নেপালত পুনৰ গঠন হৈছে কে পি শৰ্মা অলীৰ চৰকাৰ। আজি (সোমবাৰে) তেওঁ প্ৰধানমন্ত্ৰী হিচাপে শপত গ্ৰহণ কৰিব। বিগত কেইবামাহো নেপালত ৰাজনৈতিক অস্থিৰতাৰ পাছত দেওবাৰে তেওঁক প্ৰধানমন্ত্ৰী হিচাপে নিযুক্তি দিয়া হয়। ৭২ বছৰীয়া অলীয়ে তৃতীয়বাৰৰ বাবে নেপালৰ প্ৰধানমন্ত্ৰী হৈছে, তেওঁক চীনৰ সমৰ্থক বুলি গণ্য কৰা হয়। অলিৰ অন্তিম কাৰ্যকালত ভাৰতৰ সৈতে সম্পৰ্কত যথেষ্ট শিথিল আছিল। ২০১৫ চনৰ ১১ অক্টোবৰৰ পৰা ২০১৬ চনৰ ৩ আগষ্টলৈকে নেপালৰ প্ৰধানমন্ত্ৰী আছিল অলি। এই সময়ছোৱাত নেপাল আৰু ভাৰতৰ সৈতে সম্পৰ্ক যথেষ্ট উত্তেজিত হৈ আছিল। ২০১৮ চনৰ ৫ ফেব্ৰুৱাৰীৰ পৰা ২০২১ চনৰ ১৩ মে’লৈ পুনৰ নেপালৰ প্ৰধানমন্ত্ৰী হয় অলি। পাছত নেপালৰ উচ্চতম ন্যায়ালয়ে তেওঁৰ কাৰ্যকাল অব্যাহত ৰখাক অসাংবিধানিক বুলি অভিহিত কৰে।
প্ৰথম কাৰ্যকালত কে পি শৰ্মা অলিয়ে ভাৰতে নেপালৰ আভ্যন্তৰীণ পৰিক্ৰমাত হস্তক্ষেপ কৰি চৰকাৰ উফৰাই দিয়াৰ অভিযোগ উত্থাপন কৰিছিল। সীমান্ত অঞ্চল সন্দৰ্ভতো নেপালে কঠোৰ স্থিতি গ্ৰহণ কৰিছিল। চীনৰ নিৰ্দেশত তেওঁৰ চৰকাৰে নিজৰ মানচিত্ৰত ভাৰতৰ কিছু অঞ্চল দেখুৱাইছিল, যিটো ভাৰত চৰকাৰে নাকচ কৰিছিল। মানচিত্ৰত উত্তৰাখণ্ডৰ লিপুলেখ, কালাপানী আৰু লিম্পিয়াধুৰা নেপালৰ বুলি দাবী কৰা হৈছিল। মাত্ৰ যোৱা মাহতো খবৰ আহিছিল যে নতুন মুদ্ৰাৰ ওপৰত নেপালে ভাৰতৰ কিছুমান অঞ্চল নিজৰ বুলি ঘোষণা কৰিছে। ইয়াৰ পাছত ভাৰতে পুনৰ তীব্ৰ আপত্তি প্ৰকাশ কৰে।
১৯৫২ চনত জন্মগ্ৰহণ কৰা অলিয়ে ১২ বছৰ বয়সতে ৰাজনীতিত প্ৰৱেশ কৰে। মাৰ্ক্স আৰু লেনিনৰ প্ৰভাৱত তেওঁ কমিউনিষ্ট ৰাজনীতিত সোমাই পৰে। ১৪ বছৰ কাৰাগাৰতো আছিল। পিছলৈ নেপাল কমিউনিষ্ট পাৰ্টি গঠন হয়। ১৯৯১ চনত অলি ঐক্যবদ্ধ মাৰ্ক্সবাদী–লেনিনবাদী আন্দোলনৰ নেতা হয়। পিছলৈ দুয়োটা দলক একত্ৰিত কৰি (CPN-UML) স্থাপন কৰা হয়। ২০০৬ চনৰ পৰা ২০০৭ চনলৈ তেওঁ উপ-প্ৰধানমন্ত্ৰী আৰু বৈদেশিক মন্ত্ৰী আছিল। ২০১৬ চনতেই তেওঁ চৰকাৰৰ বাহিৰত আছিল যদিও ২০১৫ চনত তেওঁ প্ৰথমবাৰৰ বাবে নেপালৰ প্ৰধানমন্ত্ৰী হিচাপে কাৰ্যনিৰ্বাহ কৰিছিল। ২০১৮ চনত তেওঁ পুনৰবাৰ পিএম হৈছিল। কিন্তু এই চৰকাৰো চলিছিল মাত্ৰ ২০২১ চনলৈকে। এতিয়া তৃতীয়বাৰৰ বাবে পিএম হ’বলৈ গৈ আছে।
