অসমীয়া সাহিত্য-সংবাদমূলক ক্ষুদ্ৰ আলোচনী ‘বিস্ময়’ প্ৰকাশ কৰি সম্পাদক শশী ফুকনে এক ইতিহাস গঢ়িছিল। সেইগৰাকী ‘বিস্ময়’ আলোচনীৰ প্ৰতিষ্ঠাপক তথা সম্পাদক শশী ফুকনৰ দেহাৱসান ঘটিছে।
শুকুৰবাৰে নিশা ১০-৩০ বজাত গুৱাহাটী চিকিৎসা মহাবিদ্যালয় হাস্পতালত চিকিৎসাধীন অৱস্থাতে শেষ নিশ্বাস ত্যাগ কৰে ফুকনে। মৃত্যুৰ সময়ত তেওঁৰ বয়স হৈছিল ৭৮ বছৰ।
দীৰ্ঘদিন ধৰি শাৰীৰিক অসুস্থতাৰ বাবে হাস্পতালত চিকিৎসাধীন হৈ আছিল ফুকন। প্ৰায় ডেৰ মাহতকৈও অধিককাল তেওঁ হাস্পতালত চিকিৎসাধীন হৈ আছিল।
শশী ফুকনে অসমীয়া সাহিত্য-সংবাদ জগতত তেওঁৰ বিস্ময় আলোচনীৰে সঁচাকৈয়ে বিস্ময়ৰ সৃষ্টি কৰিছিল। এখন ক্ষুদ্ৰ আলোচনীৰে তেওঁ অসমীয়া সাহিত্যত এটা যুগৰ সৃষ্টি কৰিছিল। সেয়া আছিল বিস্ময়ৰ যুগ।
নৱ প্ৰজন্মৰ মাজত অতি জনপ্ৰিয় এই আলোচনীখনত নাছিল কি? দেশ-বিদেশৰ খৱৰৰ পৰা আৰম্ভ কৰি সাহিত্যৰ সকলো জনপ্ৰিয় ৰচনাৰ লগতে মনোৰঞ্জনৰ অপূৰ্ব সমাহাৰ। প্ৰথমবাৰৰ বাবে এখন অসমীয়া আলোচনী হিচাপে বিস্ময়ে ইয়াৰ প্ৰচলনৰ সংখ্যা ১ লাখ অতিক্ৰম কৰিছিল।
আশী-নব্বৈৰ দশকত অসমত বিভিন্ন ক্ষুদ্ৰ আলোচনীৰ জন্ম হৈছিল যদিও বিস্ময়ৰ জনপ্ৰিয়তাক চুব পৰা নাছিল। কিয়নো সেই সকলোবোৰে বিস্ময়কে অনুসৰণ কৰিছিল। বিস্ময় আছিল পাঠকৰ মনৰ কথা জানি প্ৰকাশ কৰা এলানি সুপাঠ্য ৰচনাৰ সম্ভাৰ।
যুৱক-যুৱতীৰ সমস্যাৰ সমাধান দিয়া ‘সমিধান’ দিয়াৰ পৰা আৰম্ভ কৰি চিকিৎসা নিদান দিয়ালৈকে তথা কৌতুকৰ পৰা আৰম্ভ কৰি ৰহস্যমূলক, থ্ৰিলাৰ, ৰোমান্টিক গল্প-উপন্যাস, চিনেমা, মডেলিং, খেল আদিকে ধৰি সকলো বিষয় সামৰি লৈছিল বিস্ময়ে। তদুপৰি, অসমত চলচ্চিত্ৰ সাংবাদিকতাৰ আৰম্ভণিও ঘটিছিল বিস্ময়তে।
সোণালী জয়ন্তী বৰ্ষ অতিক্ৰম কৰা বিস্ময়ক নতুন ৰূপত পাঠকৰ মাজলৈ উলিয়াই দিয়াৰ হেঁপাহ আছিল শশী ফুকনৰ। কিন্তু সেই হেঁপাহ আধৰুৱা হৈয়েই ৰ’ল। তথাপি অসমীয়া সাহিত্য-সংবাদ জগতত বিস্ময় যুগৰ স্ৰষ্টাগৰাকী সদায় স্মৰণীয় হৈ ৰ’ব।
শশী ফুকনৰ মৃত্যুত বিভিন্ন শিল্পী-সাহিত্যিক, নেতা-সাংবাদিককে ধৰি অজস্ৰ গুণমুগ্ধই শ্ৰদ্ধাঞ্জলি জনাইছে।
