰী পদ দিয়া নহ’ল। কেৰালাৰ একমাত্ৰ বিজেপিৰ সাংসদগৰাকীকো মন্ত্ৰী পদ প্ৰদান কৰিছে। তাৰপিছতে তেওঁ মন্ত্ৰালয় এৰিবলৈ সাজু হোৱাৰ বাতৰি প্ৰকাশ পাইছিল। কিন্তু শেহতীয়াকৈ তেওঁ সেই বাতৰি মিছা বুলি কৈ অস্বীকাৰ কৰিছে।
কেৰালা বিজেপিৰ একমাত্ৰ আৰু প্ৰথমজন সাংসদ সুৰেশ গোপীয়ে কালি কেন্দ্ৰীয় মন্ত্ৰী হিচাপে শপত গ্ৰহণ কৰে। ৰাজ্য মন্ত্ৰী হিচাপে তেওঁক মোডী কেবিনেটত অন্তৰ্ভুক্ত কৰা হয়। কিন্তু তাৰ পিছতে গোপীৰ মন্ত্ৰালয় এৰি দিয়াকলৈ তুমুল চৰ্চা চলে। তেওঁ নিজেই মন্ত্ৰালয় এৰাৰ ইংগিত দিয়া বুলি প্ৰকাশ পাইছিল। বাতৰি অনুসৰি, এটা আঞ্চলিক নিউজ চেনেলৰ সৈতে হোৱা বাৰ্তালাপত তেওঁ মন্ত্ৰী পদ ত্যাগ কৰাৰ ইচ্ছা প্ৰকাশ কৰে। তেওঁ কৈছিল যে মই মন্ত্ৰিত্ব বিচৰা নাই। সুৰেশ গোপীয়ে কৈছিল, ‘আশা কৰো দলৰ নেতাসকলে মোক এই পদৰ পৰা মুকলি কৰি দিব।‘
সুৰেশ গোপীয়ে মন্ত্ৰী পদ ত্যাগ কৰাৰ বহু কাৰণো দাঙি ধৰিছিল। তেওঁ জনাইছিল, `মই ইতিমধ্যে বহু ছবিত চুক্তিবদ্ধ হৈছো। সেইবোৰৰ বাবে মই দায়বদ্ধ। লগতে মই ত্ৰিশূৰ লোকসভা সমষ্টিৰ সাংসদ হিচাপে কাম কৰিব বিচাৰো।‘ সুৰেশ গোপীয়ে বুজাই দিয়ে যে তেওঁক কিছু আজৰি সময়ৰ প্ৰয়োজন।
সুৰেশ গোপী কেৰালাৰ প্ৰথমজন নিৰ্বাচিত বিজেপি সাংসদ। কেৰালাত বিজেপিৰ এয়া প্ৰথম জয়। সুৰেশ গোপী ত্ৰিশূৰ লোকসভা সমষ্টিৰ পৰা নিৰ্বাচিত হয়। তেওঁ বিজেপিৰ প্ৰথমজন সাংসদ হিচাপে ইতিহাসত নিজৰ নাম খোদিত কৰিছে। ভাৰতীয় কমিউনিষ্ট পাৰ্টিৰ প্ৰাৰ্থী ভি এছ. সুনীল কুমাৰক তেওঁ ৭৪,৬৮৬ ভোটত পৰাস্ত কৰে।
সংবাদ মাধ্যমক দিয়া এক সাক্ষাৎকাৰত গোপীয়ে কৈছিল, ‘মোৰ উদ্দেশ্য সাংসদ হিচাপে কাম কৰা। মই একো বিচৰা নাই। মই কৈছিলো মোৰ মন্ত্ৰী পদৰ প্ৰয়োজন নাই। মই ভাবো দলটোৱে মোক এই কৰ্তব্যৰ পৰা অতি সোনকালে মুকলি কৰি দিব। ত্ৰিশূৰৰ ভোটাৰসকলৰো ইয়াৰ কোনো সমস্যা নাই। ভোটাৰসকলে জানে যে মই এজন সাংসদ হিচাপে তেওঁলোকৰ বাবে ভাল কাম কৰিব পাৰিম। সুৰেশ গোপীয়ে বুজাই দিছিল যে তেওঁ যিকোনো মূল্যৰ বিনিময়ত তেওঁৰ ছবিবোৰ শেষ কৰিব বিচাৰো’।
কিন্তু এই বিষয়ে সংবাদ মাধ্যমত ব্যাপক চলি থকাৰ মাজতে কেৰালাৰ বিজেপি সাংসদগৰাকীয়ে এই বাতৰিৰ সত্যতা অস্বীকাৰ কৰিছে। তেওঁ এয়া এক উৰা বাতৰি বুলিহে প্ৰকাশ কৰিছে।
যোৱাবাৰ ত্ৰিশূৰ লোকসভাৰ আসনখন কংগ্ৰেছলৈ গৈছিল। সুৰেশ গোপী সাংসদ হিচাপে নিৰ্বাচিত হোৱাৰ পূৰ্বে ৰাজ্যসভাৰ সদস্য আছিল। ২০১৬ চনত তেওঁ ৰাজ্যসভালৈ নিৰ্বাচিত হৈছিল। তেওঁৰ ৰাজ্যসভাৰ কাৰ্যকাল ২০২২ চনলৈকে আছিল।
