কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলৰ এক বুজন অংশ বানৰ পানীয়ে বুৰাই পেলোৱাৰ ফলত তিনিদিনতকৈও কম সময়ৰ ভিতৰতে কমেও ১১টা জীৱ-জন্তু উটি যোৱাৰ বিপৰীতে আন ৬৫টা জীৱ-জন্তু উদ্ধাৰ কৰা হয়।
সোমবাৰ (১ জুলাই)ৰ পৰা বুধবাৰৰ (৩ জুলাই) দুপৰীয়াৰ ভিতৰত উদ্যানখনত বানত ডুব যোৱাৰ ফলত ১০টা সুগৰি পহু আৰু এটা পোৱালি উদৰ মৃত্যু হৈছে।
আনহাতে, উদ্যান কৰ্তৃপক্ষই এই সময়ছোৱাত মুঠ ৪২টা সুগৰি পহু, উদ, শৰ পহু আৰু দুটাকৈ ফুটুকী ফেঁচা আৰু ক্ৰমে এটাকৈ শহাপহু আৰু বন মেকুৰী উদ্ধাৰ কৰে।
চিকিৎসাৰ অন্তত ১৪টা সুগৰি পহু, এটা শহাপহু আৰু দুটা শৰ পহু বনত এৰি দিয়াৰ বিপৰীতে ২২টা সুগৰি পহু, দুটা ফুটুকী ফেঁচা আৰু এটাকৈ উদ আৰু বন মেকুৰী এতিয়াও চিকিৎসাধীন হৈ আছে।
পূৱ অসম বন্যপ্ৰাণী সংমণ্ডলৰ অধীনত থকা মুঠ ২৩৩টা চোৰাং চিকাৰ প্ৰতিৰোধী শিবিৰৰ ভিতৰত ১৭৩টা শিবিৰ বুধবাৰে দুপৰীয়ালৈকে বাঢ়নী পানীয়ে প্লাৱিত কৰিছে, ইয়াৰে ৯টা শিবিৰ কৰ্মৰত বনৰক্ষকে খালী কৰিছে।
ইপিনে, বুধবাৰে দুপৰীয়া ধনশিৰিমুখ, নুমলীগড় আৰু নিয়ামতীঘাটত ব্ৰহ্মপুত্ৰ নদী বিপদসীমাৰ ওপৰেৰে বৈ যোৱাৰ ফলত বিখ্যাত উদ্যানখনৰ দুৰ্দশা আৰু অধিক বৃদ্ধি পাইছে।
