গুজৰাটত সংঘটিত হৈছে এক ভয়ংকৰ পথ দুৰ্ঘটনা। পৰীক্ষা দিবলৈ যোৱা ৫ গৰাকী কলেজীয়া শিক্ষাৰ্থীৰ মৃত্যু হৈছে। দুখন বাহনৰ মাজত হোৱা মুখামুখি সংঘৰ্ষৰ ফলত এই ঘটনা সংঘটিত হৈছে। দুৰ্ঘটনাত দ্বিতীয়খন গাড়ীত থকা দুজন লোক নিহত হয়। মুঠতে মৃত্যুৰ সংখ্যা ৭ জন।
আৰক্ষীৰ সূত্ৰ অনুসৰি, সোমবাৰে পুৱা প্ৰায় ৮ বজাত জুনাগড়ৰ যোটপুৰ-বেৰাবল ঘাইপথত সংঘটিত হয় এই দুৰ্ঘটনা। মহাবিদ্যালয়ৰ শিক্ষাৰ্থীৰ গাড়ীখনে নিয়ন্ত্ৰণ হেৰুৱাই ভান্দ্ৰী গাঁৱৰ সমীপত ডিভাইডাৰত খুন্দা মাৰে। তাৰ পিছত নিয়ন্ত্ৰণ হেৰুৱাই গাড়ীখন ভুল লেনত সোমাই যায়। সেই সময়তে বিপৰীত দিশৰ পৰা অহা আন এখন বাহনৰ সৈতে মুখামুখি সংঘৰ্ষ ঘটে।
দুৰ্ঘটনাৰ তীব্ৰতা ইমানেই আছিল যে দুয়োখন বাহনেই চূৰ্ণ-বিচূৰ্ণ হৈ পৰে। এই ঘটনাত শিক্ষাৰ্থীসকল থকা গাড়ীৰ ৫জনৰ মৃত্যু হয়। জনা যায় যে তেওঁলোকে পৰীক্ষা দিবলৈ গৈ আছিল। আনখন বাহনত থকা দুজন যাত্ৰীৰো থিতাতে মৃত্যু হয়।
দুৰ্ঘটনাৰ খবৰ পোৱাৰ পিছতে আৰক্ষীয়ে ততাতৈয়াকৈ সেই স্থানত উপস্থিত হয়। গাড়ীখন ইমানেই ক্ষতিগ্ৰস্ত হৈছিল যে আৰক্ষীয়ে গাড়ীখনৰ পৰা মৃতদেহকেইটা উলিয়াই আনিবলৈ যথেষ্ট সংগ্ৰাম কৰিবলগীয়া হৈছিল। ঘটনাৰ পিছতে ৭টা মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰা হয়। সমগ্ৰ ঘটনাৰ তদন্ত আৰম্ভ কৰিছে আৰক্ষীয়ে।
উল্লেখ্য যে যোৱা ১৯ নৱেম্বৰতো গুজৰাটৰ ভাৰুচ অঞ্চলত সংঘটিত হৈছিল এক মৰ্মান্তিক পথ দুৰ্ঘটনা। য’ত দুটা শিশু আৰু দুগৰাকী মহিলাকে ধৰি ৬ জন লোকৰ মৃত্যু হৈছিল। জানিব পৰা মতে গাড়ীখনে নিয়ন্ত্ৰণ হেৰুৱাই পথত থিয় হৈ থকা এখন ট্ৰাকত খুন্দা মাৰিছিল। ৬ জন লোকৰ থিতাতে মৃত্যু হৈছিল।
