জনজাতিকৰণৰ প্ৰসংগক লৈ পুনৰ সৰৱ হৈ পৰিছে কোচ ৰাজবংশী ছাত্ৰ সন্থা। বিজেপি নেতৃত্বাধীন কেন্দ্ৰীয় আৰু ৰাজ্য চৰকাৰে কোচ ৰাজবংশীকে ধৰি ছয়টা জনগোষ্ঠীয় লোকক চৰম প্ৰতাৰণাৰ অভিযোগ তুলিছে আক্ৰাছুৱে।
নিৰ্বাচনৰ সময়ত বিজেপি দলে কোচ-ৰাজবংশীৰ বিভিন্ন সমস্যাৰ সমাধানৰ আশ্বাস দিছিল যদিও ক্ষমতালৈ অহাৰ চাৰি বছৰ পাছতো জনজাতিকৰণ আৰু কমতাপুৰ ৰাজ্য গঠনৰ নামত আলোচনাৰ বাহিৰে কোনো ফলপ্ৰসূ ফল পোৱা নাই বুলি অভিযোগ কৰে আক্ৰাছুৰ কেন্দ্ৰীয় সাধাৰণ সম্পাদক গকুল বৰ্মনে।
দেওবাৰে গোসাঁইগাঁৱৰ দলগাঁওস্থিত আক্ৰাছুৰ কাৰ্যালয়ত অনুষ্ঠিত এক সংবাদমেলত চৰকাৰৰ এনে প্ৰতাৰণাৰ বিৰুদ্ধে আন্দোলনৰ কাৰ্যসূচী ঘোষণা কৰে আক্ৰাছুৰ নেতৃবৰ্গই। এই কাৰ্যসূচী অনুসৰি অহা ২৪ মে’ত ২৪ ঘণ্টীয়া অসম বন্ধৰ লগতে প্ৰস্তাৱিত কমতাপুৰ বন্ধ, ৪ জুনত জিলাই জিলাই তিনিঘণ্টীয়া অৱস্থান ধৰ্মঘট, ১২ জুনৰ পুৱা ৫ বজাৰ পৰা ১০০ ঘণ্টীয়া অৰ্থনৈতিক অৱৰোধ (চকা বন্ধ) আৰু ১৬ জুনত ১২ ঘণ্টীয়া ৰে’লপথ অৱৰোধ কৰা হ’ব।
এনে আন্দোলনৰ পাছতো জনগোষ্ঠীটোৰ প্ৰতি চৰকাৰে কোনো গুৰুত্ব নিদিলে আগন্তুক লোকসভা নিৰ্বাচনত উচিত প্ৰত্যুত্তৰ দিয়া হ’ব বুলি সকীয়াই দিয়ে আক্ৰাছুৰ সম্পাদকগৰাকীয়ে।
