দিল্লীৰ নতুন মুখ্যমন্ত্ৰী হ’ব আপ নেতা আতিশী মাৰ্লেনা। আপ বিধায়িনী দলৰ বৈঠকত তেওঁৰ নাম অনুমোদন কৰা হয়। বৈঠকত অৰবিন্দ কেজৰিৱালে আতিশীৰ নাম প্ৰস্তাৱ কৰে। সকলো বিধায়কে থিয় হৈ সেই প্ৰস্তাৱক সমৰ্থন জনায়। আতিশী হ’ব দিল্লীৰ তৃতীয় মহিলা মুখ্যমন্ত্ৰী। ইয়াৰ পূৰ্বে সুষমা স্বৰাজ আৰু শীলা দীক্ষিত এই পদত অধিষ্ঠিত আছিল।
দিল্লীৰ আবকাৰী নীতিত সংঘটিত হোৱা কথিত কেলেংকাৰীক লৈ মুখ্যমন্ত্রী অৰবিন্দ কেজৰিৱাল আৰু প্রাক্তন উপ-মুখ্যমন্ত্রী মনীষ ছিছ’দিয়াক গ্ৰেপ্তাৰ কৰাৰ পাছত আতিশী বাতৰিৰ শিৰোনাম দখল কৰিছিল৷ মনীষ ছিছ’দিয়া আৰু সত্যেন্দ্ৰ জৈনে পদত্যাগ কৰাৰ পিছত অৰবিন্দ কেজৰিৱালে আতিশী আৰু সৌৰভ ভৰদ্বাজক ২০২৩ চনৰ ৯ মাৰ্চত কেবিনেট মন্ত্ৰী হিচাপে নিযুক্তি দিয়ে।
বৰ্তমানৰ চৰকাৰত আতিশীৰ হাতত শিক্ষা, পানী, বিত্ত, পি ডব্লিউ ডি, বিদ্যুৎ, আইনকে ধৰি মুঠ ১৪টা মন্ত্ৰালয় আছে। ইমানবোৰ বিভাগৰ দায়িত্বত থকা অতীশীয়েই একমাত্ৰ মন্ত্ৰী।
এনে পৰিস্থিতিত অৰবিন্দ কেজৰিৱালৰ পদত্যাগৰ ঘোষণাৰ পিছতে মুখ্যমন্ত্ৰী পদৰ দৌৰত আতিশীৰ নাম আগবাঢ়ি আছিল। আতিশীক অৰবিন্দ কেজৰিৱালৰ অন্যতম বিশ্বাসযোগ্য মন্ত্ৰী হিচাপে গণ্য কৰা হয়। কিয়নো মুখ্যমন্ত্রী জেলত থকাৰ সময়ত যেতিয়া ১৫ আগষ্টত পতাকা উত্তোলনৰ সুযোগ আহিছিল, তেতিয়া অৰবিন্দ কেজৰিৱালে জেলৰ পৰা দিল্লী চৰকাৰৰ স্বাধীনতা দিৱসৰ অনুষ্ঠানত ত্ৰিৰংগ উত্তোলন কৰিবলৈ তেওঁৰ হৈ আতিশীৰ নাম প্ৰেৰণ কৰিছিল।
আম আদমী পাৰ্টি আৰম্ভ হোৱাৰ সময়তে আতিশীয়ে যোগদান কৰিছিল। ২০১৩ চনৰ বিধানসভা নিৰ্বাচনৰ বাবে দলৰ ইস্তাহাৰৰ খচৰা প্ৰস্তুত সমিতিৰ এগৰাকী গুৰুত্বপূৰ্ণ সদস্য হিচাপে পৰিগণিত হোৱাৰ লগতে দল গঠন আৰু নীতি নিৰ্ধাৰণৰ ক্ষেত্ৰতো গুৰুত্বপূৰ্ণ ভূমিকা পালন কৰিছিল আতিশীয়ে। পিছত আম আদমী পাৰ্টিৰ বিষয়বোৰ দাঙি ধৰিবলৈ আতিশীয়ে মুখপাত্ৰ হিচাপে দায়িত্ব গ্ৰহণ কৰে। তদানীন্তন উপ-মুখ্যমন্ত্ৰী মনীষ ছিছ’দিয়াৰ উপদেষ্টা হিচাপেও কাম কৰা আতিশীয়ে ছিছদিয়া জেললৈ যোৱাৰ পাছত শিক্ষা মন্ত্ৰালয়ৰ দায়িত্বও লৈছিল।
আতিশীৰ জন্ম হৈছিল দিল্লী বিশ্ববিদ্যালয়ৰ অধ্যাপক বিজয় কুমাৰ সিং আৰু তৃপ্ত ৱাহীৰ ঘৰত। আতিশীয়ে নতুন দিল্লীৰ স্প্ৰিংডেল স্কুলত স্কুলীয়া শিক্ষা গ্ৰহণ কৰিছিল, ছেইণ্ট ষ্টিফেনছ কলেজত ইতিহাস অধ্যয়ন কৰিছিল আৰু চেভেনিং বৃত্তি লৈ অক্সফৰ্ড বিশ্ববিদ্যালয়ত স্নাতকোত্তৰ ডিগ্ৰী লাভ কৰিছিল। কেইবছৰমান পিছত তেওঁ অক্সফৰ্ডৰ পৰা শৈক্ষিক গৱেষণাত ৰোডছ স্কোলাৰ হিচাপে দ্বিতীয় স্নাতকোত্তৰ ডিগ্ৰী লাভ কৰে।
মধ্যপ্ৰদেশৰ এখন সৰু গাঁৱত আতিশীয়ে ৭ বছৰ কটায়, য’ত জৈৱিক কৃষি আৰু প্ৰগতিশীল শিক্ষা ব্যৱস্থাৰ লগত জড়িত হৈ পৰে আৰু লগতে কেইবাটাও বেচৰকাৰী সংস্থাৰ সৈতেও কাম কৰে।
