যোৰহাটৰ এখন গাঁওৰ মহিলাসকলে জৈৱিক কৃষিৰ এটা প্ৰকল্প হিচাপে আৰম্ভ কৰি তাক এটা পৰিৱেশ সংৰক্ষণ আন্দোলনলৈ পৰ্যৱসিত কৰি তুলিলে। এই অনুপ্ৰেৰণামূলক কাহিনীটো হৈছে যোৰহাট জিলাৰ লাহদৈৰ বৰফলীয়া গোহাঞি গাঁওৰ মহিলাসকলৰ কাহিনী।
সেয়া ২০১১চনৰ কথা। কেঁচুসাৰ আঁচনি আৰম্ভ কৰাৰ বাবে বৰফলীয়া গোহাঞি গাঁও আৰু যোৰহাট জিলাৰ চাৰিটা উন্নয়ন খণ্ডৰ অন্তৰ্গত আন ২০খন গাঁও নিৰ্বাচন কৰিছিল আচনিখনৰ প্ৰধান বিনিয়োগকাৰী মঞ্জু দত্তই। অসম কৃষি বিশ্ববিদ্যালয়ৰ আৰু কৃষিকাৰ্যত মহিলাৰ ওপৰত গৱেষণা সঞ্চালকালয়ৰ (Directorate of Research on Women in Agriculture)কৃষিত লিংগ মূলসূতিকৰণ প্ৰকল্পৰ এটা অংশ হিচাপে কেঁচুসাৰ আঁচনি আৰম্ভ কৰা হৈছিল।
অসম কৃষি বিশ্ববিদ্যালয়ৰ অন্তৰ্গত সম্প্ৰদায় বিজ্ঞান কলেজৰ এক্সটেনশ্যন বিভাগৰ মুৰব্বী অধ্যাপিকা মঞ্জু দত্ত দাস কৈছে যে তেওঁ বৰফলীয়া গোহাঞি গাঁওৰ মাথোঁ ৯ গৰাকী মহিলাক লৈ প্ৰকল্পটো আৰম্ভ কৰিছিল। এই মহিলাসকলে এটা আত্মসহায়ক গোট হিচাপে সংগঠিত হৈছিল।
”আজি সাত বছৰৰ পাছত মই গৰ্বেৰে কঁও যে এই এলেকাটোত ধান, চাহ বা অন্যন্য উদ্যানশস্যৰ ৭০শতাংশ খেতি জৈৱিক পদ্ধতিত কৰা হয়।” অধ্যাপিকা দাসে কয়।
অধ্যাপিকা মঞ্জু দত্ত দাসে গাঁওবাসীসকলৰ সৈতে নিৰবিচ্চিন্ন যোগাযোগ ৰক্ষা কৰি থকা আৰু পঞ্চায়তৰ সমল মহিলাসকলে গাঁওবাসীসকলক কেঁচুসাৰ প্ৰস্তুত কৰাৰ বাবে অহৰহ অনুপ্ৰেৰণা যোগাই অহাৰ বাবে এই সাফল্য লাভ কৰা হৈছে বুলি প্ৰকাশ কৰে।
এই আঁচনিখন ৰাজহুৱা-ব্যক্তিগত সহযোগিতাত বাস্তৱায়িত কৰা হৈছিল আৰু অধ্যাপিকা দাসে এই আঁনিখন বাস্তৱায়িত কৰা আৰু প্ৰশিক্ষিত চামৰ মাজৰ পৰা হিতাধিকাৰীসকলক নিৰ্বাচিত কৰাৰ বাবে এটা বেচৰকাৰী সংস্থা নিৰ্বাচন কৰাৰ দায়িত্বত আছিল।
