বিনামূলীয়া আৰু বাধ্যতামূলক শিক্ষা অধিকাৰ আইন -২০০৯ অনুসৰি অসমৰ চৰকাৰী বিদ্যালয়সমূহত প্ৰথম শ্ৰেণীৰ পৰা অষ্টম শ্ৰেণীলৈ বিনামূলীয়া পাঠ্যপুথি আৰু বিনামূলীয়া মূল্যায়ন আৰু অভ্যাসন বহী(Evaluation and Practice Book) যোগান ধৰা হয়। কিন্তু শিক্ষাবৰ্ষৰ ছয় মাহ অতিক্ৰম কৰাৰ পিছতো বিনামূলীয়া মূল্যায়ন আৰু অভ্যাসন বহী যোগান নধৰাত তীব্ৰ ক্ষোভ প্ৰকাশ কৰিছে ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে।
কণ কণ ছাত্ৰ-ছাত্ৰীৰ শৈক্ষিক ভবিষ্যতক লৈ খেলা কৰা এই কাৰ্য কাৰ স্বাৰ্থত হ’বলৈ পালে তাক স্পষ্ট কৰিবলৈ দাবী কৰাৰ লগতে ডি ৱাই এফ আইয়ে মূল্যায়ন বহি বিতৰণৰ কাম শীঘ্ৰে কৰিবলৈ দাবী জনাইছে। মূল্যায়ন আৰু অভ্যাসন বহী অসমৰ চৰকাৰী বিদ্যালয়সমূহত চেপ্টেম্বৰ মাহ পৰ্যন্ত যোগান ধৰা হোৱা নাই। উল্লেখ্য যে সম্প্ৰতি এপ্ৰিল মাহত নতুন শিক্ষাবৰ্ষ আৰম্ভ হয়। চলিত শিক্ষাবৰ্ষত এপ্ৰিল মাহৰ আগত পাঠ্যপুথি সময়মতে যোগান ধৰিব নোৱৰা এই চৰকাৰৰ দিনত মূল্যায়ন আৰু অভ্যাসন বহীও সময়মতে যোগান ধৰিব নোৱাৰাটো স্বাভাৱিক ঘটনা যেনেই লগা হৈছে। কিন্তু যি মূল্যায়নৰ উদ্দেশ্যে এই বহীসমূহ যোগান ধৰা হয় তেনেকুৱা দুটা মূল্যায়ন চেপ্টেম্বৰ মাহৰ ভিতৰত শেষ হ’ব লাগিছিল।
অসম চৰকাৰৰ শিক্ষা বিভাগে ২০২৪-২৫ শিক্ষাবৰ্ষৰ বাবে প্ৰকাশ কৰা শৈক্ষিক দিনপঞ্জী অনুযায়ী জুন, চেপ্টেম্বৰ, নৱেম্বৰ, মাৰ্চ এই চাৰিটা মাহত মুঠ চাৰিটা মূল্যায়ন পাতিব লাগে। গতিকে ৫০% মূল্যায়ন প্ৰক্ৰিয়া শেষ হোৱালৈকে চৰকাৰে মূল্যায়ন আৰু অভ্যাসন বহী যোগান নধৰাটোৱে শিক্ষক, ছাত্ৰ, অভিভাৱক সকলোৰে চকু কঁপালত তুলিছে।
ডি ৱাই এফ আই য়ে দাবী কৰে যে অনতিপলমে এই মূল্যায়ন আৰু অভ্যাসন বহী সমূহ যোগান ধৰাৰ ব্যৱস্থা কৰক। কাৰ স্বাৰ্থত ছয় মাহ দেৰিলৈকে মূল্যায়ন বহী যোগান ধৰা হোৱা নাই, অসম চৰকাৰে সেয়া সেয়া স্পষ্ট কৰক।
