প্ৰেমত পৰিলে আপোনজনৰ লগত শাৰীৰিক সম্পৰ্ক ৰখাটো অতি স্বাভাৱিক। ইজনে সিজনৰ ওঁঠত আশ্বাস বিচৰাটোও সম্পৰ্কৰ স্বাভাৱিক দিশ। ইজনে সিজনক সাৱটি ধৰি থকাটোও প্ৰেমত অতি মনোৰম।
কিন্তু এইদৰে সাৱটি ধৰাৰো আছে এক আচৰিত স্বাস্থ্য উপকাৰিতা। শেহতীয়া এটা অধ্যয়নত দেখা গৈছে যে মানুহে যৌন সম্পৰ্কতকৈ যিটো বেছি বিচাৰে, সেয়া হ’ল আলিংগন। ‘মুন্নাভাই এম বি বি এছ’ৰ ‘জাদু কি ঝাপ্পী’ আপোনাৰ মনত আছেনে? অৰ্থাৎ ভাগৰুৱা আৰু হতাশাত ভোগাজনে সদায়ে কাৰোবাৰ আশ্বাস আৰু স্পৰ্শ বিচাৰে। চিনেমাত হ’লেও সেই কথা সঁচা।
২০২০ চনত লণ্ডনৰ গোল্ডস্মিথছ বিশ্ববিদ্যালয়ৰ মনোবিজ্ঞান বিভাগে ৪০ হাজাৰ লোকৰ ওপৰত এক সমীক্ষা চলাইছিল। সেই সমীক্ষাত দেখা গৈছিল যে ৭৯ শতাংশ লোকে যৌন সম্পৰ্ক নহয়, প্ৰিয় ব্যক্তিজনৰ পৰা নিৰাপদ আশ্ৰয় আৰু মৰম বিচাৰে। যিটোক আজিকালি ‘কাডলিং’ বুলিও জনা যায়।
এই ‘কাডলিং’ৰ উপকাৰিতা জানেনে?
বিশেষজ্ঞসকলে কয় যে ৰাতিপুৱা সাৰ পোৱাৰ পিছত আপোনজনক সাৱটি ধৰিলে বা আদৰ কৰিলে শৰীৰত অক্সিট’চিন হৰম’নৰ নিঃসৰণ বাঢ়ি যায়। আনকি শৰীৰৰ ক্ষতি কৰা কৰ্টিছলৰ দৰে হৰম’নৰ নিঃসৰণো কমি যায়।
কৰ্মক্ষেত্ৰত সৃষ্টি হোৱা মানসিক চাপ কমোৱাতো এই প্ৰেম বা আলিংগন উপযোগী। আলিংগন কৰিলে শৰীৰত সুখী হৰম’নৰ নিৰ্গমন বৃদ্ধি পায়। ফলত মানসিক চাপ কমি যায়।
আলিংগন কৰিলে ৰাতি টোপনি বৰ ভাল হয়। আপোনজনৰ ওচৰত থাকিলে আপুনি নিৰাপদ অনুভৱ কৰে। যিয়ে আপোনাক মনত শান্তি দিয়ে। আপোনজনৰ স্পৰ্শই এই ক্ষেত্ৰত যাদুৰ দৰে কাম কৰে। ফলত আপোনাৰ মগজু পাতল হৈ পৰে, টোপনি ভাল হয়।
বিভিন্ন গৱেষণাৰ পৰা দেখা গৈছে যে যিসকলে নিয়মিতভাৱে আপোনজনক সাৱটি ধৰে আৰু আদৰ কৰে তেওঁলোকৰ ৰোগ প্ৰতিৰোধ ক্ষমতা আনতকৈ বেছি।
