উত্তৰ প্ৰদেশৰ ঝান্সীৰ মহাৰাণী লক্ষ্মীবাই চিকিৎসা মহাবিদ্যালয়ৰ নৱজাতকৰ বাবে নিৰ্দ্ধাৰিত আই চি ইউ বিভাগত শুকুৰবাৰে নিশা সংঘটিত হয় এক ভয়ংকৰ অগ্নিকাণ্ড। সেই অগ্নিকাণ্ডত কমেও ১০ টা নৱজাতকৰ মৃত্যু হয়। লগতে এই অগ্নিকাণ্ডত ১৬ জন লোক আহত হয়। জানিব পৰা মতে, এই ঘটনাৰ পিছত মুঠ ৩৭ জন লোকক জীৱিত অৱস্থাত উদ্ধাৰ কৰা হয়।
এই অগ্নিকাণ্ডৰ সন্দৰ্ভত কানপুৰ জ’নৰ এডিজি আলোক সিঙে কয় যে বিদ্যুতৰ শ্বৰ্ট চাৰ্কিটৰ ফলতে এই অগ্নিকাণ্ড সংঘটিত হৈছে। সেই সময়ত মৃত কেঁচুৱাকেইটা ইনকিউবেটৰত আছিল। তেওঁ লগতে কয় যে ঘটনাৰ সময়ত সেই ৱাৰ্ডত ৪৭ টা শিশু ভৰ্তি হৈ আছিল। ইফালে, ঝাঁচীৰ ডি আই জি কালানিধি নাইথানীয়েও সেই স্থান পৰিদৰ্শন কৰাৰ পিছত মৃত আটাইকেইটিয়ে শিশু আৰু আন ১৬ জন আহত হোৱা বুলি জানিবলৈ দিয়ে।
এই দুৰ্ঘটনা সন্দৰ্ভত ঝান্সী জিলা দণ্ডাধীশে কয়, ‘’নিশা ১০:৩০ বজাৰ পৰা ১০:৪৫ বজাৰ ভিতৰত এনআইচিইউ ইউনিটৰ ভিতৰত শ্বৰ্ট চাৰ্কিট হৈছিল। এই পৰিস্থিতিত ইউনিটৰ দুৱাৰৰ ওচৰৰ শিশুসকলক প্ৰথমে উদ্ধাৰ কৰা হয়। ইফালে ইউনিটৰ ভিতৰৰ বহু লোককো উদ্ধাৰ কৰা হয়। অৱশ্যে দুৰ্ভাগ্যজনকভাৱে এই পৰ্যন্ত ১০টা শিশুৰ মৃত্যু হৈছে। উদ্ধাৰ অভিযান অব্যাহত আছে। অগ্নিনিৰ্বাপক বাহিনী আৰু উদ্ধাৰকাৰী দলে তৎক্ষণাত সঁহাৰি জনাই বহু শিশুক উদ্ধাৰ কৰিবলৈ সক্ষম হয়। আমি গুৰুতৰভাৱে আহতসকলৰ চিকিৎসা আগবঢ়াইছো। কৰ্তব্যৰত কৰ্মচাৰীসকলেও কয় যে শ্বৰ্ট চাৰ্কিটৰ পৰা অগ্নিকাণ্ড সংঘটি হৈছে।‘’
ইপিনে উত্তৰ প্ৰদেশৰ উপ-মুখ্যমন্ত্ৰী ব্ৰজেশ পাঠকে এই অগ্নিকাণ্ডৰ খবৰ পাই সেই স্থানলৈ যায়। তালৈ গৈ সাংবাদিকৰ মুখামুখি হৈ তেওঁ কয়, ‘ফেব্ৰুৱাৰী মাহতেই ইয়াত ফায়াৰ ছেফটি অডিট কৰা হৈছিল। জুন মাহত ইয়াত মক ড্ৰিলৰো আয়োজন কৰা হৈছিল। অৱশ্যে এইটো কেনেকৈ আৰু কিয় হ’ল, তদন্তৰ প্ৰতিবেদন ওলোৱাৰ পিছতহে আমি ইয়াৰ বিষয়ে কিবা এটা ক’ব পাৰো… মৃত নৱজাতকৰ ভিতৰত ৭টা মৃতদেহ চিনাক্ত কৰা হৈছে। ৩টা মৃতদেহ এতিয়াও চিনাক্ত হোৱা নাই… মৃত আৰু আহত নৱজাতকৰ পৰিয়ালক আৰ্থিক সাহায্য প্ৰদান কৰা হ’ব।’
লগতে পঢ়কঃ ক্ষমতাত মত্ত আৰক্ষী বিষয়াৰ কাণ্ড! নিৰ্মমভাৱে ছাত্ৰক প্ৰহাৰ কৰি নিলম্বিত ভাৰ্গৱ বৰবৰা
আনহাতে, মুখ্যমন্ত্ৰী যোগী আদিত্যনাথে ছ’চিয়েল মিডিয়াত বাৰ্তা লিখি শোকসন্তপ্ত পৰিয়ালক সমবেদনা জ্ঞাপন কৰে। এই সন্দৰ্ভত তেওঁ লিখিছে, ‘ঝান্সী জিলা চিকিৎসা মহাবিদ্যালয়ৰ এন আই চি ইউত দুৰ্ঘটনা সংঘটিত হৈ শিশুৰ মৃত্যু অতি দুখজনক আৰু হৃদয় বিদাৰক। জিলা প্ৰশাসন আৰু সংশ্লিষ্ট বিষয়াসকলক যুদ্ধকালীন অভিযানত উদ্ধাৰ অভিযান চলাবলৈ নিৰ্দেশ দিয়া হৈছে। ভগৱান শ্ৰীৰামৰ ওচৰত প্ৰাৰ্থনা জনাইছো যাতে বিদেহী সকলৰ আত্মাক শান্তি প্ৰদান কৰে। আৰু মই ঈশ্বৰৰ ওচৰত প্ৰাৰ্থনা কৰিছো, যাতে আহতসকল সোনকালে সুস্থ হৈ উঠে।’
