‘কেন্দ্ৰীয় মাধ্যমিক শিক্ষা ব’ৰ্ড’ চমুকৈ চিবিএছই কৰ্তৃপক্ষই দশম আৰু দ্বাদশ ব’ৰ্ড পৰীক্ষাত অৱতীৰ্ণ হোৱা পৰীক্ষাৰ্থীৰ শ্ৰেণীকোঠাত উপস্থিতিৰ নিয়ম কটকটীয়া কৰি তুলিছে।
চিবিএছইৰ ফালৰ পৰা জনোৱা হৈছে যে সংশ্লিষ্ট শ্ৰেণী দুটাৰ ব’ৰ্ড পৰীক্ষাত অৱতীৰ্ণ হ’বলৈ পৰীক্ষাৰ্থীসকলে শ্ৰেণীকোঠাত নূন্যতম উপস্থিতিৰ হাৰ ৭৫ শতাংশ হ’ব লাগিব। এই সন্দৰ্ভত ইতিমধ্যে দেশৰ চিবিএছইৰ দ্বাৰা পৰিচালিত সকলো বিদ্যালয়ৰ অধ্যক্ষ আৰু প্ৰধান শিক্ষকলৈ গাইডলাইন প্ৰেৰণ কৰা হৈছে।
গাইডলাইনত স্পষ্টভাৱে কোৱা হৈছে যে যিসকল ছাত্ৰ-ছাত্ৰীৰ শ্ৰেণী উপস্থিতি ৭৫ শতাংশতকৈ কম, তেওঁলোকক আগন্তুক ২০২৫ চনৰ দশম আৰু দ্বাদশ শ্ৰেণীৰ ব’ৰ্ড পৰীক্ষাত অংশগ্ৰহণৰ অনুমতি দিয়া নহ’ব।
এই গাইডলাইনসমূহে পৰীক্ষাৰ উপ-বিধিৰ ১৩ আৰু ১৪ নং মানি চলাৰ ওপৰত গুৰুত্ব আৰোপ কৰে। যি নিয়মত শৈক্ষিক উত্তৰণৰ বাবে শ্ৰেণীকোঠাৰ উপস্থিতিক গুৰুত্বপূৰ্ণ বুলি চিনাক্ত কৰা হৈছে।
কিন্তু নিয়মবোৰ কঠোৰ হ’লেও কিছুমান বিশেষ ক্ষেত্ৰত শিথিল হ’ব পাৰে। উদাহৰণস্বৰূপে, যদি কোনো ছাত্ৰ অসুস্থ, বা ৰাষ্ট্ৰীয় বা আন্তঃৰাষ্ট্ৰীয় পৰ্যায়ৰ ক্ৰীড়া প্ৰতিযোগিতাত অংশগ্ৰহণ কৰিবলৈ গৈ আছে, তেন্তে শ্ৰেণীকোঠাত নূন্যতম ৭৫ শতাংশ উপস্থিতিৰ প্ৰয়োজনীয়তা সেই প্ৰাৰ্থীসকলৰ বাবে প্ৰযোজ্য নহ’ব।
অৱশ্যে এই বিশেষ সুবিধা লাভৰ বাবে সংশ্লিষ্ট প্ৰাৰ্থীয়ে প্ৰমাণ আৰু নথি দাখিল কৰিব লাগিব। তেনে ক্ষেত্ৰত শ্ৰেণী উপস্থিতিৰ হাৰত সৰ্বাধিক ২৫ শতাংশ ৰেহাই দিব পাৰিব।
সংশ্লিষ্ট বিদ্যালয় কৰ্তৃপক্ষক প্ৰতিজন ছাত্ৰ-ছাত্ৰী আৰু তেওঁলোকৰ অভিভাৱকক নতুন নিয়মৰ বিষয়ে তৎকালীনভাৱে অৱগত কৰিবলৈ নিৰ্দেশ দিয়া হৈছে। যাতে পিছত ইয়াৰ ওপৰত কোনো সন্দেহ বা সমস্যা নাথাকে।
একে সময়তে তেওঁলোকৰ অধীনস্থ বিদ্যালয়সমূহকো চিবিএছইয়ে সকীয়াই দিছে। তেওঁলোকক জনোৱা হৈছে যে শ্ৰেণীকোঠাত ছাত্ৰ-ছাত্ৰীৰ উপস্থিতি স্বাভাৱিক নেকি সেই বিষয়ে প্ৰতিখন বিদ্যালয়লৈ অঘোষিতভাৱে ভ্ৰমণ কৰা হ’ব।
যদি সেই সময়ছোৱাত কোনো ছাত্ৰ-ছাত্ৰীয়ে উপযুক্ত নথি-পত্ৰ দেখুৱাই বিদ্যালয়ত অনুপস্থিত বুলি ধৰা পৰে, তেন্তে সেই অনিয়মৰ বাবে বিদ্যালয় কৰ্তৃপক্ষ দায়ী হ’ব। তদুপৰি এনে কার্য সংঘটিত কৰা ছাত্র-ছাত্রীসকলো ব’র্ড পৰীক্ষাত অৱতীৰ্ণ হোৱাত বাধা হৈ পৰিব৷
এই সন্দৰ্ভত জাৰি কৰা বিবৃতিত বিশেষভাৱে কোৱা হৈছে, ‘বিদ্যালয়ৰ উপস্থিতিৰ ৰেকৰ্ড পৰীক্ষা কৰিবলৈ ব’ৰ্ডে আকস্মিক পৰিদৰ্শন কৰিব পাৰে। যদি পৰিদৰ্শনৰ সময়ত ৰেকৰ্ড অসম্পূৰ্ণ হোৱা দেখা যায়, বা সেই বিদ্যালয়ৰ ছাত্ৰ-ছাত্ৰীসকলে নিয়মিতভাৱে বিদ্যালয়ত উপস্থিত নহয়, তেন্তে সেই বিদ্যালয়ৰ বিৰুদ্ধে কঠোৰ ব্যৱস্থা গ্ৰহণ কৰিব পাৰি। আনকি, তেওঁলোকৰ অনুমোদন বাতিল হ’ব পাৰে।’
আনুষংগিক বিবৃতিটোত এই কথাও জনোৱা হৈছে যে নিজ নিজ শিক্ষাবৰ্ষৰ ১ জানুৱাৰীলৈকে কিমানজন ছাত্ৰ-ছাত্ৰীয়ে বিদ্যালয়ত অধ্যয়ন কৰিছে, প্ৰতিদিনে বিদ্যালয়লৈ আহিছে নে নাই সেই সম্পৰ্কে তথ্য সংগ্ৰহ কৰা হ’ব। আৰু এই তথ্য এবাৰ জমা দিয়াৰ পিছত ইয়াক সংশোধন কৰিব নোৱাৰিব।
কিন্তু যদি কোনো বিদ্যালয়ত উপস্থিতিৰ হাৰৰ সমস্যা হয়, তেন্তে সেই বিদ্যালয়সমূহক ব’ৰ্ডে সহায় কৰিব যদিহে সমস্যাৰ বিষয়ে লিখিতভাৱে জনোৱা হয়। সমস্যা সমাধানৰ বাবে তেওঁলোকক ‘মানক পৰিচালনা পদ্ধতি’ বা এছ অ’ পি প্ৰদান কৰা হ’ব।
