ৰাজ্যিক কেন্দ্রীয় ৰে’ল মন্ত্ৰী ৰাজেন গোঁহাই আৰু ত্ৰিপুৰাৰ মুখ্য মন্ত্ৰী বিপ্লব কুমাৰ দেবে আজি আগৰতলাত দ্বিতীয়খন আগৰতলা-বেংগালোৰ হমছফৰ এক্সপ্ৰেছৰ সেৱা শুভাৰম্ভ কৰে।
উল্লেখযোগ্য যে যোৱা জানুৱাৰি মাহৰ পৰা সপ্তাহত এবাৰকৈ উন্নত সা-সুবিধাযুক্ত হমছফৰ এক্সপ্ৰেছ ট্ৰেইনখনে আগৰতলাৰ পৰা চলাচল কৰি আছে।
ক্ৰমান্বয়ে বৃদ্ধি পাই অহা যাত্ৰীৰ সংখ্যাৰ লগতে ৰাজ্য চৰকাৰৰ অনুৰোধ ৰক্ষা কৰি নৰ্থ-ইষ্ট ফ্ৰণ্টিয়াৰ ৰে’লৱেই আজিৰে পৰা আৰম্ভ কৰা দ্বিতীয়খন হমছফৰ এক্সপ্ৰেছৰ ফলত এতিয়াৰে পৰা সপ্তাহত দুবাৰকৈ এই ট্ৰেইনখন ৰাজ্যখনৰ পৰা চলাচল কৰিব।
মুখ্য মন্ত্ৰী গৰাকীয়ে ত্ৰিপুৰাত ৰে’লৱে নে’টৱৰ্ক বিস্তাৰিত কৰাৰ লগতে ওচৰ আৰু দূৰণিবটীয়া ট্ৰেইনৰ সংখ্যা বৃদ্ধি কৰি বিজেপি-আই পি এফ টি মিত্ৰজোঁট চৰকাৰে হাতত লোৱা উন্নয়নমূলক আঁচনিসমূহত সহযোগ কৰিবলৈ কেন্দ্ৰীয় চৰকাৰক অনুৰোধ জনায়।
ইয়াৰ উপৰি তেওঁ কৈলাশপুৰ, কমলপুৰ, খোৱাই আৰু মোহনপুৰক সামৰি হ’ব লগীয়া বিকল্প ৰে’লৱে লাইনৰ ট্ৰেক বহুৱা কামৰ জৰীপ খৰতকীয়া কৰিবলৈ ৰে’লৱে মন্ত্ৰ্যালয়ক আহ্বান জনায়।
