গুৱাহাটীৰ ‘আৰণ্যক’ নামৰ বৈজ্ঞানিক আৰু শিল্প গৱেষণা সংগঠনটোৱে আজি ডিগবৈ বন বিভাগৰ ৯০ গৰাকী বনকৰ্মীৰ মাজত বিভিন্ন ধৰণৰ প্ৰয়োজনীয় সা-সামগ্ৰী বিতৰণ কৰে।
ডিগবৈ ডিভিজনৰ জিলা বন বিষয়া বিপুল বৰা, সহকাৰী বন সংৰক্ষক মৃগাংক বৰা, ডিগবৈ ৰেঞ্জ বিষয়া প্ৰণীতা সিঙৰ লগতে বিভিন্ন বন বিষয়াৰ উপস্থিতিত সংগঠনটোৱে বনকৰ্মীসকলৰ মাজত জোতা, ৰেইনকোট আদি বিতৰণ কৰা দেখা যায়।
আৰণ্যক সংগঠনটোৰ হৈ শৈলেন্দ্ৰ দাস, ৰাজীৱ ৰুদ্ৰ টৰিয়াং, জ্যোতি প্ৰসাদ দাস, অভিজিৎ বৰুৱা আৰু ৰুবুল টাটি বিতৰণ কাৰ্যসূচীত উপস্থিত থাকে।
উল্লেখ্য যে বনকৰ্মীসকলে বন সংৰক্ষণ আৰু বনৰীয়া জীৱ জন্তুসকলক সংৰক্ষণ কৰাৰ বাবে যিকোনো পৰিস্থিতিৰে মোকাবিলা কৰিবলগীয়া হয়। বিভিন্ন সময়ত তেওঁলোকে বিভিন্ন অসুবিধাৰ সন্মুখীন হয় সেয়ে তেওঁলোকৰ কিছু সহায় হোৱা উদ্দেশ্যে আৰণ্যক নামৰ সংগঠনটোৱে সহায়ৰ বাবে আগবাঢ়ি আহিছে।
১১১.১ কিলোমিটাৰেৰে আবৰা ডিগবৈ বন বিভাগৰ অধীনৰ ডেহিয়াং পাটকাই বন্যপ্ৰাণী অভয়াৰণ্যখনৰ সুৰক্ষাৰ দায়িত্বত থকা এই বনকৰ্মীসকলক সহায়ৰ বাবে আগবাঢ়ি অহা আৰণ্যক নামৰ সংস্থাটোক বন বিভাগৰ তৰফৰ পৰা ধন্যবাদ জ্ঞাপন কৰে।
