মহাৰাষ্ট্ৰ আৰক্ষীৰ চাইবাৰ শাখাই জনপ্ৰিয় ইউটিউবাৰ ধ্ৰুৱ ৰাথীৰ নাম ব্যৱহাৰ কৰি ব্যৱহাৰ কৰা এটা পেৰ’ডী একাউণ্টৰ বিৰুদ্ধে এফআইআৰ দাখিল কৰিছে।
অভিযোগ অনুসৰি এই একাউণ্টটোৱে লোকসভাৰ অধ্যক্ষ ওম বিৰলাৰ কন্যা অঞ্জলি বিৰলাৰ বিষয়ে ভুৱা তথ্য প্ৰচাৰ কৰিছে।
মহাৰাষ্ট্ৰৰ চাইবাৰ শাখাৰ সূত্ৰৰ মতে, dhruvrahtee নামৰ এটা এক্স হেণ্ডলে ওম বিৰলাৰ কন্যাই ইউ পি এছ চি পৰীক্ষাত নবহাকৈ লোকসেৱাৰ চাকৰি লাভ কৰা বুলি ভুৱা প্ৰচাৰ চলাইছে আৰু ইয়াক লৈ বহু বিতৰ্কৰ সৃষ্টি হৈছে।
ইফালে শনিবাৰে ধ্ৰুৱ ৰাথীয়ে ঘটনা সন্দৰ্ভত টুইট কৰি টাইমছ অৱ ইণ্ডিয়াক টেগ কৰি কয়, “মোৰ বিষয়ে ভুৱা বাতৰি কিয় এই কাকতৰ প্ৰথম পৃষ্ঠাত আছে? নিজ চকুৰে চাওক যে সেইটো তথ্য পেৰ’ডি টুইটাৰ একাউণ্টৰ দ্বাৰা পোষ্ট কৰা হৈছে। মোৰ লগত এই একাউণ্টৰ কোনো সম্পৰ্ক নাই।”
Hello @timesofindia
Why is your newspaper’s front page spreading fake news about me?
Go use your eyes to see that this alleged post was done by some random parody Twitter account. I have nothing to do with this.
— Dhruv Rathee (@dhruv_rathee) July 13, 2024
জানিব পৰা মতে, ওম বিৰলাৰ এজন আত্মীয়ৰ অভিযোগৰ ভিত্তিত ইউটিউবাৰজনৰ বিৰুদ্ধে ভাৰতীয় ন্যায় সংহিতাৰ অধীনত মানহানি, ইচ্ছাকৃতভাৱে অপমান কৰা আৰু আই টি আইনৰ অধীনত গোচৰ ৰুজু কৰা হৈছে।
উল্লেখ্য যে যিটো এক্স একাউণ্টৰ আঞ্জলী বিৰলাৰ বিষয়ে মিছা তথ্য প্ৰচাৰ হৈছিল সেই একাউণ্টৰ ‘বায়’ত লিখা আছে, “এইটো এটা ফেন আৰু পেৰ’ডী একাউণ্ট আৰু @dhruv_rathee ৰ প্ৰকৃত একাউণ্টৰ সৈতে জড়িত নহয়।”
শনিবাৰে আন এটা টুইটত পেৰ’ডী একাউণ্টটোৱে কয় যে মহাৰাষ্ট্ৰ চাইবাৰ চেলৰ নিৰ্দেশনা অনুসৰি আমি অঞ্জলি বিৰলাৰ বিষয়ে সকলো পোষ্ট আৰু মন্তব্য ডিলিট কৰিছো। আমি ক্ষমা বিচাৰিছো। কাৰণ আমি এই বিষয়ে অৱগত নাছিলোঁ।
