দক্ষিণ আফ্ৰিকাৰ প্ৰথমখন টেষ্টত শ্ৰীলংকাৰ লাজত মুখ লুকুৱাব নোৱাৰা অৱস্থা। প্ৰথমখন টেষ্টত দক্ষিণ আফ্ৰিকাৰ পেচাৰসকলৰ দমনীয় প্ৰদৰ্শনৰ আগত মাত্ৰ ৪২ ৰাণতে প্ৰথম ইনিংছ সামৰিলে শ্ৰীলংকাই। টেষ্ট ইতিহাসত শ্ৰীলংকাৰ এয়া সৰ্বনিম্ন ৰান। শ্ৰীলংকাৰ ইনিংছত মাত্ৰ ৮৩টা বলহে চলিছিল।
ইয়াৰ পূৰ্বে ১৯৯৪ চনত পাকিস্তানৰ বিৰুদ্ধে ৭১ ৰানত প্ৰথম অল আউট হৈছিল। টেষ্ট ক্ৰিকেটৰ ইতিহাসত এয়া নৱম সৰ্বনিম্ন ৰান। অৱশ্যে চাৰি বছৰ পূৰ্বে এডিলেইডত অষ্ট্ৰেলিয়াৰ বিৰুদ্ধে ভাৰতৰ ৩৬ ৰানৰ অভিলেখ ভংগ হোৱা নাই। এয়া টেষ্ট ক্ৰিকেটৰ ১৪৭ বছৰীয়া ইতিহাসত এছিয়ান দলৰ সৰ্বনিম্ন ৰান সংগ্ৰহৰ এই অভিলেখ। সেই লজ্জাজনক অভিলেখ মাত্ৰ ৬ ৰানৰ বাবে ৰৈ গ’ল।
মাৰ্কো জান্সেনে অকলে শ্ৰীলংকাৰ ইনিংছ সমাপ্ত কৰে। বাওঁহতীয়া পেচাৰগৰাকীয়ে ৬.৫ অভাৰত ১৩ ৰান দি ৭ টা উইকেট দখল কৰে। জেৰাল্ড কোটজিয়ে লাভ কৰে দুটা উইকেট। কাগিছো ৰাৱাডাই পায় এটা উইকেট। মাত্ৰ দুজন শ্ৰীলংকাৰ বেটছমেনেহে দুটা সংখ্যাৰ ৰান সংগ্ৰহ কৰিবলৈ সক্ষম হয়। তেওঁলোক হ’ল কামিন্দু মেণ্ডিছ (১৩) আৰু লাহিৰু কুমাৰা (১০)।
ডাৰবানত অনুষ্ঠিত প্ৰথমখন টেষ্টত টেম্বা বাভুমাৰ ৭০ ৰানৰ সৌজন্যত দক্ষিণ আফ্ৰিকাই ১৯১ ৰান সংগ্ৰহ কৰে। আচিতা ফাৰ্নাণ্ডো আৰু কুমাৰাই ভাল বল কৰে। কিন্তু এনেদৰে বেটিং ভাঙি যাব বুলি কোনেও কল্পনা কৰিব পৰা নাছিল। শ্ৰীলংকাৰ ইনিংছ মাত্ৰ ১৩.৫ অভাৰহে চলে! তৃতীয় অভাৰত ডিমুথ কৰুণাৰত্নেৰ আউটেৰে আৰম্ভণি হয়। ইয়াৰ পিছত ইজনৰ পিছত সিজন বেটছমেন জান্সেনৰ প্ৰকোপত ড্ৰেছিং ৰুমৰ পৰা ওলাই আহি মিনিটৰ ভিতৰতে ঘূৰি আহিল।
শ্ৰীলংকা আৰু দক্ষিণ আফ্ৰিকা দুয়োখনৰেই বিশ্ব টেষ্ট চেম্পিয়নশ্বিপৰ ফাইনেলত প্ৰৱেশৰ সুযোগ আছে। ঘৰৰ মাটিত সকলো টেষ্টত জয়লাভ কৰিব লাগিব দক্ষিণ আফ্ৰিকাই। প্ৰথমখন টেষ্ট কাৰ্যতঃ তেওঁলোকৰ হাততে আছে। যদি জয়ী হয় তেন্তে ফাইনেলৰ দিশে এখোজ আগুৱাই যাব।
