উচ্চতম ন্যায়ালয়ে প্রাক্তন ন্যায়াধীশ আৰু ন্যায়িক বিষয়াক নিৰ্দেশ দিয়া বকেয়া পেঞ্চন ভাট্টা আৰু অৱসৰৰ সুবিধা প্ৰদান নকৰাৰ অভিযোগত দেশৰ মুখ্য ন্যায়াধীশে অসমকে ধৰি ১৮খন ৰাজ্য আৰু কেন্দ্ৰীয় শাসিত অঞ্চলৰ মুখ্য সচিবক উচ্চতম ন্যায়ালয়লৈ মাতি পঠিয়াইছে।
মুখ্য সচিবে ভাট্টা আদায় দি ব্যক্তিগতভাৱে হাজিৰ হৈ সেয়া জনাব লাগিব। এই নিৰ্দেশ দিয়ে মুখ্য ন্যায়াধীশ ডি ৱাই চন্দ্ৰচুড়ে। গতিকে অসম আৰু অন্যান্য ৰাজ্যৰ মুখ্য সচিবসকলৰ ওপৰত চাপৰ সৃষ্টি হ’ল। ইয়াকে লৈ চৰ্চা আৰম্ভ হৈছে।
ইফালে কথাটো ইয়াতেই থমকি ৰোৱা নাই। উচ্চতম ন্যায়ালয়ৰ নিৰ্দেশ অনুসৰি মুখ্য সচিব হাজিৰ নহ’লে তেওঁলোকৰ বিৰুদ্ধে ৱাৰেণ্ট জাৰি কৰা হ’ব বুলি সকীয়াই দিছে মুখ্য ন্যায়াধীশে। অসমকে ধৰি ১৮খন ৰাজ্যৰ মুখ্য সচিবক ২৭ আগষ্টত উচ্চতম ন্যায়ালয়ত হাজিৰ হ’বলৈ কোৱা হৈছে। তদুপৰি, ভিডিঅ’ কনফাৰেন্সৰ জৰিয়তেও হাজিৰ হোৱাৰ আৱেদন খাৰিজ কৰে মুখ্য ন্যায়াধীশগৰাকীয়ে।
লগতে পঢ়কঃ বিপদজনক! এন্টিবায়টিক, পেৰাচিটামলকে ধৰি ১৫৬টা ‘ককটেল’ ঔষধ নিষিদ্ধ কৰিলে কেন্দ্ৰই
অভিযোগ অনুসৰি এই ১৮খন ৰাজ্যৰ প্ৰাক্তন ন্যায়াধীশ আৰু ন্যায়িক বিষয়াসকলক উচ্চতম ন্যায়ালয়ৰ নিৰ্দেশ অনুসৰি প্ৰাপ্য পেঞ্চন আৰু অৱসৰৰ সুবিধা প্ৰদান কৰা হোৱা নাই।
আনহাতে, সৰ্বভাৰতীয় ন্যায়াধীশ সন্থাই উচ্চতম ন্যায়ালয়ত অভিযোগ কৰে যে উচ্চতম ন্যায়ালয়ৰ কেইবাটাও নিৰ্দেশৰ পিছতো ৰাষ্ট্ৰীয় ন্যায়িক দৰমহা আয়োগৰ পৰামৰ্শ অনুসৰি ১৮খন ৰাজ্যই অৱসৰপ্ৰাপ্ত ন্যায়াধীশ আৰু ন্যায়িক বিষয়াৰ পেঞ্চন নিৰ্ধাৰণ কৰা নাই। সেয়েহে উচ্চতম ন্যায়ালয়ে মুখ্য সচিবক নিৰ্দিষ্ট নিৰ্দেশ দি আদালতত হাজিৰ হ’বলৈ নিৰ্দেশ দিয়ে।
এনে ঘটনা পোহৰলৈ অহাত এই ১৮খন ৰাজ্য যথেষ্ট চাপত পৰিছে। উচ্চতম ন্যায়ালয়ৰ মুখ্য ন্যায়াধীশে নিৰ্দেশ দিয়ে যে মুখ্য সচিবগৰাকী নিৰ্দিষ্ট তাৰিখত হাজিৰ নহ’লে তেওঁৰ বিৰুদ্ধে জামিনবিহীন গ্ৰেপ্তাৰী পৰোৱানা জাৰি কৰা হ’ব।
লগতে পঢ়কঃ চিঙৰা নাথাকিলে আড্ডা নজমে! পিছে জানেনে ইয়াৰ ইংৰাজী নাম? ৯৯% মানুহে নাজানে উত্তৰ!
তদুপৰি, পেঞ্চনৰ নিশ্চয়তা কিয় দিব পৰা নগ’ল? এই প্ৰশ্নৰ উত্তৰ ২৭ আগষ্টৰ শুনানিৰ দিনটোত ব্যক্তিগতভাৱে হাজিৰ হৈ মুখ্য সচিবসকলে দিব লাগিব। গতিকে কোনো অজুহাতই যে কাম নকৰে সেয়া কোৱা বাহুল্য।
