মুখ্যমন্ত্ৰীৰ কলেজীয়া বন্ধু আৰু অধ্যাপক ড° ননীগোপাল মহন্তই উপাচাৰ্যই কাৰ্যভাৰ গ্ৰহণ কৰা দুমাহৰ ভিতৰতে বিশ্ববিদ্যালয়ত সৃষ্টি অপ্ৰীতিকৰ পৰিস্থিতিৰ৷গুৱাহাটী বিশ্ববিদ্যালয়ৰ স্নাতকোত্তৰ ছাত্ৰ সন্থাৰ নিৰ্বাচনৰ ফলাফল ঘোষণা হোৱাৰ পাছতেই পুৱতি নিশা দুখনকৈ ছাত্ৰাৱাসৰ শিক্ষাৰ্থীৰ মাজত সংঘটিত হয় মাৰপিটৰ ঘটনা। মাধৱ বেজবৰুৱাৰ ১নং দুমহলীয়া ছাত্ৰাৱাস আৰু গোপীনাথ বৰদলৈ ২নং তিনি মহলীয়া ছাত্ৰাৱাসৰ শিক্ষাৰ্থীসকলৰ মাজত পুৱতি নিশা সংঘটিত হোৱা সংঘাতত কেইবাজনো শিক্ষাৰ্থী গুৰুতৰভাৱে আহত হয়।
জানিব পৰা মতে শিক্ষাৰ্থীসকলৰ এটা পক্ষই আনটো পক্ষক শিল আৰু সুৰাৰ বটেলেৰে আক্ৰমণ কৰে। ইয়াৰ পাছতে বহু কেইজন ছাত্ৰ গুৰুতৰভাৱে আহত হয়। ইতিমধ্যে আহতসকলক গুৱাহাটী মেডিকেল কলেজ হাস্পতালত ভৰ্তি কৰোৱা হৈছে।ইয়াৰে এজন ছাত্ৰ বিক্ৰম হাজৰিকাৰ অৱস্থা গুৰুতৰ৷
ঘটনা সন্দৰ্ভত গুৱাহাটী বিশ্ববিদ্যালয়ৰ এক সূত্ৰই ৰাজ্যিক সংবাদ মাধ্যমত প্ৰকাশ কৰা মতে নিৰ্বাচনৰ ফলাফল ঘোষণা কৰাৰ পাছত পৰিস্থিতি ঠিকেই আছিল যদিও পুৱতি নিশা প্ৰায় ৩ মান বজাত হঠাৎ আৰ চি চি-১ আৰু আৰ চি চি-২ ৰ আৱাসী ছাত্ৰসকলৰ মাজত সংঘাতৰ সূত্ৰপাত হয় আৰু উত্তপ্ত হৈ পৰে গুৱাহাটী বিশ্ববিদ্যালয়ৰ চৌহদ।
অভিযোগ অনুসৰি আৰ চি চি-১ ৰ ছাত্ৰসকলে প্ৰথমে আৰ চি চি-২ ত আক্ৰমণ কৰিছিল। অৱশ্যে সঠিক তদন্তৰ পাছতহে এই বিষয়ে স্পষ্ট হ’ব। বৰ্তমানেও জি এম চি এইছত ভৰ্তি হৈ আছে ৭ জনকৈ আহত ছাত্ৰ।
উল্লেখ্যযোগ্য যে, শুকুৰবাৰে গুৱাহাটী বিশ্ববিদ্যালয়ৰ স্নাতকোত্তৰ ছাত্ৰ সন্থাৰ নিৰ্বাচনৰ ফলাফলত সভাপতি পদত জয়ী হয় এ বি ভি পিৰ মানস প্ৰতিম কলিতা, সাধাৰণ সম্পাদক পদত জয়ী হয় কৌশিক বৰুৱা যিজন অসম ছাত্ৰ পৰিষদৰ সমৰ্থিত প্ৰাৰ্থী।
আনহাতে, উপ-সভাপতি, সহকাৰী সাধাৰণ সম্পাদকসহ ৬টা পদত জয়লাভ কৰিছে আছু সমৰ্থিত প্ৰাৰ্থীয়ে। উপ-সভাপতি পদত জয়ী হয় উদীপ্ত বায়ন, সহকাৰী সাধাৰণ সম্পাদক পদত জয়ী হয় নৈমিষা শইকীয়া, সাহিত্য সম্পাদকত জয়ী হয় প্ৰাণজিৎ কোচ আৰু সাংস্কৃতিক সম্পাদক পদত জয়ী হয় বন্দিতা ডেকা।
