অসমত শান্তিপূৰ্ণ গণতান্ত্ৰিক বাতাবৰণ বিনষ্ট কৰি ক্ষমতা দখলৰ অপচেষ্টা চলোৱা বিজেপি চৰকাৰক তীব্ৰ ভাষাৰে গৰিহণা দিছে অসম প্ৰদেশ কংগ্ৰেছ কমিটিৰ সভাপতি ভূপেন কুমাৰ বৰাই।
আজি এক বিবৃতিত বৰাই কয় যে চামগুৰি বিধানসভা সমষ্টিত বিজেপিৰ একাংশ গুণ্ডা প্ৰকৃতিৰ লোকে কিছুদিনৰ পৰা কংগ্ৰেছৰ সমৰ্থকৰ ওপৰত আক্ৰমণ চলাই আহিছিল আৰু শেহতীয়াকৈ দেওবাৰে দিনৰ ১১ বজাত চামগুৰি সমষ্টিৰ কংগ্ৰেছ প্ৰাৰ্থী তাঞ্জিল হুছেইনৰ ওপৰত শাৰীৰিক আক্ৰমণ চলায়। এয়া গণতন্ত্ৰৰ ওপৰত কুঠাৰাঘাত বুলি উল্লেখ কৰি বৰাই গৃহ বিভাগৰ দায়িত্বত থকা অসমৰ মুখ্যমন্ত্ৰী হিমন্ত বিশ্ব শৰ্মা সম্পূৰ্ণৰূপে আইন-শৃংখলা নিয়ন্ত্ৰণত ব্যৰ্থ বুলি অভিযোগ কৰে।
বৰাই কয় যে, চামগুৰিত বৰ্তমান আৰক্ষীৰ অস্তিত্ব নোহোৱা হৈ পৰিছে। বিজেপি প্ৰাৰ্থীক জয়ী কৰোৱাৰ স্বাৰ্থত চৰকাৰ আৰু প্ৰশাসনক মুখ্যমন্ত্ৰীয়ে জড়িত কৰোৱাৰ অভিযোগ উত্থাপন কৰি দেশৰ সাংবিধানিক অধিকাৰৰ পৰা সাধাৰণ ৰাইজক বঞ্চিত কৰাৰ অধিকাৰ মুখ্যমন্ত্ৰী হিমন্ত বিশ্ব শৰ্মাৰ নাই বুলি উল্লেখ কৰে।
নিৰ্বাচনী হিংসা নিয়ন্ত্ৰণ কৰিব নোৱাৰিলে মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে গণআন্দোলন গঢ়ি তোলা হ’ব বুলি বৰাই বিবৃতিটোত উল্লেখ কৰে। ইফালে, প্ৰদেশ কংগ্ৰেছৰ মিডিয়া বিভাগৰ অধ্যক্ষ বেদব্ৰত বৰাই মুখ্যমন্ত্ৰী হিমন্ত বিশ্ব শৰ্মাক ধৃতৰাষ্ট্ৰৰ ভূমিকা পালন নকৰিবলৈ আহ্বান জনায়।
বৰাই বিবৃতিত কয় যে সামাজিক মাধ্যমত মুখ্যমন্ত্ৰী হিমন্ত বিশ্ব শৰ্মাই বঢ়মপুৰ সমষ্টিৰ বিধায়ক জিতু গোস্বামীৰ ওপৰত আক্ৰমণ চলোৱা ঘটনাৰ গৰিহণা দিছে যদিও একে সময়তে বিজেপিৰ সমৰ্থক তথা দুৰ্বৃত্তৰ গুলীত আহত হোৱা কংগ্ৰেছ কৰ্মীসকলৰ প্ৰতি সহমৰ্মিতা প্ৰকাশ কৰা নাই।
কংগ্ৰেছৰ বিধায়ক শিৱামণি বৰা, আফতাবুদ্দিন মোল্লা, আব্দুছ ছোৱাহনকে ধৰি কেবাজনো নেতা আৰু আজি চামগুৰি সমষ্টিৰ প্ৰাৰ্থী, মুখ্যমন্ত্ৰীৰ পুত্ৰসম তাঞ্জিল হুছেইনৰ ওপৰত সংঘটিত আক্ৰমণৰ ঘটনাক মুখ্যমন্ত্ৰীয়ে নেদেখাৰ ভাও ধৰিছে আৰু এয়া গণতন্ত্ৰৰ প্ৰতি এক ভেঙুচালি।
মুখ্যমন্ত্ৰীয়ে সাংবিধানিক পদবীত থাকি একপক্ষীয় দৃষ্টিভংগীৰে সমঅধিকাৰৰ বিৰুদ্ধে থিয় দিয়া বুলি উল্লেখ কৰি বৰাই কয় যে সাধাৰণ ৰাইজৰ এতিয়া সামাজিক ন্যায় নোহোৱা হৈ গৈছে। ২০২৬ৰ বিধানসভা নিৰ্বাচনত মুখ্যমন্ত্ৰীজনৰ এনে অগণতান্ত্ৰিক কাৰ্যকলাপৰ হিচাপ ৰাইজে সঠিকভাৱে কৰিব বুলি বৰাই আশা প্ৰকাশ কৰে।
