সপোন পূৰণ কৰিও অৱশেষত চাকৰিত যোগদান কৰিব নোৱাৰিলে এজন যুৱকে। প্ৰথম পোষ্টিং লৈ চাকৰিত যোগদান কৰিবলৈ যোৱাৰ পথত ভয়ংকৰ গাড়ী দুৰ্ঘটনাত মৃত্যু হয় এজন আই পি এছ বিষয়াৰ। মৃত যুৱকজনৰ নাম হৰ্ষ বৰ্ধন। ২০২৩ বৰ্ষৰ আই পি এছ বেচত আছিল তেওঁ।
সৰ্বভাৰতীয় সংবাদ মাধ্যমৰ সূত্ৰ অনুসৰি সোমবাৰে আৰক্ষীয়ে জনোৱা মতে, দেওবাৰে কৰ্ণাটকৰ হাছান জিলাত সংঘটিত গাড়ী দুৰ্ঘটনাত ২৬ বছৰীয়া আই পি এছ বিষয়া হৰ্ষবৰ্ধনৰ মৃত্যু হয়।
হাছান-মহীশূৰত ঘাইপথত হঠাতে চালকজনে গাড়ীৰ নিয়ন্ত্ৰণ হেৰুৱায়। টায়াৰ ফাটি যোৱাৰ পিছত গাড়ীখনে নিয়ন্ত্ৰণ হেৰুৱাই প্ৰথমে এটা ঘৰ আৰু তাৰ পিছত গছত খুন্দা মাৰে। হৰ্ষ বৰ্ধনৰ মূৰত গুৰুতৰভাৱে আঘাতপ্ৰাপ্ত হয়। অত্যধিক ৰক্তক্ষৰণৰ ফলত চিকিৎসালয়ত চিকিৎসাৰ সময়ত তেওঁৰ মৃত্যু হয়। গাড়ীখনৰ আহত চালকজন এতিয়াও চিকিৎসালয়ত চিকিৎসাধীন হৈ আছে।
কৰ্ণাটকৰ মহীশূৰত বিগত চাৰি সপ্তাহ ধৰি হৰ্ষবৰ্ধনে প্ৰশিক্ষণ লৈ থকা বুলিও আৰক্ষীয়ে জানিবলৈ দিয়ে। হাছান জিলাতে প্ৰথম পোষ্টিং পায়। তেওঁ সোমবাৰে সহকাৰী আৰক্ষী অধীক্ষক হিচাপে সেৱাত যোগদান কৰাৰ কথা আছিল।
কিন্তু চাকৰিত যোগদান কৰাৰ পূৰ্বে এক ভয়ংকৰ দুৰ্ঘটনাত মৃত্যু হয় সম্ভাৱনাপূৰ্ণ এজন ২৬ বছৰীয়া যুৱ আই পি এছ বিষয়াৰ। কৰ্ণাটকৰ মুখ্যমন্ত্ৰী সিদ্দাৰমাইয়াই আই পি এছজনৰ মৃত্যুত শোক প্ৰকাশ কৰে আৰু পৰিয়াললৈ সমবেদনা জ্ঞাপন কৰে।
