মহাৰাষ্ট্ৰৰ প্ৰাক্তন মন্ত্ৰী তথা এন চি পি নেতা বাবা ছিদ্দিকীৰ হত্যাকাণ্ডৰ ২৯ দিনৰ পাছত মূল অভিযুক্ত শিৱকুমাৰক মুম্বাই আৰক্ষীয়ে গ্ৰেপ্তাৰ কৰে।
দেওবাৰে তেওঁক উত্তৰ প্ৰদেশৰ বাহৰেইচৰ পৰা গ্ৰেপ্তাৰ কৰা হয়।
এই গ্ৰেপ্তাৰত উত্তৰ প্ৰদেশ আৰক্ষীয়েও মুম্বাই আৰক্ষীক সহায় কৰিছিল। বাবা ছিদ্দিকী হত্যাকাণ্ডত মুঠ ২৩ জন লোকক গ্ৰেপ্তাৰ কৰা হৈছে। এতিয়াও পলাতক হৈ আছে দুজন।
যোৱা ১২ অক্টোবৰত বান্দ্ৰাস্থিত জীছান ছিদ্দিকিৰ কাৰ্যালয়ৰ বাহিৰত গুলীয়াই হত্যা কৰা হৈছিল মহাৰাষ্ট্ৰৰ প্ৰাক্তন মন্ত্ৰী বাবা ছিদ্দিকীৰ। ঘটনাস্থলীত তিনিজন আক্ৰমণকাৰী আহি গুলীচালনা কৰিছিল। ঘটনাস্থলীৰ পৰা দুজন লোকক আটক কৰে যদিও শিৱকুমাৰে পলায়ন কৰে।
তদন্তকাৰীয়ে দাবী কৰিছে যে শিৱকুমাৰেই বাবা ছিদ্দিকীক গুলীয়াই হত্যা কৰিছিল। আৰক্ষী সূত্ৰৰ পৰা জানিব পৰা মতে, ঘটনাৰ পিছৰে পৰা লৰেন্স বিষ্ণয়ৰ ভাতৃ অনমোল বিষ্ণোই শিৱকুমাৰৰ সৈতে নিয়মীয়াকৈ সংস্পৰ্শত আছিল। তেওঁক নেপাললৈ পঠোৱাৰ পৰিকল্পনা কৰা হৈছিল।
দেওবাৰে আৰক্ষীয়ে শিৱকুমাৰৰ লগতে আন চাৰিজন লোকক গ্ৰেপ্তাৰ কৰে। জানিব পৰা মতে তেওঁলোকৰ প্ৰত্যেকেই অভিযুক্তক পলায়ন কৰাত সহায় কৰিছিল।
আৰক্ষীৰ সূত্ৰ অনুসৰি তেওঁলোকে বাবা ছিদ্দিকীক হত্যা কৰিবলৈ মুম্বাইত দিনৰ পিছত দিন আখৰা কৰিছিল। ১২ অক্টোবৰ দিনটো বাছি লোৱা হৈছিল কাৰণ সেই দিনটো দশহৰা আছিল। উৎসৱৰ দিনত পলায়ন কৰাটো সুবিধাজনক বাবেই দিনটো ঠিক কৰা হৈছিল।
আৰক্ষীৰ সূত্ৰৰ পৰা জানিব পৰা মতে, ঘটনাস্থলীৰ পৰা পলায়ন কৰি প্ৰথমে শিৱকুমাৰে ফোনটো ভাঙিছিল। তাৰ পাছত পুনেলৈ গৈছিল। তাৰ পৰা ঝান্সীলৈ লক্ষ্ণৌলৈ। তাৰ পিছত উত্তৰ প্ৰদেশৰ বাহৰেইচত বাহৰ পাতি আছিল। তাৰ পৰাই তেওঁ নেপাললৈ পলায়নৰ পৰিকল্পনা কৰিছিল।
