সংযুক্ত মুক্তি বাহিনী, অসম চমুকৈ আলফাৰ ওপৰত থকা নিষেধাজ্ঞা আৰু ৫ বছৰৰ বাবে বৃদ্ধি কৰিছে কেন্দ্ৰীয় গৃহ মন্ত্ৰালয়ে। সোমবাৰে কেন্দ্ৰই গ্ৰহণ কৰে এই পদক্ষেপ।
এই পৰিপ্ৰেক্ষিতত গৃহ পৰিক্ৰমা মন্ত্ৰালয়ে এক অধিসূচনা প্ৰকাশ কৰিছে। সেই অনুসৰি এই গোটটোৱে এতিয়াও অসমত বিচ্ছিন্নতাবাদী কাৰ্যকলাপ অব্যাহত ৰাখিছে। ইয়াৰ উপৰিও তেওঁলোকৰ বিৰুদ্ধে ধন দাবীৰ নামত হাৰাশাস্তি আৰু হিংসা বিয়পোৱাৰ অভিযোগো উত্থাপন হৈছে। দৰাচলতে এই উগ্ৰপন্থী গোটটোৱে এতিয়াও আন বিচ্ছিন্নতাবাদী গোটৰ সৈতে সম্পৰ্ক বজাই ৰাখিছে।
উল্লেখ্য যে ১৯৯০ চনত আলফাৰ ওপৰত প্ৰথম নিষেধাজ্ঞা কাৰ্যকৰী কৰা হৈছিল। তাৰ পিছৰে পৰা বাৰে বাৰে এই নিষেধাজ্ঞা বৃদ্ধি কৰা হৈছে। শেষবাৰৰ বাবে ২০১৯ চনৰ ২৭ নৱেম্বৰত এই নিষেধাজ্ঞা বলবৎ কৰা হৈছিল। ১৯৬৭ চনৰ অবৈধ কাৰ্যকলাপ (প্ৰতিৰোধ) আইন অনুসৰি আলফাৰ বিৰুদ্ধে এই ব্যৱস্থা গ্ৰহণ কৰা হৈছে।
অধিসূচনা অনুসৰি আলফাৰ সকলো শাখা আৰু ফ্ৰণ্ট সংগঠনক সামূহিকভাৱে বিচ্ছিন্নতাবাদী কাৰ্যকলাপৰ সৈতে জড়িত কৰা হৈছে, যিবোৰ ভাৰতৰ সাৰ্বভৌমত্ব আৰু অখণ্ডতাৰ বাবে বিপজ্জনক।
অধিসূচনাত লগতে কোৱা হৈছে যে, ‘আলফাই ইতিমধ্যে নিজৰ লক্ষ্য ঘোষণা কৰিছে। অৰ্থাৎ – ভাৰতৰ পৰা অসমক বিচ্ছিন্ন কৰা। এতিয়াও মানুহক ভয় দেখুৱাই, ধন দাবী আৰু হিংসা বিয়পাই নিজৰ সংগঠন চলাই আছে….’
‘…এই সংগঠনটোৱে অবৈধভাৱে অস্ত্ৰ-শস্ত্ৰ আৰু বিস্ফোৰক সামগ্ৰী মজুত কৰি ৰাখিছে। ১৬টা অপৰাধমূলক গোচৰত তেওঁলোক জড়িত বুলি খবৰ পোৱা গৈছে। যাৰ ভিতৰত আছে একাধিক বিস্ফোৰণ আৰু বিস্ফোৰণৰ চেষ্টাৰ দৰে ঘটনা। ২০১৯ চনৰ ২৭ নৱেম্বৰৰ পৰা ২০২৪ চনৰ ১ জুলাইলৈকে অসমত এই ঘটনা সংঘটিত কৰিছে। আনকি ২০২৪ চনত স্বাধীনতা দিৱসৰ দিনাও অসমৰ কেইবাটাও স্থানত আই ই ডি আৰু বিস্ফোৰক সামগ্ৰী স্থাপন কৰিছিল।’
গৃহ মন্ত্ৰালয়ৰ অধিসূচনাত বিগত পাঁচ বছৰত আলফাৰ তিনিজন উগ্ৰপন্থী সদস্যক নিহত কৰা হৈছে বুলিও অৱগত কৰা হৈছে। আৰক্ষী আৰু নিৰাপত্তাৰক্ষীৰ অভিযানত নিহত হয় তেওঁলোক। আলফাৰ সদস্যৰ বিৰুদ্ধে ১৫টা গোচৰ ৰুজু হৈছে। ইয়াৰে তিনিটা গোচৰত চাৰ্জ শ্বীট দিয়া হৈছে। আৰু তিনিজন সদস্যক আদালতত হাজিৰ কৰা হৈছে।
ইয়াৰ উপৰিও আলফা আন ২৭টা অপৰাধমূলক গোচৰৰ সৈতে জড়িত বুলি গৃহ মন্ত্ৰালয়ৰ অধিসূচনাত প্ৰকাশ পাইছে। ইয়াত উল্লেখ কৰা হৈছে যে আলফাৰ ৫৬ জন কেডাৰ গ্ৰেপ্তাৰ হোৱাৰ লগতে ৬৩ জন কেডাৰে আত্মসমৰ্পণ কৰিছে।
তদুপৰি, আলফা সদস্যৰ জিম্মাৰ পৰা ২৭ টা আগ্নেয়াস্ত্ৰ, ৫৫০ ৰাউণ্ড কাৰ্টিজ, ৯ টা গ্ৰেনেড আৰু দুটা আই ই ডি উদ্ধাৰ কৰা হৈছে।
