শুকুৰবাৰে উচ্চতম ন্যায়ালয়ে নীট পৰীক্ষাত অনিয়মৰ অভিযোগৰ চিবিআই তদন্তৰ দাবীত আবেদন সন্দৰ্ভত এক জাননী জাৰি কৰে।ইতিমধ্যে ৫ মে’ত নেট-ইউজি ২০২৪ পৰীক্ষাত প্ৰশ্নকাকত ফাদিল হোৱা আৰু হোৱা দুৰ্নীতিৰ ওপৰত অসংখ্য আবেদনৰ জৰিয়তে চিবিআইৰ তদন্তৰ দাবীও দেশজুৰি তীব্ৰতৰ হৈ পৰিছে।
উচ্চতম ন্যায়ালয়ৰ ন্যায়াধীশ বিক্ৰম নাথ আৰু সন্দীপ মেহতাই একেটা বিষয়ৰ ওপৰত পূৰ্বৰ আবেদনসমূহৰ সৈতে চিবিআইৰ তদন্তৰ দাবীও সংযোজন কৰে। ৮ জুলাইত, গ্ৰীষ্মকালীন ছুটীৰ পাছত সকলো গোচৰৰ শুনানি গ্ৰহণ কৰা হ’ব। ইতিমধ্যে আদালতে নীট পৰীক্ষাৰ নিয়ন্ত্ৰক নেশ্যনেল টেষ্টিং এজেন্সীক জাননী জাৰি কৰি দুসপ্তাহৰ ভিতৰত উত্তৰ দিবলৈ কয়। বিচাৰপীঠে কেন্দ্ৰীয় চৰকাৰক পৰৱৰ্তী শুনানিৰ তাৰিখলৈ সময় দিয়ে।
আজি শুনানিৰ সময়ত আবেদনকাৰীৰ হৈ এজন অধিবক্তাই ৰাজস্থানৰ কোটাত ছাত্ৰ-ছাত্ৰীৰ আত্মহত্যাৰ উদাহৰণ উত্থাপন কৰে। এই সন্দৰ্ভত বিচাৰপীঠে তীব্ৰ আপত্তি কৰে। আদালতে কয় যে NEET-UG 2024 পৰীক্ষাৰ ফলাফলৰ বাবে কোটাত আত্মহত্যাৰ ঘটনা সংঘটিত হোৱা নাই। ন্যায়াধীশ নাথে অধিবক্তাজনক সকীয়াই দি কয়, “ইয়াত অপ্ৰয়োজনীয় আৱেগিক যুক্তি উত্থাপন নকৰিব।”
আবেদনকাৰীৰ অধিবক্তাই কয় যে তেওঁৰ ক্লায়েণ্টসকলে প্ৰশ্ন ফাদিলৰ অভিযোগ সন্দৰ্ভত চিবিআইৰ তদন্তৰ বাবে অনুৰোধ জনাইছে। ইয়াৰ উত্তৰত ন্যায়াধীশ নাথে কয় যে এই সন্দৰ্ভত এন টি এৰ বক্তব্য জনাটো গুৰুত্বপূৰ্ণ। তাৰ আগতে কোনো ৰায়দান কৰিব নালাগে। অভিযুক্তৰ বক্তব্য নজনাকৈ কেনেকৈ চিবিআই তদন্তৰ নিৰ্দেশ দিব পাৰি বুলি আদালতে প্ৰশ্ন কৰে।
