ধন সৰবৰাহৰ গোচৰত পশ্চিম বংগৰ প্ৰাক্তন শিক্ষামন্ত্ৰী পাৰ্থ চেটাৰ্জীৰ জামিন আবেদনৰ শুনানি গ্ৰহণ কৰি থকাৰ সময়তে বুধবাৰে (২৬ নৱেম্বৰ) উচ্চতম ন্যায়ালয়ে অভিযুক্তক বিচাৰ অবিহনে দীৰ্ঘদিন ধৰি জিম্মাত ৰখাৰ বাবে উদ্বেগ প্ৰকাশ কৰে।
লাইভ ল’ৰ প্ৰতিবেদন অনুসৰি ন্যায়াধীশ সূৰ্য্য কান্ত আৰু ন্যায়াধীশ উজ্জ্বল ভূঞাৰ উচ্চতম ন্যায়ালয়ৰ বিচাৰপীঠেও বলবৎকাৰী সঞ্চালকালয়ে (ইডি) চলোৱা গোচৰসমূহত দোষী সাব্যস্ত হোৱাৰ হাৰ কম হোৱাক লৈ প্ৰশ্ন উত্থাপন কৰে।
জানিব পৰা মতে, চেটাৰ্জীৰ হৈ জ্যেষ্ঠ অধিবক্তা মুকুল ৰোহটগীয়ে কয় যে প্ৰাক্তন মন্ত্ৰীগৰাকীক ২০২২ চনৰ ২৩ জুলাইত গ্ৰেপ্তাৰ কৰা হৈছিল আৰু তেওঁ ২.৫ বছৰতকৈ অধিক সময় ধৰি জিম্মাত আছে।
লগতে তেওঁ কয় যে আবেদনকাৰীৰ বয়স ৭৩ বছৰ আৰু এই গোচৰ শীঘ্ৰে সম্পূৰ্ণ হোৱাৰ কোনো সম্ভাৱনা নাই। কাৰণ এই গোচৰত ১৮৩ জন সাক্ষী আৰু চাৰিটা পৰিপূৰক বিচাৰ অভিযোগ আছে।
ৰোহাটগীয়ে লগতে কয় যে চেটাৰ্জীয়ে ইতিমধ্যে ধন সৰবৰাহৰ প্ৰতিৰোধ আইনৰ অধীনত সৰ্বোচ্চ শাস্তিৰ এক তৃতীয়াংশতকৈ অধিক শাস্তি ভুগিছে, যিটো হৈছে ৭ বছৰৰ কাৰাদণ্ড।
এই সন্দৰ্ভত ন্যায়াধীশ ভূঞাই ইডিৰ হৈ অতিৰিক্ত চলিচিটৰ জেনেৰেল এছ ভি ৰাজুক প্ৰশ্ন কৰে যে, ‘অৱশেষত যদি তেওঁক দোষী সাব্যস্ত নহয় তেন্তে কি হ’ব? ২.৫-৩ বছৰ অপেক্ষা কৰাটো কম সময় নহয়! আপোনাৰ দোষী সাব্যস্ত হোৱাৰ হাৰ কিমান? যদি ৬০-৭০% হয় তেন্তে আমি বুজিব পাৰো, কিন্তু ই বহুত বেয়া।’
ইয়াৰ উত্তৰত অতিৰিক্ত ছলিচিটৰ জেনেৰেলে কয় যে বিষয়টো গোচৰৰ ভিত্তিত চাব লাগিব। এই গোচৰৰ পৰৱৰ্তী শুনানি এতিয়া অহা সপ্তাহত হ’ব।
উল্লেখযোগ্য যে ২০১৪ চনৰ পৰা ২০২১ চনলৈ তৃণমূল কংগ্ৰেছ চৰকাৰত পাৰ্থ চেটাৰ্জী শিক্ষামন্ত্ৰী আছিল। চেটাৰ্জীক গ্ৰেপ্তাৰ কৰাৰ পিছত মন্ত্ৰী পদৰ পৰা অপসাৰণ কৰি তৃণমূল কংগ্ৰেছৰ পৰা নিলম্বন কৰা হয়।
পাৰ্থ চেটাৰ্জীৰ পিছত পশ্চিম বংগৰ বিদ্যালয়সমূহত শিক্ষক আৰু অশিক্ষক কৰ্মচাৰী নিযুক্তিৰ সৈতে জড়িত এক অভিযোগত কেলেংকাৰীত গ্ৰেপ্তাৰ হয় মাণিক ভট্টাচাৰ্যক। এই গোচৰত ইডিয়ে গ্ৰেপ্তাৰ কৰা টিএমচিৰ দ্বিতীয়জন বিধায়ক আছিল তেওঁ।
