প্ৰায় চাৰে তিনি দশকৰ আগতে ঘটিছিল এই ঘটনা। ১৯৮৮ চনত ৰাজীৱ গান্ধী প্ৰধানমন্ত্ৰী হৈ থকাৰ সময়ত ছলমান ৰুছদিৰ ‘দ্য ছ্যেটেনিক ভাৰ্ছেছ’ (The Satanic Verses) নামৰ গ্ৰন্থখন আমদানি কৰাত নিষেধাজ্ঞা আৰোপ কৰা হৈছিল। অৱশেষত দিল্লী উচ্চ ন্যায়ালয়ে সেই নিষেধাজ্ঞা প্ৰত্যাহাৰ কৰাৰ নিৰ্দেশ দিছে।
যোৱা শতিকাৰ আশীৰ দশকৰ শেষৰ ফালে ছলমান ৰুছদিৰ সেই গ্ৰন্থখনক লৈ বিতৰ্ক আৰম্ভ হৈছিল। সেই সময়ত ৰাজীৱ গান্ধী চৰকাৰে এই আদেশ জাৰি কৰিছিল। কিন্তু ২০১৯ চনত সন্দীপন খান নামৰ এজন ব্যক্তিয়ে এই নিষেধাজ্ঞাক প্ৰত্যাহ্বান জনাই উচ্চ ন্যায়ালয়ৰ কাষ চাপিছিল।
উক্ত গোচৰৰে শুনানি বৃহস্পতিবাৰে অনুষ্ঠিত হৈছিল ন্যায়াধীশ ৰেখা পল্লী আৰু ন্যায়াধীশ সৌৰভ বেনাৰ্জীৰ বিভাগীয় বিচাৰপীঠত। আদালতে কয় যে ব্যাপক অনুসন্ধানত কেন্দ্ৰীয় পৰোক্ষ কৰ আৰু শুল্ক ব’ৰ্ডে শুল্ক আইন, ১৯৬২ৰ অধীনত জাৰি কৰা নিষেধাজ্ঞাৰ কোনো নথি পোৱা নগ’ল বুলি জানিবলৈ দিয়ে। আন কোনো আনুষংগিক সংস্থাইও ইয়াৰ সন্ধান দিব নোৱাৰিলে।
লগতে পঢ়কঃ বন্ধু ভাল, কিন্তু এনেকুৱা বন্ধু থাকিলে জীৱন অতিষ্ঠ হৈ পৰে! চাওক, বিষাক্ত সংগীক বিদায় দিয়াৰ কিটিপ
এনে পৰিস্থিতিত বিভাগীয় বিচাৰপীঠে কয়, ” এনে পৰিস্থিতিত আমাৰ হাতত এনে কোনো নথি নাছিল বুলি মানি লোৱাৰ বাহিৰে আন উপায় নাই। আৰু ফলত আমি ইয়াৰ বৈধতাও পৰীক্ষা কৰিব নোৱাৰো।”
প্ৰসংগক্ৰমে আবেদনকাৰী সন্দিপন খানে আদালতত জনাইছিল যে যিহেতু ‘দ্য ছ্যেটেনিক ভাৰ্ছেছ’ৰ ওপৰত নিষেধাজ্ঞা আছে, সেয়েহে তেওঁ বিদেশৰ পৰা কিতাপখন আনিব পৰা নাই। উচ্চ ন্যায়ালয়ে আবেদনকাৰী ব্যক্তিজনক দেশলৈ কিতাপখন আনিবলৈ অনুমতি দিয়ে। ইয়াৰ ফলত ৩৬ বছৰ ধৰি গ্ৰন্থখনৰ ওপৰত আৰোপ কৰা নিষেধাজ্ঞা প্ৰত্যাহাৰ হয়।
লগতে পঢ়কঃ ‘ভূমিকন্যা’ক লৈ গৌৰৱান্বিত চন্দ্ৰবাবু! আমেৰিকাৰ প্ৰথম ভাৰতীয় মূলৰ ছেকেণ্ড লেডী হিচাপে চিহ্নিত ঊষা
উল্লেখ্য যে এই উপন্যাসখন বিশ্ববিখ্যাত সাহিত্যিক ৰুছদীৰ পঞ্চম উপন্যাস। ১৯৮৮ চনত প্ৰকাশ পাইছিল। আৰম্ভণিৰে পৰাই কিতাপখনক লৈ বিতৰ্ক আৰম্ভ হৈছিল। ১৯৮৯ চনৰ ১৪ ফেব্ৰুৱাৰীত ইৰাণৰ সৰ্বোচ্চ নেতা আয়াতুল্লাহ খোমেইনীয়ে ৰুছদিৰ মৃত্যুৰ সন্দৰ্ভত ফাতোৱা জাৰি কৰে। ইয়াৰ পিছত তেওঁ প্ৰায় এটা দশক নিৰলে আঁতৰি আছিল।
