ডানাৰ ত্ৰাসে আতংকিত কৰিছে সকলোকে। যাৰ বাবে বন্ধ কৰি দিয়া হৈছে পুৰীৰ জগন্নাথ মন্দিৰৰ দুৱাৰ। লগতে কনাৰ্ক মন্দিৰকে ধৰি ওড়িশাৰ প্ৰায়বোৰ পৰ্যটনস্থলী সাময়িকভাৱে বন্ধ কৰি দিয়া হৈছে। ২৫ অক্টোবৰলৈকে কোনো পৰ্যটকে এই স্থানসমূহ ভ্ৰমণ কৰিব নোৱাৰিব।
মন কৰিবলগীয়া যে বৃহস্পতিবাৰে মাজনিশা ওড়িশাৰ ভিটাৰকানিকা পাৰ্ক আৰু ধমৰা বন্দৰৰ মাজত ঘূৰ্ণীবতাহ ডানাই স্থলপথত প্ৰৱেশ কৰিব।
ওড়িশাৰ প্ৰশাসনে ডানাৰ সৈতে মোকাবিলা কৰিবলৈ সম্পূৰ্ণৰূপে সাজু হৈছে। ক্ষতিগ্ৰস্ত হোৱাৰ সম্ভাৱনা থকা অঞ্চলৰ পৰা সকলো লোকক উলিয়াই অনা হৈছে। প্ৰশাসনৰ তথ্য অনুসৰি বহুতো অস্থায়ী সাহায্য শিবিৰ স্থাপন কৰি উপকূলীয় অঞ্চলৰ পৰা কমেও ১০ লাখ লোকক খালী কৰা হৈছে।
বতৰ কাৰ্যালয়ৰ পূৰ্বাভাস অনুসৰি প্ৰচণ্ড বতাহৰ বাবে ওড়িশাৰ ১৪খন জিলা প্ৰভাৱিত হ’ব পাৰে। সেই অঞ্চলসমূহত ঘণ্টাত ১১০ কিলোমিটাৰ বেগত ধুমুহা আহিব পাৰে। এনে পৰিস্থিতিত ওড়িশাৰ দুৰ্যোগ ব্যৱস্থাপনা মন্ত্ৰী সুৰেশ পূজাৰীয়ে ২৪ আৰু ২৫ অক্টোবৰত পুৰীলৈ কোনেও নাহিব বুলি আবেদন জনায়।
বুধবাৰে ভাৰতৰ প্ৰত্নতাত্ত্বিক জৰীপ বিভাগে ঘোষণা কৰে যে ২৪ আৰু ২৫ অক্টোবৰত পুৰিৰ জগন্নাথ মন্দিৰ আৰু কোনাৰ্কৰ সূৰ্য্য মন্দিৰ বন্ধ থাকিব। লগতে ওড়িশাৰ সকলো কীৰ্তিচিহ্ন, মন্দিৰ আৰু সংগ্ৰহালয় বন্ধ থাকিব।
ইয়াৰোপৰি ওড়িশা চৰকাৰে ছিমলিপাল বাঘ সংৰক্ষিত বনাঞ্চল আৰু ভিতৰকানিকা ৰাষ্ট্ৰীয় উদ্যান বন্ধ কৰাৰ সিদ্ধান্ত গ্ৰহণ কৰিছে।
ক্ষতিৰ পৰা হাত সাৰিবলৈ বুধবাৰৰ পৰা শুকুৰবাৰলৈ সকলো বিদ্যালয়ো বন্ধ ঘোষণা কৰা হৈছে। তাৰ লগতে সকলো চৰকাৰী কৰ্মচাৰীৰ ছুটী বাতিল কৰিছে প্ৰশাসনে। বুধবাৰৰ পৰা শুকুৰবাৰলৈ শ্ৰমিকসকলক তেওঁলোকৰ মুখ্য কাৰ্যালয়ত উপস্থিত থাকিবলৈ নিৰ্দেশ দিয়া হৈছে।
ইতিমধ্যে দেশত ৰাষ্ট্ৰীয় দুৰ্যোগ সঁহাৰি বাহিনীৰ ১১টা দল মোতায়েন কৰা হৈছে। ডানাৰ আতংকৰ বাবে বাতিল কৰা হৈছে দক্ষিণ-পূব ৰে’লৱেৰ কমেও ১৫০খন ৰে’ল।
বুধবাৰে ৰাষ্ট্ৰপতি দ্ৰৌপদী মুৰ্মুৰে ওড়িশা ভ্ৰমণৰ কথা আছিল। সেই ভ্ৰমণো বাতিল কৰা হৈছে।
